Rich Tennis Players: ફેડરર-નડાલને પાછળ છોડી સૌથી વધુ ગ્રાન્ડસ્લેમ જીતનાર ટેનિસનો મહાન ખેલાડી ‘નોવાક જોકોવિચ’
સર્બિયન સ્ટાર નોવાક જોકોવિચ ટેનિસ ઈતિહાસના સૌથી મહાન ખેલાડીઓમાં એક છે. રોજર ફેડરર અને રાફેલ નડાલ સાથે નોવાક જોકોવિચ ટેનિસના "બિગ થ્રી" ક્લબમાં સામેલ છે. જોકોવિચ સૌથી વધુ ગ્રાન્ડ સ્લેમ જીતનાર ટેનિસ ખેલાડી છે. સાથે જ તે ટેનિસમાં સૌથી વધુ પ્રાઇઝ મની જીતનાર ખેલાડી પણ છે. આ વર્ષે તે બે ગ્રાન્ડ સ્લેમ જીતી ચૂક્યો છે અને હવે તેની નજર વર્ષની અંતિમ ગ્રાન્ડ સ્લેમ યુએસ ઓપન પર છે.
જોકોવિચે તેની પ્રોફેશનલ કારકિર્દીની શરૂઆત 2003માં કરી હતી. જોકોવિચે ફાઇનલમાં નિકોલસ માસુને હરાવીને એક પણ સેટ ગુમાવ્યા વિના એમર્સફોર્ટમાં ડચ ઓપનમાં તેનું પ્રથમ ATP ટાઇટલ જીત્યું હતું.
જોકોવિચે વર્ષ 2008માં 20 વર્ષની ઉંમરે તેનું સૌપ્રથમ ગ્રાન્ડ સ્લેમ સિંગલ્સ ટાઇટલ જીત્યું હતું. ઓસ્ટ્રેલિયન ઓપન 2008ની ફાઇનલમાં જોકોવિચે બિનક્રમાંકિત ફ્રેન્ચ ખેલાડી જો-વિલ્ફ્રેડ સોંગાને ચાર સેટમાં હરાવી તેનું પ્રથમ ગ્રાન્ડ સ્લેમ સિંગલ્સ ટાઇટલ જીત્યું હતું.
સર્બિયાનું પ્રતિનિધિત્વ કરતા, જોકોવિચે નેશનલ ટેનિસ ટીમનું 2010માં પ્રથમ ડેવિસ કપ ટાઇટલ અને 2020માં પ્રારંભિક ATP કપ ટાઇટલ જીત્યું હતું. તેણે 2008 બેઇજિંગ ઓલિમ્પિકમાં પોતાના દેશ માટે બ્રોન્ઝ મેડલ પણ જીત્યો હતો.
વર્ષ 2023માં સર્બિયન ખેલાડીએ તેનું ત્રીજું ફ્રેન્ચ ઓપન અને ઓવરઓલ 23મું ગ્રાન્ડ સ્લેમ ટાઈટલ જીતી ઇતિહાસ રચ્યો હતો. આ ટાઈટલ સાથે જ નોવાક જોકોવિચ સૌથી વધુ ગ્રાન્ડ સ્લેમ જીતવાના મામલે સ્પેનના રાફેલ નડાલને પાછળ છોડી દીધો હતો.
નોવાક જોકોવિચે સૌથી વધુ 23 ગ્રાન્ડ સ્લેમ સિંગલ્સ ટાઇટલ જીત્યા છે, જેમાં 3 વાર ફ્રેન્ચ ઓપન, 6 વખત વિમ્બલ્ડન, યુએસ ઓપન 4 વાર અને ઓસ્ટ્રેલિયન ઓપનનો રેકોર્ડ 10 વખત જીત્યા છે.
પ્રાઇઝ મનીથી કમાણી મામલે નોવાક જોકોવિચ વિશ્વનો સૌથી અમીર ખેલાડી છે. તે ટેનિસમાં સૌથી વધુ ગ્રાન્ડસ્લેમ અને સૌથી વધુ પ્રાઇઝ મની જીતવા મામલે ટોપ પર છે. નોવાક જોકોવિચે રેકોર્ડ 1400 કરોડ રૂપિયાથી વધુ પ્રાઇઝ મની જીતી છે.
જોકોવિચ જેલેના રિસ્ટિકને હાઈસ્કૂલમાં મળ્યો હતો અને 2005માં તેની સાથે ડેટિંગ કરવાનું શરૂ કર્યું હતું. સપ્ટેમ્બર 2013માં બંનેએ સગાઈ કરી હતી અને 10 જુલાઈ 2014ના રોજ બંનેએ લગ્ન કર્યા હતા. આ દંપતીને બે બાળકો છે. તેમના પુત્રનો જન્મ ઓક્ટોબર 2014માં અને પુત્રીનો જન્મ 2017માં થયો હતો. (all photo courtesy: google)
