Breaking News: પુણેના 18 વર્ષના છોકરાએ રચ્યો ઈતિહાસ, 36 વર્ષ પછી કોઈ ભારતીયે વિમ્બલ્ડનમાં કર્યો આ કમાલ
પુણેનો 18 વર્ષીય અર્ણવ પાપરકર થોડા અઠવાડિયા પહેલા જ ફ્રેન્ચ ઓપન જુનિયર્સના ત્રીજા રાઉન્ડમાં પહોંચ્યો હતો. પરંતુ વિમ્બલ્ડન જુનિયર્સમાં તેણે ક્વાર્ટર ફાઈનલમાં પહોંચીને કમાલ કર્યો છે. તે 36 વર્ષમાં વિમ્બલ્ડન જુનિયર બોયઝ સિંગલ્સની ક્વાર્ટર ફાઈનલમાં પહોંચનાર પ્રથમ ભારતીય ખેલાડી બન્યો છે.
છેલ્લા કેટલાક સમયથી ટેનિસ કોર્ટ પરથી ભારત માટે કોઈ સારા સમાચાર નથી. જોકે, ઉભરતા ભારતીય ટેનિસ ખેલાડી અર્ણવ પાપારકરે વિમ્બલ્ડન 2026 માં જુનિયર બોયઝ સિંગલ્સના ક્વાર્ટર ફાઈનલમાં પહોંચીને ટેનિસ ચાહકોને આનંદના સમાચાર આપ્યા છે.
18 વર્ષનો અર્ણવ 36 વર્ષમાં વિમ્બલ્ડન જુનિયર બોયઝ સિંગલ્સની ક્વાર્ટર ફાઈનલમાં પહોંચનાર પ્રથમ ભારતીય ખેલાડી બન્યો. અર્ણવ પહેલા, લિએન્ડર પેસે 1990 માં આ સિદ્ધિ મેળવી હતી.
અર્ણવે અત્યાર સુધી ટુર્નામેન્ટમાં એક પણ સેટ ગુમાવ્યો નથી અને અંતિમ આઠમાં આગળ વધવા માટે સતત મજબૂત રમત રમી છે. તેના પ્રી-ક્વાર્ટર ફાઈનલ મેચમાં અર્ણવે જાપાનના ર્યો તાબાતાને ફક્ત 52 મિનિટમાં સીધા સેટોમાં 6-2, 6-1 થી હરાવ્યો હતો.
વધુમાં, ટુર્નામેન્ટના બીજા રાઉન્ડમાં તેણે જુનિયર વર્લ્ડ નંબર 3 અને ઓસ્ટ્રેલિયન ઓપન જુનિયર ફાઈનલિસ્ટ કીટન હેન્સ (USA) ને 6-2, 6-3 થી હરાવીને સૌથી મોટો અપસેટ સર્જ્યો. આ સિલસિલો ચાલુ રાખતા, તે હવે ક્વાર્ટર ફાઈનલમાં પહોંચી ગયો છે, જ્યાં તેનો સામનો યુનાઈટેડ સ્ટેટ્સના જોર્ડન લી સામે થશે.
આશરે 6 ફૂટ 1 ઇંચ ઉંચો અર્ણવ તેની પાવરફુલ સર્વિસ માટે જાણીતો છે અને ઘણીવાર એસ ફટકારીને પોઈન્ટ જીતે છે. માત્ર 6 વર્ષની ઉંમરે ટેનિસ રમવાનું શરૂ કરનાર અર્ણવ આ વર્ષે ફ્રેન્ચ ઓપન જુનિયરના ત્રીજા રાઉન્ડમાં પહોંચ્યો હતો. (PC: Getty Images)
