Rich Tennis Players : ફેડરર-નડાલ-જોકોવિચના યુગમાં બે ઓલિમ્પિક ગોલ્ડ જીતનાર વિશ્વનો એકમાત્ર ખેલાડી ‘એન્ડી મરે’
રોજર ફેડરર, રાફેલ નડાલ અને નોવાક જોકોવિચ જેવા મહાન ખેલાડીઓના યુગમાં દમદાર રમત અને લડાયક અંદાજથી ટેનિસમાં પોતાનું અલગ સ્થાન હાંસલ કરનાર ખેલાડીઓમાં એક છે 'એન્ડી મરે'. કારકિર્દીમાં બે ઓલિમ્પિક ગોલ્ડ મેડલ જીતનાર તે વિશ્વનો એકમાત્ર ટેનિસ ખેલાડી છે. એન્ડી મરેએ બે વિમ્બલડન અને એક યુએસ ઓપન સહિત ત્રણ ગ્રાન્ડસ્લેમ, 14 માસ્ટર્સ 1000 ઇવેન્ટ સહિત કુલ 46 ATP ટૂર સિંગલ્સ ટાઇટલ જીત્યા હતા.
એન્ડી મરેનો જન્મ 15 મે 1987ના રોજ ગ્લાસગો, સ્કોટલેન્ડમાં થયો હતો. તે જુડી મરે અને વિલિયમ મુરેનો પુત્ર હતો. તેના દાદા રોય એર્સ્કિન પ્રોફેશનલ ફૂટબોલર હતા અને તેની માતા જુડી મરે ટેનિસ કોચ છે.
સ્કોટિશ-બ્રિટિશ ટેનિસ ખેલાડી એન્ડી મરે 2010 થી 2020 દરમિયાન ટેનિસના સૌથી મોટા ખેલાડીઓમાંનો એક હતો, તેણે ત્રણ ગ્રાન્ડ સ્લેમ ટાઇટલ અને બે પુરૂષ સિંગલ્સ ઓલિમ્પિક ગોલ્ડ મેડલ જીત્યા હતા.
મરેએ વર્ષ 2004માં જુનિયર યુ.એસ. ઓપનમાં તેનું પ્રથમ ટાઇટલ જીત્યું હતું. એપ્રિલ 2007માં વિશ્વના ટોચના 10 અને બે વર્ષ પછી ટોચના 4 ટેનિસ ખેલાડીઓમાં તેણે સ્થાન મેળવ્યું હતું.
મરે 2008 અને 2012 ની વચ્ચે ચાર ગ્રાન્ડ સ્લેમ ફાઇનલમાં હારી ગયો હતો. મરેને સફળતા ઓગસ્ટ 2012માં મળી, જ્યારે તેણે છેલ્લે લંડન ઓલિમ્પિક ગેમ્સમાં મેન્સ સિંગલ્સમાં ગોલ્ડ મેડલ જીત્યો હતો. ફાઇનલમાં મરેએ ફેડરરને વિમ્બલ્ડનની સેન્ટર કોર્ટ પર હરાવી ગોલ્ડ મેડલ જીત્યો હતો.
2012માં લંડન ઓલિમ્પિક ગેમ્સના માંડ એક મહિના પછી યુ.એસ. ઓપનમાં તેણે જોકોવિચને ફાઈનલમાં હરાવી તેનું સૌપ્રથમ ગ્રાન્ડ સ્લેમ ટાઈટલ જીત્યું હતું.
જુલાઈ 2013માં મરેએ વિમ્બલ્ડનની ફાઇનલમાં એકતરફી મુકાબલામાં જોકોવિચને હરાવી પહેલું વિમ્બલ્ડન અને બીજું ગ્રાન્ડસ્લેમ ટાઈટલ જીત્યું હતું. ફ્રેડ પેરી (77 વર્ષ ) બાદ વિમ્બલ્ડન પુરૂષ સિંગલ્સ ટાઇટલ જીતનાર પ્રથમ બ્રિટિશ ખેલાડી બન્યો હતો.
2016માં જુલાઈમાં મરે તેનું બીજું વિમ્બલ્ડન મેન્સ સિંગલ ટાઇટલ અને ત્રીજું ગ્રાન્ડસ્લેમ જીત્યો હતો. જે તેનું અંતિમ ગ્રાન્ડસ્લેમ પણ સાબિત થયું હતું. ઓગષ્ટમાં રિયો ડી જાનેરો ઓલિમ્પિક ગેમ્સમાં તેણે પુરુષોની સિંગલ્સ ટેનિસમાં બીજો ગોલ્ડ મેડલ જીત્યો હતો.
મરેને 2013માં ઓફિસર ઓફ ધ ઓર્ડર ઓફ ધ બ્રિટીશ એમ્પાયર (OBE) બનાવવામાં આવ્યો હતો અને 2017ના નવા વર્ષની ઓનર્સની યાદીમાં તેને નાઈટહુડથી નવાજવામાં આવ્યો હતો.
મરેએ 2005માં ખેલાડીમાંથી કોચ બનેલા નિગેલ સીઅર્સની પુત્રી કિમ સીઅર્સ સાથે ડેટિંગ કરવાનું શરૂ કર્યું. નવેમ્બર 2014માં તેમની સગાઈની થઈ હતી, જ્યારે 11 એપ્રિલ 2015ના રોજ ડનબ્લેન કેથેડ્રલમાં તેમના લગ્ન થયા હતા. બંનેને એક પુત્ર અને ત્રણ પુત્રીઓ છે.
એન્ડી મરે ટેનિસ ઇતિહાસમાં સૌથી વધુ પ્રાઇઝ મની જીતવા મામલે ચોથા ક્રમે છે. મરેએ તેની કારકિર્દીમાં 530 કરોડથી વધુ પ્રાઇઝ મની જીતી છે. આ સિવાય એન્ડોર્સમેન્ટથી પણ તે કરોડોની કમાણી કરે છે. (all photo courtesy: google)