ફિલ્મ ‘ધ કેરળ સ્ટોરી’ની નિર્માતા કંપનીનો આવી રહ્યો છે IPO,સેબી પાસે ફાઈલ કર્યા દસ્તાવેજો
Sunshine Pictures IPO: નિર્માતા અને દિગ્દર્શક વિપુલ અમૃતલાલ શાહની માલિકીના ફિલ્મ પ્રોડક્શન હાઉસ સનશાઈન પિક્ચર્સ લિમિટેડે IPO દ્વારા ભંડોળ ઊભું કરવા માટે સેબીમાં દસ્તાવેજો ફાઇલ કર્યા છે.
Sunshine Pictures IPO: વર્ષ 2025માં પણ IPO માર્કેટમાં હલચલ જોવા મળી રહી છે. આ વર્ષે મનોરંજન ઉદ્યોગની કંપનીઓ પણ IPO લઈને આવી રહી છે. આમાંથી એક આઈપીઓ સનશાઈન પિક્ચર્સ લિમિટેડનો હોઈ શકે છે. નિર્માતા અને દિગ્દર્શક વિપુલ અમૃતલાલ શાહની માલિકીના ફિલ્મ પ્રોડક્શન હાઉસ સનશાઈન પિક્ચર્સ લિમિટેડે આઈપીઓ દ્વારા ભંડોળ ઊભું કરવા માટે માર્કેટ રેગ્યુલેટર સેબી પાસે દસ્તાવેજો ફાઈલ કર્યા છે.
સિક્યોરિટીઝ એન્ડ એક્સચેન્જ બોર્ડ ઓફ ઈન્ડિયા (સેબી)માં ફાઈલ કરાયેલા દસ્તાવેજો અનુસાર, 83.75 લાખ શેરનો પ્રસ્તાવિત આઈપીઓ 50 લાખ નવા શેર અને 33.75 લાખ શેરની ઓફર ફોર સેલ (OFS)નું સંયોજન છે. પ્રમોટર વિપુલ અમૃતલાલ શાહ 23.69 લાખ શેર વેચવાની યોજના ધરાવે છે, જ્યારે શેફાલી વિપુલ શાહ 10.05 લાખ શેર વેચવાની યોજના ધરાવે છે.
સનશાઈન પિક્ચર્સ લિમિટેડ તેની લાંબા ગાળાની કાર્યકારી મૂડીની જરૂરિયાતોને પહોંચી વળવા IPOની આવકનો ઉપયોગ કરવાની યોજના ધરાવે છે. વધારાના રૂ. 94 કરોડનો ઉપયોગ અન્ય સામાન્ય કોર્પોરેટ હેતુઓ સાથે ભાવિ વૃદ્ધિ અને કામગીરીને ટેકો આપવા માટે કરવામાં આવશે. GYR કેપિટલ એડવાઈઝર્સ IPO ને હેન્ડલ કરવા માટે નિયુક્ત એકમાત્ર બુક રનિંગ લીડ મેનેજર હશે.
સનશાઈન પિક્ચર્સ એ જાણીતી પ્રોડક્શન કંપનીઓમાંની એક છે જે ફિલ્મો અને વેબ સિરીઝના નિર્માણ, વિકાસ, માર્કેટિંગ અને વિતરણના વ્યવસાય સાથે સંકળાયેલી છે. આ કંપનીના પોપ્યુલર પ્રોજેક્ટ્સની વાત કરીએ તો ધ કેરલા સ્ટોરી, કમાન્ડો, ફોર્સ, એક્શન રિપ્લે જેવી ફિલ્મો સામેલ છે. તમને જણાવી દઈએ કે કેરળ સ્ટોરી ને લઈને ઘણો વિવાદ થયો હતો. આ ફિલ્મનું નિર્માણ વિપુલ શાહે કર્યું છે. સનશાઈન પિક્ચર્સ પેનોરમા સ્ટુડિયો ઈન્ટરનેશનલ, બાવેજા સ્ટુડિયો અને બાલાજી ટેલિફિલ્મ્સ જેવી લિસ્ટેડ કંપનીઓ સાથે સ્પર્ધા કરશે.
સનશાઈન પિક્ચર્સ લિમિટેડ છેલ્લા ત્રણ નાણાકીય વર્ષ અને નાણાકીય વર્ષ 25 ના પ્રથમ છ મહિનામાં નફાકારક છે. તેનો નફો H1FY25માં રૂપિયા 45.64 કરોડ, FY24માં રૂપિયા 52.45 કરોડ, FY23માં રૂપિયા 2.31 કરોડ અને FY22માં રૂપિયા 11.2 કરોડ હતો. તેની કામગીરીમાંથી આવક FY24માં રૂ. 133.8 કરોડ, FY23માં રૂ. 26.51 કરોડ અને FY22માં રૂ. 87.13 કરોડ હતી, જ્યારે તેણે H1FY25માં રૂ. 39.02 કરોડની કમાણી કરી હતી.
