વિરોધીઓનો ખાત્મો કરનાર Vladimir Putin આ મહિલા સામે ઝુક્યા, જુઓ.. કોણ છે રશિયન સત્તાની શાંતિ હલાવનાર આ મોડેલ?
રશિયામાં સામાન્ય રીતે વિરોધ દબાવવામાં આવે છે, ત્યારે મોડેલ વિક્ટોરિયા બોન્યાની ક્રેમલિન સામેની ટીકાએ ઇતિહાસ રચ્યો છે. તેમના વાયરલ વીડિયો પછી પહેલી વાર ક્રેમલિનને જાહેરમાં પ્રતિક્રિયા આપવી પડી.
રશિયાના રાષ્ટ્રપતિ Vladimir Putinને સામાન્ય રીતે તેમના વિરોધીઓને કડક રીતે હેન્ડલ કરવા માટે ઓળખવામાં આવે છે. પરંતુ તાજેતરમાં એક એવો પ્રસંગ સામે આવ્યો છે જેમાં પહેલી વાર ક્રેમલિનને એક મહિલા મોડેલ અને બ્લોગરની ટીકા પર જાહેર પ્રતિક્રિયા આપવી પડી છે. યુદ્ધ પછીનો આ પહેલો એવો કિસ્સો ગણાય છે, જેમાં સરકારને ખુલ્લેઆમ નિવેદન આપવું પડ્યું.
આ સમગ્ર મામલો રશિયન મોડેલ અને વિડિઓ બ્લોગર Victoria Bonya સાથે જોડાયેલો છે. તેમણે સોશિયલ મીડિયા પર એક વીડિયો શેર કરીને સીધા રાષ્ટ્રપતિને સંબોધ્યા હતા. વીડિયોમાં તેમણે કહ્યું કે સામાન્ય લોકો ડરના કારણે સરકાર વિરુદ્ધ અવાજ ઉઠાવી શકતા નથી, પરંતુ તેઓ ખુદ આ મુદ્દાઓ પર ખુલ્લેઆમ બોલવાની હિંમત કરે છે.
બોન્યાએ તેમના વીડિયોમાં દાગેસ્તાનમાં આવેલા પૂરના પ્રશ્નો, બ્લેક સીના કિનારે તેલ પ્રદૂષણ, સાઇબિરીયામાં wildlife ના શિકાર, ઇન્ટરનેટ બ્લેકઆઉટ અને વધતા ભાવ-કર જેવી સમસ્યાઓનો ઉલ્લેખ કર્યો હતો. તેમણે કહ્યું કે આ પરિસ્થિતિઓ નાના વેપારીઓ અને સામાન્ય નાગરિકો માટે મોટી મુશ્કેલી ઉભી કરી રહી છે.
આ વીડિયો ઝડપથી વાયરલ થયો અને લાખો લોકો સુધી પહોંચ્યો. યુરોપ સહિત અનેક દેશોમાં આ મુદ્દે ચર્ચા શરૂ થઈ. વધતા દબાણ વચ્ચે, ક્રેમલિનના પ્રવક્તા Dmitry Peskovએ આ મુદ્દાઓને સ્વીકારીને જણાવ્યું કે સરકાર આ સમસ્યાઓ પર કામ કરી રહી છે.
રશિયામાં વિરોધ અને ટીકા પર કડક કાર્યવાહી માટે પણ સરકાર જાણીતી રહી છે. Alexei Navalny, Boris Nemtsov અને Yevgeny Prigozhin જેવા ઘણા જાણીતા નામો પહેલાથી જ ચર્ચામાં રહ્યા છે. આવી પરિસ્થિતિમાં, એક સોશિયલ મીડિયા ઇન્ફ્લુએન્સરની ટીકા પછી સરકાર તરફથી આવું પ્રતિસાદ મળવું અસામાન્ય ગણાય છે.
46 વર્ષીય વિક્ટોરિયા બોન્યા રશિયામાં જાણીતી સેલિબ્રિટી છે. તેમણે 2006માં લોકપ્રિય રિયાલિટી શો "Dom-2" દ્વારા ઓળખ મેળવી હતી. આજે તેમના સોશિયલ મીડિયા પ્લેટફોર્મ્સ પર લાખો ફોલોઅર્સ છે અને તેઓ લાઇફસ્ટાઇલ સંબંધિત કન્ટેન્ટ બનાવે છે. અભ્યાસ પૂર્ણ કર્યા બાદ તેમણે મોડેલિંગ ક્ષેત્રમાં કારકિર્દી શરૂ કરી હતી અને શરૂઆતમાં વેઇટ્રેસ તથા રિસેપ્શનિસ્ટ તરીકે પણ કામ કર્યું હતું. આ ઘટનાએ ફરી એક વાર સોશિયલ મીડિયા ની શક્તિ અને તેના પ્રભાવને ઉજાગર કર્યો છે, ખાસ કરીને એવા દેશમાં જ્યાં વિરોધના અવાજોને સામાન્ય રીતે દબાવવામાં આવે છે.
