દાદા-પરદાદાની જમીનના કાગળો ખોવાઈ ગયા છે ? જાણો ક્યાં અને કેટલી છે જમીન, ઓનલાઈન ચેક કરવાની સરળ રીત
ઘણા પરિવારમાં વર્ષો જૂની જમીનના કાગળો ખોવાઈ જતાં મોટી મુશ્કેલી ઊભી થાય છે! પરંતુ હવે ટેન્શન લેવાની જરૂર નથી. તમારા દાદા કે પરદાદાના નામે ક્યાં અને કેટલી જમીન છે તે તમે ઘરે બેઠા જ ચેક કરી શકો છો. જાણો આ ખાસ સ્ટેપ-બાય-સ્ટેપ ગાઈડમાં!
જૂના જમાનામાં દાદા કે પરદાદાના નામે લેવાયેલી જમીનના કાગળો સમય જતાં ખરાબ થઈ જાય કે ખોવાઈ જાય તો ચિંતા કરવાની જરૂર નથી. હવે મોટાભાગના રાજ્યોમાં જમીનના તમામ રેકોર્ડ ડિજિટલ થઈ ગયા છે, જેને તમે ઘરે બેઠા ઓનલાઈન જોઈ શકો છો.
જમીનની વિગતો શોધવા માટે કોઈ પણ અજાણી કે પ્રાઈવેટ વેબસાઈટનો ઉપયોગ કરવાને બદલે તમારા રાજ્યના અધિકૃત 'ભૂલેખ' (Bhulekh) અથવા રેવેન્યુ ડિપાર્ટમેન્ટના પોર્ટલ પર જ જવું હિતાવહ છે.
તમારા મોબાઈલ કે કમ્પ્યુટરના બ્રાઉઝરમાં જઈને રાજ્યનું નામ અને તેની સાથે 'લેન્ડ રેકોર્ડ્સ' અથવા 'ભૂલેખ' લખીને સર્ચ કરો. ઉદાહરણ તરીકે ગુજરાત માટે 'એની રોર' (AnyRoR) અને અન્ય રાજ્યો માટે તેમના સત્તાવાર મહેસૂલ પોર્ટલ ઓપન કરો.
વેબસાઈટ ખુલે એટલે સૌથી પહેલાં જમીન જે વિસ્તારમાં આવેલી હોય તે જિલ્લો, તાલુકા કે અંચલ અને ગામનું નામ એકદમ સાચું પસંદ કરો. જો લોકેશન પસંદ કરવામાં ભૂલ થશે તો અન્ય કોઈની જમીનની વિગતો સામે આવી શકે છે.
જો તમારી પાસે જમીનનો સર્વે નંબર, ખાતા નંબર કે ખતૌની નંબર નથી, તો તમે ખાતાદાર એટલે કે દાદા કે પરદાદાના નામ પરથી રેકોર્ડ શોધી શકો છો. ઓનલાઈન પોર્ટલ પર નામ લખીને સર્ચ કરવાનો વિકલ્પ ઉપલબ્ધ હોય છે.
જૂના જમાનાના રેકોર્ડમાં દાદા કે પરદાદાના નામની સ્પેલિંગ કે લખવાની શૈલી અલગ હોઈ શકે છે. જો એક વારમાં રેકોર્ડ ન મળે તો અલગ-અલગ રીતે નામ લખીને પ્રયાસ કરવો જોઈએ.
નામથી સર્ચ કરતી વખતે એક જ સરખા નામવાળા ઘણા રેકોર્ડ સામે આવી શકે છે. આથી માત્ર નામ જોઈને ખુશ થવાને બદલે જમીનનું ક્ષેત્રફળ (રકબો), ખાતા નંબર, સર્વે નંબર અને ગામની વિગતો ખાસ મેચ કરી લેવી.
સાચો રેકોર્ડ મળી ગયા પછી પોર્ટલ પરથી જમીનની ખતૌની, જમાબંધી કે 7/12 અને 8-અ ની નકલ જોઈ શકાય છે અને તેને પીડીએફ (PDF) સ્વરૂપે ડાઉનલોડ કે પ્રિન્ટ પણ કરી શકાય છે.
ઓનલાઈન મળતો ભૂલેખ રેકોર્ડ માહિતી મેળવવા માટે મહત્વપૂર્ણ છે, પરંતુ જો જમીન વેચવા, વારસાઈ, ભાગ પાડવા કે કોર્ટ કેસ માટે ઉપયોગ કરવાનો હોય તો મામલતદાર ઓફિસ કે રજિસ્ટ્રાર કચેરીમાંથી પ્રમાણિત (Certified) નકલ લેવી જરૂરી બની શકે છે.
જો ખૂબ જૂના (100-150 વર્ષ જૂના) રેકોર્ડ ઓનલાઈન પોર્ટલ પર ન મળે તો ગભરાવાની જરૂર નથી. આવી સ્થિતિમાં સંબંધિત તાલુકા સેવા સદન, કલેક્ટર ઓફિસ કે મહેસૂલી રેકોર્ડ રૂમ (Record Room) માંથી જૂના દસ્તાવેજોની ફિઝિકલ નકલ મેળવી શકાય છે.
