Breaking News : 274 દિવસ બાદ નીરજ ચોપરાની મેદાનમાં વાપસી, જાણો ક્યારે અને ક્યાં જોઈ શકશો LIVE
ઓલિમ્પિક મેડલ વિજેતા નીરજ ચોપરા 274 દિવસ બાદ દોહા ડાયમંડ લીગમાં ભાલા ફેંક સ્પર્ધાથી મેદાનમાં વાપસી કરી રહ્યા છે. પીઠની ઈજામાંથી સાજા થયા બાદ નીરજ ફરી એકવાર પોતાનો જાદુ બતાવવા તૈયાર છે.
ભારતના ‘ગોલ્ડન બોય’ અને બે વખતના ઓલિમ્પિક મેડલ વિજેતા ભાલા ફેંક સ્ટાર Neeraj Chopra ફરી એકવાર મેદાનમાં વાપસી કરવા માટે તૈયાર છે. પીઠની ઈજાના કારણે લાંબા સમય સુધી સ્પર્ધાત્મક એથ્લેટિક્સથી દૂર રહેલા નીરજ હવે 274 દિવસ બાદ 2026ની સીઝનની શરૂઆત કરવા જઈ રહ્યા છે. તેઓ કતારના Doha ખાતે યોજાનારી Doha Diamond Leagueમાં ભાગ લેશે, જેને લઈને ભારતીય ચાહકોમાં ભારે ઉત્સાહ જોવા મળી રહ્યો છે.
બેક ઇન્જરીથી સાજા થયા બાદ નીરજે સ્વિટ્ઝર્લૅન્ડમાં આવેલા ઓલિમ્પિક ટ્રેનિંગ સેન્ટરમાં પુનર્વસન પૂર્ણ કર્યું છે. શરૂઆતમાં જાહેર કરાયેલી એન્ટ્રી લિસ્ટમાં તેમનું નામ ન હોવાથી તેમની ફિટનેસ અંગે અનેક અટકળો ચાલી રહી હતી, પરંતુ હવે તેમની ભાગીદારી સત્તાવાર રીતે નિશ્ચિત થઈ ગઈ છે.
દોહાનું કતાર સ્પોર્ટ્સ ક્લબ મેદાન નીરજ માટે હંમેશા ખાસ રહ્યું છે. દોહા ડાયમંડ લીગમાં આ તેમનો સતત ચોથો દેખાવ હશે. અહીં તેમણે અગાઉ પણ શાનદાર પ્રદર્શન કર્યું છે અને અનેક યાદગાર સિદ્ધિઓ પોતાના નામે નોંધાવી છે.
નીરજ ચોપરાએ 2023માં દોહા ડાયમંડ લીગમાં ગોલ્ડ મેડલ જીત્યો હતો. ત્યારબાદ 2024 અને 2025ની આવૃત્તિમાં તેઓ બીજા સ્થાને રહ્યા હતા. ખાસ વાત એ છે કે ગયા વર્ષે આ જ મેદાન પર તેમણે 90.23 મીટરનો ભાલો ફેંકીને નવો રાષ્ટ્રીય રેકોર્ડ બનાવ્યો હતો. આ સાથે તેમણે કારકિર્દીમાં પહેલીવાર 90 મીટરના ઐતિહાસિક આંકડાને પાર કર્યો હતો. ભારતીય ચાહકો માટે વધુ એક સારા સમાચાર એ છે કે નીરજની પુરુષોની જાવેલિન થ્રો સ્પર્ધા 19 જૂને ભારતીય સમય મુજબ રાત્રે 11:14 વાગ્યે શરૂ થશે. ચાહકો આ સ્પર્ધાનું લાઇવ પ્રસારણ ડાયમંડ લીગની સત્તાવાર યુટ્યુબ ચેનલ અને ફેસબુક પેજ પર નિઃશુલ્ક જોઈ શકશે.
આ મેચમાં એક મોટો ફેરફાર પણ જોવા મળ્યો છે. પાકિસ્તાનના ઓલિમ્પિક ચેમ્પિયન Arshad Nadeemએ છેલ્લી ઘડીએ પોતાનું નામ પાછું ખેંચી લીધું છે. હવે નીરજ ચોપરાને શ્રીલંકાના ઉભરતા જાવેલિન સ્ટાર Rumesh Tharanga Pathirage તરફથી કડક પડકાર મળી શકે છે. પથિરાજે તાજેતરમાં રોમ ડાયમંડ લીગમાં 92.62 મીટરનો ભાલો ફેંકીને સમગ્ર એથ્લેટિક્સ જગતનું ધ્યાન પોતાની તરફ ખેંચ્યું હતું. દોહા ડાયમંડ લીગમાં નીરજ ચોપરાની વાપસી માત્ર ભારતીય ચાહકો માટે જ નહીં, પરંતુ વિશ્વ એથ્લેટિક્સ માટે પણ એક મહત્વપૂર્ણ ક્ષણ માનવામાં આવી રહી છે. હવે સૌની નજર રહેશે કે ઈજાથી વાપસી બાદ નીરજ ફરી એકવાર પોતાની જૂની લયમાં જોવા મળે છે કે નહીં.
