સામાન્ય માણસના ખિસ્સા પર સીધી અસર, Jio, Airtel, VI માં ડિસેમ્બરથી રિચાર્જ પ્લાનોમાં વધારો શક્ય
મોબાઇલ વપરાશકર્તાઓ માટે ખરાબ સમાચાર! જિયો, એરટેલ અને વોડાફોન આઈડિયા ડિસેમ્બર 2025 થી રિચાર્જ દરોમાં વધારો થાય તેવી શક્યતાઓ છે.
હવે મોબાઇલ વપરાશ કરતા પહેલા વિચારવાની જરૂર પડશે, કારણ કે દેશની ત્રણ મોટી ટેલિકોમ કંપનીઓ – જિયો, એરટેલ અને વોડાફોન આઈડિયા – રિચાર્જના દરોમાં વધારો કરવાની તૈયારી કરી રહી છે. આ ભાવ વધારો થવાથી મોબાઇલ અને ઈન્ટરનેટ સેવાઓનો ખર્ચ સામાન્ય વપરાશકર્તાઓના ખિસ્સા પર સીધી અસર કરશે.
ટેલિકોમ ક્ષેત્રના નિષ્ણાતોના મતે, કંપનીઓ હવે તેમના ઓછા ખર્ચવાળા પ્લાન બંધ કરી રહી છે. આ નિર્ણય ખાસ કરીને લાંબા ગાળાના પ્રીપેડ અને ડેટા પ્લાન ધરાવતા વપરાશકર્તાઓને અસર કરશે. હાલ ટેલિકોમ કંપનીઓ પ્રતિ વપરાશકર્તા સરેરાશ ₹180 થી ₹195 કમાઈ રહી છે, જ્યારે નાણાકીય સંતુલન માટે તેમને પ્રતિ વપરાશકર્તા ₹200 થી વધુ આવકની જરૂર છે.
સૂત્રોના અનુસાર, ડિસેમ્બર 2025 થી ભાવ વધારો લાગુ થઈ શકે છે. ઉદાહરણ તરીકે, હાલમાં ₹199 નો પ્લાન ₹222 સુધી પહોંચી શકે છે, જ્યારે 28 દિવસનો ₹299 (2GB/દિવસ) પ્લાન ₹349 સુધી વધી શકે છે. એ જ રીતે, 84 દિવસના ₹330-₹345ના પ્લાનની કિંમત ₹949 થી ₹999 વચ્ચે પહોંચી શકે છે. આ વધારાથી લાંબા ગાળાના પ્લાન પસંદ કરનાર વપરાશકર્તાઓને વધુ ખર્ચ સહન કરવો પડશે.
ટેલિકોમ કંપનીઓ હાલમાં 5G નેટવર્કના વિસ્તરણમાં ભારે રોકાણ કરી રહી છે, જેના કારણે નાણાકીય દબાણ વધી રહ્યું છે. સીધો ભાવ વધારો કર્યા વગર, તેઓ ધીમે ધીમે કિફાયતી યોજનાઓ બજારમાંથી દૂર કરી રહી છે. એરટેલ અને વોડાફોન આઈડિયા બંનેએ આવક વધારવા માટેની તૈયારી શરૂ કરી દીધી હોવાનું પણ જણાવાયું છે.
નિષ્ણાતોનું માનવું છે કે ડિસેમ્બર 2025 થી જૂન 2026 વચ્ચે રિચાર્જ દરોમાં 10 થી 15 ટકા સુધીનો વધારો થઈ શકે છે. જિયો તેના IPO પહેલા આશરે 15 ટકા વધારો કરી શકે છે, જ્યારે એરટેલ અને વોડાફોન આઈડિયા 10 ટકા સુધી વધારો લાવી શકે છે.
વપરાશકર્તાઓ માટે હાલ એક જ તક છે. જો તમે વધતા ભાવોથી બચવા માંગો છો, તો નવેમ્બર 2025 માં જ લાંબા ગાળાની માન્યતા ધરાવતો રિચાર્જ પ્લાન કરાવવો વધુ ફાયદાકારક સાબિત થઈ શકે છે. આ રીતે, તમે વર્તમાન દરે આગામી કેટલાક મહિનાઓ સુધી સેવા મેળવી શકશો.
હાલમાં BSNL આ ભાવ વધારાથી દૂર રહી રહ્યું છે, એટલે કે જો તમે ઓછા ખર્ચે સેવા શોધી રહ્યા હો, તો BSNLના વિકલ્પો પણ વિચારવા યોગ્ય છે.
Published On - 6:17 pm, Sat, 8 November 25
