Breaking News : અમેરિકામાં ગ્રીન કાર્ડની રાહ જોઈ રહેલા ભારતીયો માટે મુશ્કેલી વધી શકે, H-1B વિઝા નિયમોમાં મોટા ફેરફારની તૈયારી
અમેરિકા H-1B વિઝા એક્સટેન્શન નીતિમાં ફેરફાર વિચારી રહ્યું છે, જેમાં 'ડિફરન્સ ટુ પ્રાયોર એપ્રુવલ' હટાવાશે. આનાથી ભારતીય H-1B ધારકો અને ગ્રીન કાર્ડ અરજદારો માટે મુશ્કેલી વધી શકે છે.
અમેરિકામાં કાયમી વસવાટ અને ગ્રીન કાર્ડ મેળવવાની રાહ જોઈ રહેલા ભારતીયો માટે મુશ્કેલી વધી શકે છે. ડોનાલ્ડ ટ્રમ્પ વહીવટીતંત્ર H-1B વિઝા એક્સટેન્શન સંબંધિત મહત્વપૂર્ણ ઇમિગ્રેશન નીતિમાં ફેરફાર કરવાની તૈયારી કરી રહ્યું છે.
ડિપાર્ટમેન્ટ ઓફ હોમલેન્ડ સિક્યુરિટી (DHS) અને USCIS દ્વારા ‘ડિફરન્સ ટુ પ્રાયોર એપ્રુવલ’ નીતિ હટાવવાનો પ્રસ્તાવ મૂકવામાં આવ્યો છે. આ અંગે 13 નવેમ્બર, 2026 સુધી જાહેર જનતા પાસેથી અભિપ્રાયો મંગાવવામાં આવ્યા છે. જોકે, હજુ આ પ્રસ્તાવ અંતિમ નિર્ણય બન્યો નથી.
હાલના નિયમો મુજબ, જો કોઈ કર્મચારી એક જ કંપનીમાં સમાન પદ અને જવાબદારીઓ સાથે H-1B વિઝાનું એક્સટેન્શન માગે છે, તો USCIS સામાન્ય રીતે તેની અગાઉની મંજૂરીને મહત્ત્વ આપે છે. એટલે કે, અગાઉના નિર્ણયમાં કોઈ મોટી ભૂલ કે નવી નકારાત્મક માહિતી સામે ન આવે ત્યાં સુધી ફરીથી સંપૂર્ણ તપાસ કરવાની જરૂર પડતી નથી. પરંતુ નવા પ્રસ્તાવ હેઠળ આ વ્યવસ્થામાં ફેરફાર થઈ શકે છે. દરેક વિઝા એક્સટેન્શન વખતે કર્મચારીની લાયકાત, નોકરીની સ્થિતિ, પગાર અને કંપની સાથેના સંબંધોની નવેસરથી તપાસ કરવામાં આવી શકે છે.
અમેરિકન સરકારનું કહેવું છે કે આ ફેરફારથી ખોટી મંજૂરીઓ અને વિઝા સંબંધિત ગેરરીતિઓ પર નિયંત્રણ લાવવામાં મદદ મળશે. જોકે, ભારતીય વ્યાવસાયિકો માટે આ નિર્ણય ચિંતાનો વિષય બની શકે છે.
નાણાકીય વર્ષ 2025માં H-1B વિઝા મેળવનારાઓમાં આશરે 71 ટકા ભારતીય નાગરિકો હતા. બીજી તરફ, રોજગાર આધારિત ગ્રીન કાર્ડ માટે લાખો ભારતીયો લાંબી કતારમાં છે.
નેશનલ ફાઉન્ડેશન ફોર અમેરિકન પોલિસી (NFAP)ના વિશ્લેષણ મુજબ, ગ્રીન કાર્ડના બેકલોગમાં આશરે 10 લાખ ભારતીયો સામેલ છે. આવી સ્થિતિમાં H-1B વિઝાનું નિયમિત એક્સટેન્શન તેમના માટે અત્યંત મહત્ત્વનું છે. નિષ્ણાતોના મતે, નવા નિયમો લાગુ થાય તો અરજીઓમાં વધુ તપાસ, પુરાવા માટેની વિનંતીઓ (RFE) અને પ્રક્રિયામાં વિલંબ વધી શકે છે.
આ ફેરફારની અસર H-4 વિઝા પર રહેતા આશ્રિત જીવનસાથીઓ પર પણ પડી શકે છે. ખાસ કરીને તેમના વર્ક પરમિટ અને રોજગારની મંજૂરીને લઈને અનિશ્ચિતતા વધી શકે છે. જોકે, અંતિમ નિયમ જાહેર ન થાય ત્યાં સુધી ભારતીય અરજદારોએ પરિસ્થિતિ પર નજર રાખવી જરૂરી છે.
