Breaking News: એશા સિંહનો ગોલ્ડન શોટ, મનુ ભાકરે જીત્યો બ્રોન્ઝ, શૂટિંગ વર્લ્ડ કપમાં ભારતનો ડબલ ધમાકો
ISSF Shooting World Cup: ચીનમાં ચાલી રહેલા શૂટિંગ વર્લ્ડ કપમાં ભારતીય મહિલા શૂટર્સ એશા સિંહ અને મનુ ભાકરે શાનદાર પ્રદર્શન કર્યું હતું. 25 મીટર પિસ્તોલ ઈવેન્ટમાં ઓલિમ્પિક મેડલિસ્ટ મનુ ભાકરે બ્રોન્ઝ મેડલ જીત્યો હતો, જ્યારે એશા સિંહે ગોલ્ડ મેડલ જીતી ઈતિહાસ રચ્યો હતો.
ચીનમાં ચાલી રહેલા શૂટિંગ વર્લ્ડ કપમાં ભારતે મહિલાઓની 25 મીટર પિસ્તોલ ઈવેન્ટમાં ડબલ પોડિયમ ફિનિશ હાંસલ કરીને ગોલ્ડ અને બ્રોન્ઝ મેડલ જીત્યા હતા.
એશા સિંહે 25 મીટર પિસ્તોલ ઇવેન્ટમાં ગોલ્ડ મેડલ જીત્યો હતો. એશા સિંહે ફાઇનલમાં 50 માંથી 40 સ્કોર કર્યા હતા. સિલ્વર મેડલ ચીનની યુયુ ઝાંગને મળ્યો હતો, જેણે 50 માંથી 37 સ્કોર કર્યા હતા. જ્યારે ડબલ ઓલિમ્પિક મેડલ વિજેતા મનુ ભાકરે બ્રોન્ઝ મેડલ જીત્યો હતો.
મનુ ભાકરે 586 પોઈન્ટ સાથે પાંચમા સ્થાને રહીને ફાઇનલ માટે ક્વોલિફાય કર્યું હતું. એશા સિંહ 585 પોઈન્ટ સાથે ક્વોલિફાય રાઉન્ડમાં સાતમા સ્થાને રહી હતી.
એશા સિંહ છેલ્લા બે વર્ષથી સતત સારું પ્રદર્શન કરી રહી છે. આ વર્ષની શરૂઆતમાં તેણીએ 25 મીટર પિસ્તોલ ઈવેન્ટમાં વિશ્વ રેકોર્ડ બનાવ્યો હતો અને હવે શૂટિંગ વર્લ્ડ કપમાં ગોલ્ડ મેડલ જીત્યો હતો. આ સફળતાએ 2028 ઓલિમ્પિકમાં તેના મેડલની આશાઓ વધારી દીધી છે.
ચીનના હાંગઝોઉમાં ચાલી રહેલા ISSF વર્લ્ડ કપમાં ભારત હવે મેડલ ટેલીમાં બીજા સ્થાને પહોંચી ગયું છે. ભારત પાસે હવે છ ગોલ્ડ મેડલ છે. એશા સિંહે ભારતના બીજા સ્થાને રહેવામાં મુખ્ય ભૂમિકા ભજવી હતી. ભારતે અત્યારસુધી 14 મેડલ જીત્યા છે જેમાંથી ચાર મેડલ એશાએ જીત્યા છે. એશાએ પોતાની બંદૂકથી એક ગોલ્ડ, બે સિલ્વર અને એક બ્રોન્ઝ ચાર મેડલ જીત્યા છે. (PC: X)
