YouTube કેપિટલ બન્યું ભારતનું આ ગામ, ફેમસ એટલું કે લોકોને ફિલ્મોમાં મળી રહી છે ઓફર, સરકારે બનાવી આપ્યો સ્ટુડિયો
છત્તીસગઢનું તુલસી ગામ હવે યુટ્યુબ વિલેજના નામથી ફેમસ થઈ ગયું છે અને સાથે સાથે ગામના 1,000 થી વધુ લોકો યુટ્યુબ સાથે જોડાયેલા છે. આનાથી મહિલાઓ અને યુવાનોને એક નવું પ્લેટફોર્મ મળ્યું છે.
બીબીસીના અહેવાલ અનુસાર, ગામના બે યુવકો જય વર્મા અને જ્ઞાનેન્દ્ર શુક્લાએ 2018માં ‘બીઈંગ છત્તીસગઢિયા’ નામની યુટ્યુબ ચેનલ શરૂ કરી હતી. થોડી જ વારમાં તેના વીડિયો વાયરલ થવા લાગ્યા અને આજે તેની ચેનલના 1.25 લાખથી વધુ સબ્સ્ક્રાઇબર્સ છે. તેના વીડિયો 260 મિલિયનથી વધુ વખત જોવામાં આવ્યા છે.
અહીંના લોકો માત્ર યુટ્યુબ પૂરતા જ સીમિત નથી, પરંતુ ઘણા લોકોને ફિલ્મોની ઓફર મળી રહી છે અને તેઓ ફિલ્મ ઈન્ડસ્ટ્રીમાં પોતાનું કરિયર બનાવી રહ્યા છે. પિંકી સાહુ તેનું શ્રેષ્ઠ ઉદાહરણ છે. પહેલા તે યુટ્યુબ પર માત્ર શોર્ટ વિડીયો બનાવતી હતી, પરંતુ વાયરલ થયા બાદ તે અત્યાર સુધી 7 ફિલ્મોમાં કામ કરી ચુકી છે.
ગામડાના આદિત્ય ભાગલે પણ યુટ્યુબથી ફિલ્મો સુધીની સફર કરી છે. તે મોટા બજેટની ફિલ્મ 'ખારૂન પાર'ની સ્ક્રિપ્ટ લખી રહ્યો છે.આનો લાભ મહિલાઓને પણ મળ્યો છે. જે મહિલાઓ પહેલા ઘર અને ખેતરો સુધી સીમિત હતી, તેઓ હવે યુટ્યુબ માટે પોતાના વીડિયો બનાવીને તેમની પ્રતિભાનું પ્રદર્શન કરી રહી છે. ગામમાં થઈ રહેલા આ બદલાવ અંગે પૂર્વ સરપંચ દ્રૌપદી વૈષ્ણવે બીબીસીને કહ્યું કે યુટ્યુબ દ્વારા સમાજમાં મોટો બદલાવ જોવા મળી રહ્યો છે. પહેલા મહિલાઓ તેમની વહુઓને દબાવતી હતી, પરંતુ હવે તેઓ તેમને આગળ વધવા માટે પ્રેરણા આપી રહી છે.
