Morocco Earthquake Photos : મોરોક્કોમાં ધરતીકંપથી તબાહી, સેંકડો મકાનો ધરાશાયી, મૃત્યુઆંક 2000ને પાર
Morocco Earthquake : વિનાશક ભૂકંપના કારણે મોરોક્કોમાં ભારે તબાહી મચી ગઈ છે. સોશિયલ મીડિયા પર હૃદયદ્રાવક વીડિયો શેયર કરવામાં આવી રહ્યા છે. અહીં મોતનો આંકડો સતત વધી રહ્યો છે. મૃત્યુઆંક હવે 2,000 ને વટાવી ગયો છે.
મોરોક્કન સેનાના એક નિવેદન અનુસાર, રાજા મોહમ્મદ છઠ્ઠીએ સશસ્ત્ર દળોને વિશેષ શોધ અને બચાવ ટીમો અને સર્જિકલ ફિલ્ડ હોસ્પિટલ તૈનાત કરવાનો નિર્દેશ આપ્યો છે.
મોરોક્કોના ઉચ્ચ એટલાસ પર્વતોને હચમચાવી દેતા ભૂકંપના કેન્દ્રની સૌથી નજીકના શહેર મારકેશમાં ઘણી ઐતિહાસિક ઇમારતોને નુકસાન થયું છે. પરંતુ મોટાભાગના મૃત્યુ અલ-હૌઝ અને તરાઉડન્ટ પ્રાંતના દક્ષિણમાં પર્વતીય વિસ્તારોમાં નોંધાયા છે.
દરમિયાન, સર્ચ અને બચાવ ટીમ કાટમાળ હટાવવામાં અને રસ્તા સાફ કરવામાં વ્યસ્ત છે. ભૂકંપની ઊંડાઈ 18.5 કિમી માપવામાં આવી હતી.
દક્ષિણમાં સિદી ઇફ્નીથી ઉત્તરમાં રાબાત અને તેની બહારના વિસ્તારમાં જોરદાર આંચકા અનુભવાયા હતા. ભૂકંપનું કેન્દ્ર એક મુખ્ય આર્થિક હબ મારકેશથી 72 કિલોમીટર પશ્ચિમમાં હતું.
તુર્કીના ડિઝાસ્ટર એન્ડ ઈમરજન્સી મેનેજમેન્ટ ડિપાર્ટમેન્ટ (એએફએડી) કહે છે કે તેણે મોરોક્કોથી ઈમરજન્સી એલર્ટ મળે તો મેડિકલ, રાહત, શોધ અને બચાવ એજન્સીઓના 265 સભ્યોને એલર્ટ પર રાખ્યા છે.
