FIFA વર્લ્ડ કપમાં રોનાલ્ડોના નામે નોંધાયો શરમજનક રેકોર્ડ, 60 વર્ષમાં પ્રથમ વખત બન્યું આવું
ક્રિસ્ટિયાનો રોનાલ્ડો માટે FIFA વર્લ્ડ કપ 2026 નિરાશાજનક અંત સાથે પૂર્ણ થયો. તેણે ગોલ કર્યા અને સતત હુમલા કર્યા, પરંતુ એક અનોખા આંકડાએ બધાનું ધ્યાન ખેંચ્યું. 60 વર્ષના વર્લ્ડ કપ ઈતિહાસમાં પ્રથમ વખત તેના નામે એવો રેકોર્ડ નોંધાયો છે, જે તેની રમત પર નવા સવાલો ઊભા કરે છે.
FIFA વર્લ્ડ કપ 2026માં પોર્ટુગલના દિગ્ગજ સ્ટાર ક્રિસ્ટિયાનો રોનાલ્ડોની સફર રાઉન્ડ ઓફ-16 માં સ્પેન સામે હાર સાથે સમાપ્ત થઈ હતી. ટૂર્નામેન્ટમાં તેણે ચાર મેચમાં કુલ 17 શોટ ફટકાર્યા અને ત્રણ ગોલ પણ નોંધાવ્યા, પરંતુ એક ખાસ આંકડાએ સૌને ચોંકાવી દીધા.
આ ટૂર્નામેન્ટ દરમિયાન રોનાલ્ડોએ પોતાના કોઈપણ સાથી ખેલાડી માટે એક પણ ગોલ કરવાની તક (key pass) બનાવી નહોતી. 1966 થી વર્લ્ડ કપના આંકડા નોંધાવાના શરૂ થયા ત્યારથી એક વર્લ્ડ કપમાં સૌથી વધુ શોટ લઈને એક પણ તક ન બનાવનાર ખેલાડી તરીકે રોનાલ્ડોએ અનિચ્છનીય રેકોર્ડ પોતાના નામે કર્યો.
આ પહેલા આ રેકોર્ડ મેક્સિકોના આલ્બર્ટો ગાર્સિયા એસ્પે (15 શોટ, 1998) ના નામે હતો. ઉપરાંત પોલેન્ડના જેર્ઝી ગોર્ગન, દક્ષિણ આફ્રિકાના કેટલેગો મ્ફેલા અને રશિયાના ડેનિસ ચેરીશેવે પણ આવું જ કર્યું હતું, પરંતુ રોનાલ્ડોએ 17 શોટ સાથે તમામને પાછળ છોડી દીધા.
રોનાલ્ડોના 17 શોટમાંથી ત્રણ ગોલ આવ્યા, જે ખરાબ પ્રદર્શન કહી શકાય નહીં. છતાં, ટીમ માટે ગોલની તક સર્જવામાં નિષ્ફળ રહેવું એ દર્શાવે છે કે 41 વર્ષની ઉંમરે હવે તેની રમત પહેલાની જેમ ટીમને જોડતી રહી નથી.
પોર્ટુગલના કોચ રોબર્ટો માર્ટિનેઝે જોકે રોનાલ્ડોનો બચાવ કર્યો હતો. તેમના મતે રોનાલ્ડોની હાજરી ડિફેન્ડરોનું ધ્યાન ખેંચતી હોવાથી અન્ય ખેલાડીઓને જગ્યા મળતી હતી. તેમ છતાં, આંકડાઓએ વર્લ્ડ કપ 2026માં રોનાલ્ડોની ભૂમિકાને લઈને નવી ચર્ચા શરૂ કરી દીધી છે. (PC-PTI/GETTY/X)
