Breaking News: 11 વર્ષની ઉંમરે માતા-પિતાને ગુમાવ્યા, હવે Asian Games 2026માં જીત્યો ગોલ્ડ મેડલ
એશિયન ગેમ્સ 2026માં ભારતીય કુસ્તીબાજ અમન સેહરાવતે પુરુષોની 57 કિગ્રા ફ્રીસ્ટાઇલ કેટેગરીમાં ગોલ્ડ મેડલ જીતીને ઇતિહાસ રચ્યો છે. પેરિસ ઓલિમ્પિકના બ્રોન્ઝ મેડલ વિજેતા અમને ફાઇનલમાં વર્તમાન વિશ્વ ચેમ્પિયન હાન ચોંગ-સોંગને 11-7થી હરાવ્યો. માત્ર 11 વર્ષની ઉંમરે માતા-પિતા ગુમાવનાર અમનની સફર સંઘર્ષ અને સફળતાથી ભરેલી છે.
અમન સેહરાવતે એશિયન ગેમ્સમાં સતત બીજી વખત મેડલ જીત્યો છે. અગાઉ હાંગઝોઉ એશિયન ગેમ્સમાં તેણે આ જ કેટેગરીમાં બ્રોન્ઝ મેડલ જીત્યો હતો.
નાગોયામાં રમાયેલી ફાઇનલમાં અમન અને હાન ચોંગ-સોંગ વચ્ચે શરૂઆતથી જ જોરદાર મુકાબલો જોવા મળ્યો હતો. અમને શરૂઆતમાં લીડ મેળવીને પોતાના ઇરાદા સ્પષ્ટ કરી દીધા હતા.
એક સમયે અમને 6-1ની મજબૂત લીડ મેળવી લીધી હતી. જોકે, ઉત્તર કોરિયાના વિશ્વ ચેમ્પિયને વાપસી કરતા મેચ રોમાંચક બની ગઈ હતી અને તેણે અમન સામે અચાનક લીડ મેળવી હતી.
મેચમાં એક મિનિટથી પણ ઓછો સમય બાકી હતો ત્યારે અમને શાનદાર વાપસી કરી હતી. ભારતીય કુસ્તીબાજે ચોંગ-સોંગને મેટ પર નિયંત્રિત કરીને સતત પોઈન્ટ મેળવ્યા અને 11-7થી ફાઇનલ જીતી લીધી.
આ ગોલ્ડ સાથે વર્તમાન એશિયન ગેમ્સમાં ફ્રીસ્ટાઇલ કુસ્તીમાં ભારતનો આ બીજો ગોલ્ડ મેડલ છે. સુજીત કલ્કલ પણ પોતાની કેટેગરીમાં ગોલ્ડ મેડલ જીતી ચૂક્યો છે.
અમન સેહરાવતનો જન્મ 16 જુલાઈ, 2003ના રોજ હરિયાણાના ઝજ્જર જિલ્લાના બિરોહાડ ગામમાં થયો હતો. 2012ના લંડન ઓલિમ્પિકમાં સુશીલ કુમારના પ્રદર્શનથી પ્રેરાઈને તે માત્ર 10 વર્ષની ઉંમરે દિલ્હીના છત્રસાલ સ્ટેડિયમ પહોંચ્યો હતો.
જોકે, 11 વર્ષની ઉંમરે અમને પોતાના માતા-પિતા ગુમાવ્યા હતા. ત્યારબાદ તેના કાકા સુધીર અને પરિવારે તેની તથા તેની નાની બહેન પૂજાની જવાબદારી સંભાળી. અમને કોચ લલિત કુમારના માર્ગદર્શન હેઠળ કુસ્તી પર ધ્યાન કેન્દ્રિત કર્યું.
માતા-પિતાને ગુમાવ્યા બાદના મુશ્કેલ સમયમાંથી બહાર આવીને અમને રમતને પોતાની તાકાત બનાવી. પેરિસ 2024માં બ્રોન્ઝ મેડલ જીત્યા બાદ હવે એશિયન ગેમ્સમાં ગોલ્ડ જીતીને તેણે પોતાની કારકિર્દીમાં વધુ એક મોટી સિદ્ધિ ઉમેરી છે. (PC:PTI/X)
Published On - 3:57 pm, Sat, 3 October 26
