FIFA World Cup 2026: કોઈ એન્જિનિયર તો કોઈ ડબલ ગ્રેજ્યુએટ, આ છે વિશ્વના સૌથી શિક્ષિત 5 ફૂટબોલર
ફૂટબોલરોને સામાન્ય રીતે તેમની રમત માટે ઓળખવામાં આવે છે, પરંતુ કેટલાક ખેલાડીઓ એવા પણ છે જેમણે શિક્ષણ ક્ષેત્રે પણ મોટી સિદ્ધિઓ હાંસલ કરી છે. ડબલ ગ્રેજ્યુએટ, માસ્ટર ડિગ્રી અને એન્જિનિયરિંગ જેવા અભ્યાસ સાથે આ ખેલાડીઓએ સાબિત કર્યું છે કે મેદાનની બહાર પણ તેઓ એટલા જ સફળ છે જેટલા મેદાન પર.
FIFA વર્લ્ડ કપ દરમિયાન દુનિયાભરના સ્ટાર ખેલાડીઓ ચર્ચામાં રહે છે. જોકે, કેટલાક ફૂટબોલરો એવા પણ છે જેમણે માત્ર પોતાની રમતથી જ નહીં, પરંતુ શિક્ષણ ક્ષેત્રે પણ વિશેષ ઓળખ બનાવી છે. આ ખેલાડીઓએ ઉચ્ચ શિક્ષણ મેળવીને યુવા પેઢી માટે પ્રેરણાદાયક ઉદાહરણ પૂરું પાડ્યું છે.
સ્પેનના દિગ્ગજ મિડફિલ્ડર જુઆન માતા આ યાદીમાં સામેલ છે. માન્ચેસ્ટર યુનાઇટેડ અને ચેલ્સી માટે રમેલા માતા પાસે માર્કેટિંગમાં સ્નાતક ડિગ્રી ઉપરાંત રમતગમત વિજ્ઞાનમાં પણ ડિગ્રી છે. ફૂટબોલ સાથે અભ્યાસને સંતુલિત રાખવાની તેમની ક્ષમતા પ્રશંસનીય માનવામાં આવે છે.
બેલ્જિયમના પૂર્વ કેપ્ટન વિન્સેન્ટ કોમ્પેની પણ શિક્ષણ ક્ષેત્રે પાછળ નથી. તેમણે એલાયન્સ માન્ચેસ્ટર બિઝનેસ સ્કૂલમાંથી બિઝનેસ એડમિનિસ્ટ્રેશનમાં માસ્ટર ડિગ્રી મેળવી છે. હાલમાં તેઓ વિશ્વના જાણીતા ફૂટબોલ કોચમાંના એક તરીકે ઓળખાય છે.
ઇટાલીના જ્યોર્જિયો ચિએલિનીએ અર્થશાસ્ત્ર અને વાણિજ્યમાં સ્નાતક ડિગ્રી મેળવ્યા બાદ બિઝનેસ એડમિનિસ્ટ્રેશનમાં માસ્ટર ડિગ્રી પણ હાંસલ કરી હતી. બીજી તરફ, ભૂતપૂર્વ ગોલકીપર શાકા હિસ્લોપ હાર્વર્ડ યુનિવર્સિટીમાંથી મિકેનિકલ એન્જિનિયરિંગની ડિગ્રી ધરાવે છે, જે તેમને આ યાદીમાં વિશેષ સ્થાન અપાવે છે.
આ યાદીમાં અંગ્રેજી ફૂટબોલર ડંકન વોટમોરનું નામ પણ સામેલ છે. તેમણે ન્યૂકેસલ યુનિવર્સિટીમાંથી અર્થશાસ્ત્ર અને વ્યવસાય વ્યવસ્થાપનમાં પ્રથમ શ્રેણીની ડિગ્રી મેળવી હતી. આ તમામ ખેલાડીઓએ સાબિત કર્યું છે કે રમત અને શિક્ષણ એકસાથે આગળ વધી શકે છે અને સફળતા મેળવવા માટે બંનેનું મહત્વ સમાન છે. (PC:X/FIFA)
