દુબઈઃ પુસ્તકના આકાર જેવી હાઈ-ટેક લાઈબ્રેરી, 11 લાખ પુસ્તકો અને રોબોટિક ગાઈડ દ્વારા પસંદ કરી શકશો મનપસંદ પુસ્તક, જાણો તેની વિશેષતા
આ દુબઈમાં બનેલી મધ્ય-પૂર્વ એશિયાની સૌથી મોટી લાઈબ્રેરી છે. તેનું નામ મોહમ્મદ બિન રાશિદ લાઈબ્રેરી (Mohammed Bin Rashid Library) છે. ગુરુવારથી તેને સામાન્ય લોકો માટે ખુલ્લી મુકવામાં આવી છે.
ટેક્નોલોજીની દૃષ્ટિએ આ લાઈબ્રેરી એકદમ હાઈટેક લાઈબ્રેરી (Hitech Library) છે. અહીં તમને ઘણી એવી સુવિધાઓ મળશે જે તમને ભાગ્યે જ ક્યાય મળી હશે. દુબઈની આ લાઈબ્રેરીમાં 11 લાખ પુસ્તકો છે. આ ઉપરાંત 60 લાખથી વધુ નિબંધો, 73 હજાર મ્યુઝિક નોટ્સ સહિત અનેક પ્રકારના લિટ્રેચર છે. જાણો આ પુસ્તકાલયની ખાસિયતો.
ખલીજ ટાઈમ્સના રિપોર્ટ મુજબ આ નવી હાઈટેક અને ડિજિટલ લાઈબ્રેરીમાં 75 હજાર વીડિયો, 5 હજાર પાંડુલિપિઓ સહિત 35 હજાર ન્યુઝપેપરની કોપી પણ વાંચવા મળશે. આ ઉપરાંત અહીં 325 વર્ષ જૂના પુસ્તકો પણ રાખવામાં આવ્યા છે.
આ લાઈબ્રેરીમાં માત્ર ફિજિક્સ બુક જ નહીં પરંતુ ડિજિટલ પુસ્તકો પણ છે. અહીં આવા પુસ્તકોનું એક વિશાળ ક્લેક્શન છે. આ લાઈબ્રેરીમાં લોકોની મદદ માટે આર્ટિફિશિયલ ઈન્ટેલિજન્સનો પણ ઉપયોગ કરવામાં આવ્યો છે. એટલે કે અહીં આવનાર વિઝિટર્સ રોબોટિક ગાઈડની મદદથી પોતાના મનપસંદ પુસ્તકોની પસંદગી કરી શકશે. આ માટે અહીં AI કિઓસ્ક પણ લગાવવામાં આવ્યા છે.
લાયબ્રેરી વિશાળ બનાવવામાં આવી છે, વિઝિટર્સ દરેક પુસ્તકો સુધી પહોંચી શકે તે માટે પણ વ્યવસ્થા કરવામાં આવી છે. ઉંચી-ઉંચી બુક શેલ્ફમાં પુસ્તકો સરળતાથી મળી રહે તે માટે બુકશેલ્ફને ઓટોમેટિક સિસ્ટમ સાથે જોડવામાં આવ્યું છે. એટલે કે વિઝિટર્સ ઉપર શેલ્ફમાં મુકેલ પુસ્તકને બટન દ્વારા નીચેની શેલ્ફમાં લાવી શકે છે.
આ લાઈબ્રેરીમાં બાળકો માટેના પુસ્તકો પણ ઉપલબ્ધ રહેશે. આ ઉપરાંત અહીં દર 3 મહિનામાં દુબઈના ફોટો સાથે સંબંધિત એક પ્રદર્શન પણ યોજવામાં આવશે. જેના કારણે અહીં આવતા લોકો દુબઈના દરેક વિસ્તારની સુંદરતાથી પરિચિત થઈ શકશે.