Paris Olympics 2024 માં મોટો હંગામો, સીન નદીમાં સ્વિમિંગ બાદ એથ્લેટ બીમાર પડતાં આખી ટીમ બહાર ફેંકાઈ
પેરિસ ઓલિમ્પિકમાં વિવાદો ચાલુ છે. બેલ્જિયન એથ્લેટ ક્લેર મિશેલ પેરિસની સીન નદીમાં સ્વિમિંગ કર્યા પછી બીમાર થઈ ગઈ, જેના પછી તેની આખી ટીમને રિલે ટ્રાયથલોનમાંથી ખસી જવું પડ્યું હતું.
પેરિસ ઓલિમ્પિકમાં વધુ એક મોટો વિવાદ સામે આવ્યો છે. વાસ્તવમાં, બેલ્જિયમની એક ખેલાડી સીન નદીમાં સ્વિમિંગ કર્યા પછી બીમાર પડી ગઈ હતી, જેના કારણે તેની ટીમ પેરિસ ઓલિમ્પિક ગેમ્સની મિક્સ રિલે ટ્રાયથલોનમાંથી ખસી ગઈ હતી.
બેલ્જિયમ ઓલિમ્પિક સમિતિએ કહ્યું કે બુધવારે મહિલા ટ્રાયથલોનમાં ભાગ લેનાર તેમની ખેલાડી ક્લેર મિશેલ બીમાર પડી ગઈ છે, જેના કારણે તેની ટીમે હવે રિલે ટ્રાયથલોનમાંથી ખસી જવું પડ્યું છે.
35 વર્ષની ખેલાડી મિશેલે યુરોપિયન ચેમ્પિયનશિપ અને વર્લ્ડ ચેમ્પિયનશિપમાં બેલ્જિયમ માટે મેડલ જીત્યા છે. તેની માતાએ પણ 1976માં ઓલિમ્પિકમાં ભાગ લીધો હતો, તે પણ સ્વિમર હતી.
પેરિસ ઓલિમ્પિક ગેમ્સના આયોજકોએ મિશેલની બીમારી અંગે તાત્કાલિક કોઈ નિવેદન જારી કર્યું નથી, પરંતુ આયોજક સમિતિએ કહ્યું છે કે સીન નદીમાં સ્પર્ધા પૂર્વનિર્ધારિત સમયપત્રક મુજબ થશે.
સીન નદીના પાણીની ગુણવત્તા પર શરૂઆતથી જ ચિંતા વ્યક્ત કરવામાં આવી રહી છે. આ કારણોસર પ્રથમ ટ્રાયથલોન પ્રેક્ટિસ સત્રો રદ્દ કરવા પડ્યા હતા.