Telecom Act : આજથી લાગુ થયો ટેલિકોમ એક્ટ 2023, જાણો શું છે બદલાવ, A ટુ Z વિગતો
નવો ટેલિકોમ એક્ટ 2023 આજથી એટલે કે 26 જૂનથી અમલમાં આવ્યો છે. સરકાર દ્વારા જાહેર કરાયેલા નોટિફિકેશન અનુસાર, સરકાર સુરક્ષા, જાહેર વ્યવસ્થા અથવા ગુનાઓ અટકાવવાના આધાર પર ટેલિકોમ સેવાઓ પર નિયંત્રણ મેળવી શકે છે. આ કાયદામાં કડક જોગવાઈઓ કરવામાં આવી છે.
નવો ટેલિકોમ એક્ટ 2023 આજથી એટલે કે 26 જૂનથી અમલમાં આવી રહ્યો છે. આજથી કાયદાની કલમ 1, 2, 10 થી 30, 42 થી 44, 46, 47, 50 થી 58, 61 અને 62 ની જોગવાઈઓ પણ અમલમાં આવશે. આ નવો ટેલિકોમ એક્ટ ઇન્ડિયન ટેલિગ્રાફ એક્ટ (1885) અને ઇન્ડિયન વાયરલેસ ટેલિગ્રાફ એક્ટ (1933) જેવા હાલના કાયદાઓનું સ્થાન લેશે.
નવો ટેલિકોમ કાયદો સરકારને કટોકટીના સમયે કોઈપણ ટેલિકોમ સેવાઓ અથવા નેટવર્કને નિયંત્રિત કરવાની મંજૂરી આપશે. સરકાર સુરક્ષા, જાહેર વ્યવસ્થા અથવા ગુનાઓના નિવારણ માટે ટેલિકોમ્યુનિકેશન સેવાઓનું નિયંત્રણ પણ લઈ શકે છે.
સરકાર દ્વારા જાહેર કરાયેલા નોટિફિકેશન અનુસાર, સરકાર સુરક્ષા, જાહેર વ્યવસ્થા અથવા ગુનાઓ અટકાવવાના આધાર પર ટેલિકોમ સેવાઓ પર નિયંત્રણ મેળવી શકે છે. આ સિવાય સિમ કાર્ડને લઈને પણ આ કાયદામાં કડક જોગવાઈઓ કરવામાં આવી છે.
જો આપણે Telecom Act 2023ની ખાસ વિશેષતાઓની વાત કરીએ તો તેમાં ઘણી કડક જોગવાઈઓ છે. આ કાયદામાં નકલી સિમ કાર્ડ જાહેર કરવા પર પ્રતિબંધ મૂકવાની જોગવાઈ છે. એક ઓળખ કાર્ડ પર 9 થી વધુ સિમ કાર્ડ રાખવા પર 50,000 રૂપિયાનો દંડ છે. જો તમે આ જ કામ બીજી વખત કરો છો તો 2 લાખ રૂપિયા સુધીનો દંડ થઈ શકે છે.
સિમ વેચવા માટે બાયોમેટ્રિક ડેટા લેવામાં આવશે ત્યાર બાદ જ સિમ આપવામાં આવશે. બિલ હેઠળ નકલી સિમ કાર્ડ વેચવા, ખરીદવા અને ઉપયોગ કરવા પર ત્રણ વર્ષની જેલ અથવા 50 લાખ રૂપિયા સુધીના દંડની જોગવાઈ છે. કોઈપણ પ્રકારની સિમ કાર્ડ છેતરપિંડી માટે ત્રણ વર્ષની જેલ અને દંડ થશે.
રાષ્ટ્રીય સુરક્ષાના મુદ્દાઓને ધ્યાનમાં રાખીને, ટેલિકોમ કંપનીઓએ સરકાર દ્વારા ઓળખવામાં આવેલા વિશ્વાસપાત્ર સ્ત્રોતો પાસેથી જ તેમના સાધનો ખરીદવા પડશે. પ્રમોશનલ મેસેજ મોકલવા માટે યુઝર્સની પૂર્વ સંમતિ જરૂરી રહેશે. આ સાથે ટેલિકોમ નેટવર્ક ડેટા એક્સેસ કરવો, ટેપિંગ અથવા પરવાનગી વગર કોલ રેકોર્ડિંગને ગુનો ગણવામાં આવશે. આ માટે 3 વર્ષની સખત કેદ અને 2 કરોડ રૂપિયા સુધીનો દંડ પણ થઈ શકે છે.
ટેલિકોમ કંપનીઓએ યુઝર્સને DND (Do-Not-Disturb) સર્વિસ રજીસ્ટર કરવાનો વિકલ્પ આપવો પડશે. યુઝર્સ હવે વારંવાર ખલેલ પહોંચાડતા ફોન કોલ્સ વિશે પણ ફરિયાદ કરી શકશે. અને જો આ નિયમનો ભંગ થશે તો કાર્યવાહી કરવામાં આવશે.
Published On - 7:10 pm, Wed, 26 June 24