Breaking News : ગેસ સિલિન્ડર અંગે સરકારનો મોટો નિર્ણય! સરકાર લોન્ચ કરવા જઈ રહી છે.. લાખો લોકોને થશે ફાયદો
દેશભરમાં ટૂંક સમયમાં 10 કિલોગ્રામનું નવું કમ્પોઝિટ LPG સિલિન્ડર ઉપલબ્ધ થશે. IOC, BPCL અને HPCL દ્વારા લોન્ચ થનારું આ સિલિન્ડર પરંપરાગત સિલિન્ડર કરતાં 50% હળવું હશે.
દેશભરમાં ગેસ સિલિન્ડરનો ઉપયોગ કરતા નાગરિકો અને નાના-મોટા વેપારીઓ માટે ટૂંક સમયમાં એક મહત્વપૂર્ણ સારા સમાચાર મળી શકે છે. કેન્દ્ર સરકારની તેલ માર્કેટિંગ કંપનીઓ ઇન્ડિયન ઓઇલ કોર્પોરેશન (IOC), ભારત પેટ્રોલિયમ (BPCL) અને હિન્દુસ્તાન પેટ્રોલિયમ (HPCL) 10 કિલોગ્રામનું નવું કમ્પોઝિટ એલપીજી સિલિન્ડર લોન્ચ કરવાની તૈયારીમાં છે. જો આ પ્રસ્તાવને અંતિમ મંજૂરી મળશે તો દેશના લાખો ગ્રાહકોને હળવું અને સરળતાથી લઈ જઈ શકાય તેવું ગેસ સિલિન્ડર ઉપલબ્ધ થશે.
છેલ્લા કેટલાક મહિનામાં આંતરરાષ્ટ્રીય પરિસ્થિતિ અને પશ્ચિમ એશિયામાં વધેલા તણાવના કારણે એલપીજી સપ્લાય ચેઇન પર અસર જોવા મળી હતી. અનેક વિસ્તારોમાં ગ્રાહકોને બુકિંગ કર્યા બાદ પણ ગેસ સિલિન્ડર મેળવવા માટે લાંબી રાહ જોવી પડી હતી. જોકે હવે સપ્લાય વ્યવસ્થા ફરી સામાન્ય થઈ રહી છે. આ વચ્ચે સરકાર ગેસ વિતરણને વધુ સરળ અને સુવિધાજનક બનાવવા માટે નવા વિકલ્પો પર કામ કરી રહી છે.
અહેવાલો મુજબ, 10 કિલોગ્રામનું નવું કમ્પોઝિટ સિલિન્ડર ખાસ કરીને નાના વેપારીઓ, સ્ટ્રીટ ફૂડ વેચાણકારો, ચાની લારીઓ, વિદ્યાર્થીઓ, ભાડે રહેતા લોકો તેમજ સ્થળાંતરિત મજૂરોને ધ્યાનમાં રાખીને તૈયાર કરવામાં આવી રહ્યું છે. હાલ ઉપલબ્ધ 19 કિલોગ્રામનું કોમર્શિયલ સિલિન્ડર ભારે હોવાથી તેને ઉઠાવવામાં અને એક સ્થળેથી બીજા સ્થળે લઈ જવામાં મુશ્કેલી પડે છે. નવું હળવું સિલિન્ડર આ સમસ્યાનો મોટો ઉકેલ બની શકે છે.
અત્યારે બજારમાં 19 કિલોગ્રામ, 5 કિલોગ્રામ અને 2 કિલોગ્રામના કોમર્શિયલ એલપીજી સિલિન્ડર ઉપલબ્ધ છે. તેમાં 19 કિલોગ્રામનું સિલિન્ડર સૌથી વધુ ઉપયોગમાં લેવાતું હોવા છતાં તેનું વજન વધુ હોવાથી નાના વ્યવસાયકારો અને વ્યક્તિગત વપરાશકર્તાઓ માટે તે અસુવિધાજનક સાબિત થાય છે. આ જ કારણસર 10 કિલોગ્રામના નવા વિકલ્પની માંગ લાંબા સમયથી કરવામાં આવી રહી હતી.
જો સરકાર આ પ્રસ્તાવને મંજૂરી આપે છે તો નવા 10 કિલોગ્રામના કમ્પોઝિટ ગેસ સિલિન્ડરથી ઘરેલુ તેમજ નાના કોમર્શિયલ વપરાશકર્તાઓને મોટી રાહત મળશે. ખાસ કરીને એવા લોકો માટે આ સિલિન્ડર ઉપયોગી સાબિત થશે, જેમને ભારે 19 કિલોગ્રામના સિલિન્ડરનું સંચાલન કરવું મુશ્કેલ પડે છે. સરળ હેન્ડલિંગ, ઓછું વજન અને ઝડપી ઉપયોગ જેવી સુવિધાઓને કારણે આ સિલિન્ડર ભવિષ્યમાં ગ્રાહકોની પ્રથમ પસંદગી બની શકે છે.
માહિતી અનુસાર, 10 કિલોગ્રામનું આ નવું કમ્પોઝિટ સિલિન્ડર હાઈ ડેન્સિટી પોલિઇથિલિન (HDPE)થી બનાવવામાં આવશે. પરંપરાગત સ્ટીલના સિલિન્ડરની સરખામણીએ તેનું વજન લગભગ 50 ટકા ઓછું હશે. પરિણામે તેને સરળતાથી ઉઠાવી શકાશે, એક જગ્યાએથી બીજી જગ્યાએ લઈ જવામાં સરળતા રહેશે અને રોજિંદા ઉપયોગમાં પણ વધુ અનુકૂળ રહેશે.
