વધી જશે તમારું ‘મોબાઈલ બિલ’… આગામી મહિનાઓમાં રિચાર્જ પ્લાન થશે ‘મોંઘા’, કંપનીઓ ટેરિફ પ્લાનમાં કરશે ‘મોટો વધારો’
દેશના સામાન્ય નાગરિકોને મોંઘવારીનો વધુ એક મોટો ફટકો પડી શકે છે. આગામી ત્રણથી ચાર મહિનામાં વિવિધ ટેલિકોમ કંપનીઓ પોતાના રિચાર્જ પ્લાન અને ટેરિફમાં 12-15 ટકા સુધીનો વધારો કરે તેવી શક્યતા છે. એક રિસર્ચ રિપોર્ટ અનુસાર, બજારની બદલાતી સ્થિતિ અને ગ્રાહકોના 4G-5G નેટવર્ક તરફ વધી રહેલા વ્યાપને કારણે કંપનીઓ આગામી સમયમાં કિંમતો વધારવાનું આયોજન કરી રહી છે.
દેશના લોકોને મોંઘવારીનો વધુ એક ફટકો સહન કરવો પડી શકે છે, કારણ કે આગામી મહિનાઓમાં ટેલિકોમ કંપનીઓ પોતાના ટેરિફ પ્લાન મોંઘા કરી શકે છે. સેન્ટ્રમ ઇન્સ્ટિટ્યૂશનલ રિસર્ચના Q1FY27 ટેલિકોમ અને ઇન્ટરનેટ સેક્ટર પ્રિવ્યૂ રિપોર્ટ અનુસાર, આગામી ત્રણથી ચાર મહિનામાં ભારતના ટેલિકોમ સેક્ટરમાં ટેરિફમાં 12-15 ટકાનો વધુ વધારો થઈ શકે છે, કારણ કે માર્કેટ કન્સોલિડેશન (બજારના એકત્રીકરણ) પછી પ્રાઇસિંગનું વાતાવરણ વધુ સાનુકૂળ બન્યું છે.
ન્યૂઝ એજન્સી ANI એ સેન્ટ્રમ ઇન્સ્ટિટ્યૂશનલ રિસર્ચના રિપોર્ટને ટાંકીને જણાવ્યું છે કે, માત્ર 3+1 પ્લેયર્સ હોવાને કારણે કિંમતોનું વાતાવરણ વધુ સાનુકૂળ બન્યું છે અને અમને આશા છે કે, આગામી 3 થી 4 મહિનામાં ટેરિફમાં 12-15 ટકાનો વધુ વધારો થશે.
ટેલિકોમ સેક્ટરના ફાઇનાન્સિયલ પર્ફોર્મન્સની વાત કરીએ તો રિપોર્ટમાં કહેવામાં આવ્યું છે કે, જૂન ક્વાર્ટરમાં ત્રણેય પ્રાઇવેટ ટેલિકોમ ઓપરેટરોના ‘એવરેજ રેવેન્યુ પર યુઝર’ (ARPU) માં ક્વાર્ટર-દર-ક્વાર્ટર 1-1.5% નો વધારો થવાની સંભાવના છે. આનું કારણ સબસ્ક્રાઇબર્સનું 2G માંથી 4G અને 5G નેટવર્ક પર જવું, પોસ્ટપેડ કસ્ટમર્સનું જોડાવું અને ક્વાર્ટરમાં દિવસોની સંખ્યા વધુ હોવાનું છે. સેન્ટ્રમે જણાવ્યું કે એવી અપેક્ષા છે કે, ભારતી એરટેલ અને રિલાયન્સ જીઓ, વોડાફોન આઇડિયા (VIL) ના નુકસાન પર સબસ્ક્રાઇબર માર્કેટ શેર મેળવવાનું ચાલુ રાખશે.
રિપોર્ટમાં કહેવામાં આવ્યું છે કે, ‘ભારતી એરટેલ અને રિલાયન્સ જીઓ, VIL ના નુકસાન પર સબસ્ક્રાઇબર માર્કેટ શેર મેળવવાનું ચાલુ રાખશે. અપેક્ષા છે કે, રિલાયન્સ જીઓ દર ક્વાર્ટરે (QoQ) આશરે 70 લાખ (7mn) નવા સબસ્ક્રાઇબર જોડશે, જ્યારે ભારતી એરટેલ આશરે 50 લાખ (5mn) નવા સબસ્ક્રાઇબર જોડે તેવી અપેક્ષા છે. અમને આશા છે કે, VIL દર ક્વાર્ટરે આશરે 2 લાખ (0.2mn) નવા ગ્રાહકો જોડશે.’ બ્રોકરેજને એવી પણ અપેક્ષા છે કે, ગ્રાહક દીઠ ડેટાનો વપરાશ મજબૂત રહેશે, કારણ કે દેશભરમાં 4G અને 5G નો વપરાશ વધી રહ્યો છે.
રિપોર્ટમાં કહેવામાં આવ્યું છે કે, ‘4G/5G નેટવર્કના વધતા વપરાશને કારણે ગ્રાહક દીઠ ડેટાનો વપરાશ મજબૂત રહેશે. રિલાયન્સ જીઓ અને એરટેલે 90% થી વધુ જિલ્લાઓમાં 5G સર્વિસ શરૂ કરી દીધી છે અને તેમનું ફોકસ પોતાના નેટવર્કમાં વધુ 5G ડિવાઇસ જોડવા પર છે.’ આમાં એવું પણ કહેવામાં આવ્યું છે કે, બંને કંપનીઓ 5G FWA અને ફિક્સ્ડ બ્રોડબેન્ડ જોડવાની બાબતમાં પણ સારી વૃદ્ધિ જોઈ રહી છે કારણ કે આ સેગમેન્ટમાં હજુ પણ વપરાશ ઓછો છે.
રિપોર્ટમાં જણાવવામાં આવ્યું છે કે, વોડાફોન આઇડિયા પણ પોતાની 5G સર્વિસનો વ્યાપ વધારી રહી છે. આમાં ઉલ્લેખ કરાયો છે કે, VIL નું 5G નેટવર્ક આશરે 100 શહેરોમાં ઉપલબ્ધ છે અને તે પોતાના 5G કવરેજને વધારી રહી છે. આ સાથે એ વાત પર પણ ભાર મૂકવામાં આવ્યો કે, કંપનીનું એડજસ્ટેડ ગ્રોસ રેવેન્યુ (AGR) નું દેવું ઓછું થયું છે. રિપોર્ટ અનુસાર, ‘ભવિષ્યમાં AGR પેમેન્ટની જવાબદારીઓની વર્તમાન વેલ્યૂ તરીકે VIL નું AGR દેવું ઘટીને 25,000 કરોડ રૂપિયા રહી ગયું છે.’
