Breaking News: નાના કદની લોકોએ ઉડાવી મજાક, પિતાએ બનાવ્યો બોક્સર, હવે Asian Games 2026માં જીત્યો ગોલ્ડ
ભારતીય બોક્સર અંકુશ પંઘાલે એશિયન ગેમ્સ 2026માં 80 કિગ્રા કેટેગરીમાં ગોલ્ડ મેડલ જીતીને શાનદાર શરૂઆત કરી છે. એક સમયે નાના કદને કારણે તેની મજાક ઉડાવવામાં આવતી હતી અને તેના પિતાએ તેને કબડ્ડી છોડીને બોક્સિંગ અપનાવવા માટે પ્રોત્સાહિત કર્યો હતો. મુશ્કેલીઓ અને નિષ્ફળતાઓને પાછળ છોડીને અંકુશે હવે એશિયન ગેમ્સમાં દેશનું ગૌરવ વધાર્યું છે.
અંકુશ પંઘાલે એશિયન ગેમ્સમાં પોતાના ડેબ્યૂમાં જ ગોલ્ડ મેડલ જીતીને મોટી સિદ્ધિ મેળવી છે. 80 કિગ્રા વર્ગની ફાઇનલમાં તેણે દક્ષિણ કોરિયાના કિમ મિન્સેઓંગને 4-0થી હરાવ્યો.
મુકાબલાની શરૂઆતથી જ અંકુશે આક્રમક રમત બતાવી હતી. તેણે કોરિયન બોક્સરને સતત દબાણમાં રાખ્યો અને સમગ્ર મુકાબલા દરમિયાન પોતાનું વર્ચસ્વ જાળવી રાખ્યું.
અંકુશની સફર જોકે સરળ રહી નહોતી. તે બાળપણમાં કબડ્ડી રમતો હતો અને રાજ્ય સ્તર સુધી પહોંચ્યો હતો. જોકે, 11 વર્ષની ઉંમરે તેના પિતાએ તેને કબડ્ડી છોડીને બોક્સિંગ તરફ વળવા માટે પ્રેરિત કર્યો.
હિસારના ગંગવા ગામની સરકારી શાળામાં અંકુશે કોચ પ્રદીપ સાવંત પાસેથી બોક્સિંગની શરૂઆતની તાલીમ મેળવી હતી. તાલીમ માટે યોગ્ય રિંગ પણ નહોતી, તેથી તે ખુલ્લા મેદાનમાં પ્રેક્ટિસ કરતો હતો.
નાના કદને કારણે ગામના લોકો ઘણીવાર તેની મજાક ઉડાવતા હતા. 2018માં રાજ્ય ચેમ્પિયનશિપની ફાઇનલમાં હાર્યા બાદ તો અંકુશે બોક્સિંગ છોડવાનો નિર્ણય પણ લઈ લીધો હતો.
જોકે, તેના પિતા અને કોચે તેને હાર ન માનવા સમજાવ્યો અને ફરી રિંગમાં ઉતાર્યો. ત્યારબાદ અંકુશે સતત મહેનત કરી અને પોતાની રમતને નવી ઊંચાઈએ પહોંચાડી.
આ વર્ષે અંકુશે ગ્રાન્ડ પ્રિકસ ઉસ્તી નાદ લેબેમમાં પણ ગોલ્ડ મેડલ જીત્યો હતો. કોમનવેલ્થ ગેમ્સમાં પણ તેણે 80 કિગ્રા કેટેગરીમાં ઇંગ્લેન્ડના ડિમેઝી શિટ્ટુને 4-1થી હરાવી ગોલ્ડ જીત્યો હતો. કોમનવેલ્થ ગેમ્સના મુકાબલામાં 0-5થી પાછળ રહ્યા બાદ અંકુશે શાનદાર વાપસી કરી હતી.
હવે એશિયન ગેમ્સમાં ગોલ્ડ મેડલ સાથે તેણે સાબિત કર્યું છે કે સંઘર્ષમાંથી નીકળેલો આ બોક્સર ભારતીય બોક્સિંગનું મોટું નામ બની શકે છે. (PC:PTI/X)
Published On - 4:33 pm, Fri, 2 October 26
