ભારતે ચેમ્પિયન્સ ટ્રોફીનો જીત્યો ખિતાબ, ફાઈનલમાં ચીનને 1-0થી હરાવ્યું
ભારતીય મહિલા હોકી ટીમે ચીનને હરાવી એશિયન ચેમ્પિયન્સ ટ્રોફી 2024નો ખિતાબ જીત્યો. આ ફાઈનલ મેચમાં ભારતીય મહિલા હોકી ટીમનો 1-0થી વિજય થયો હતો. ભારત માટે દીપિકાએ આ ગોલ કર્યો હતો. આ સાથે ભારત ત્રીજી વખત આ ટુર્નામેન્ટનું ટાઇટલ જીતવામાં સફળ રહ્યું હતું.
એશિયન ચેમ્પિયન્સ ટ્રોફીની ફાઈનલ મેચ ભારતીય મહિલા હોકી ટીમ અને ચીનની મહિલા હોકી ટીમ વચ્ચે રમાઈ હતી. બિહારના રાજગીર સ્ટેડિયમમાં રમાયેલી આ મેચમાં ભારતીય ટીમે જીત મેળવી અને ત્રીજી વખત એશિયન ચેમ્પિયન્સ ટ્રોફીનો ખિતાબ પોતાના નામે કર્યો હતો. સલીમા ટેટેના નેતૃત્વમાં ભારતીય ટીમે આ મેચમાં ચીનને 1-0થી હરાવ્યું હતું. આ મેચમાં દીપિકા ભારતીય ટીમની જીતની હીરો હતી, તેણે એકમાત્ર ગોલ કર્યો હતો.
ભારત અને ચીન વચ્ચે રમાયેલી ફાઈનલ મેચમાં પ્રથમ બે ક્વાર્ટર ગોલ રહિત રહ્યા હતા એટલે કે હાફ ટાઈમ સુધી કોઈ ટીમ ગોલ કરી શકી ન હતી. પ્રથમ હાફમાં ભારતને ચાર પેનલ્ટી કોર્નર મળ્યા, જ્યારે ચીનને બે પેનલ્ટી કોર્નર મળ્યા. જોકે, બંને ટીમો તેનો ફાયદો ઉઠાવવામાં નિષ્ફળ રહી હતી. આ પછી ભારતની દીપિકા ત્રીજા ક્વાર્ટરની શરૂઆતમાં ગોલ કરવામાં સફળ રહી હતી.
આ મેચ પહેલા ચીનની ટીમ ભારતીય ટીમ કરતા હેડ ટુ હેડ આંકડામાં ઘણી આગળ હતી. પરંતુ ફાઈનલ મેચમાં ભારતીય ટીમનો દબદબો રહ્યો હતો. ભારતે આ મેચમાં પોતાની તમામ મેચ જીતીને ટાઈટલ પર કબજો કર્યો હતો. ભારતીય ટીમે સેમીફાઈનલમાં જાપાન સામે 3-0થી જીત મેળવીને ફાઈનલમાં પ્રવેશ કર્યો હતો. આ સિવાય લીગ સ્ટેજ દરમિયાન પણ ભારત સામે ચીનનો 3-0થી પરાજય થયો હતો.
આ ત્રીજી વખત છે જ્યારે ભારતીય મહિલા હોકી ટીમે એશિયન ચેમ્પિયન્સ ટ્રોફીનો ખિતાબ જીત્યો છે. આ પહેલા ભારતે 2016 અને 2023માં પણ જીત મેળવી હતી. 2016માં પણ ભારતે ફાઈનલમાં ચીનને હરાવ્યું હતું અને 2023માં ભારતે જાપાનને હરાવ્યું હતું.
આ ટૂર્નામેન્ટ પહેલા જ સલીમા ટેટેને ભારતીય ટીમની કેપ્ટન બનાવવામાં આવી હતી. સુકાની તરીકેની પ્રથમ ટુર્નામેન્ટ સલીમા ટેટે માટે ખૂબ જ સફળ રહી હતી અને તે ટાઈટલ જીતવામાં સફળ રહી હતી. આ મેચમાં ચીને ગોલ કરવાનો ઘણો પ્રયાસ કર્યો હતો, પરંતુ તે એક પણ ગોલ કરી શક્યું ન હતું. (All Photo Credit : PTI)
Published On - 7:25 pm, Wed, 20 November 24