‘બિયર અને મગફળી’નું કોમ્બિનેશન… માત્ર સ્વાદ જ નહીં, તેની પાછળ છુપાયેલું છે એક ‘ખાસ કારણ’
કેટલાક લોકો મગફળીને બિયરના મગ કે તેના ગ્લાસમાં નાખીને પણ ખાતા હોય છે પરંતુ શું તમે ક્યારેય વિચાર્યું છે કે, બિયરના ગ્લાસમાં મગફળીના દાણા ક્યારેય ડૂબતા નથી, તે હંમેશા તેમાં તરતા રહે છે. આખરે, બિયરમાં મગફળીના દાણા કેમ તરે છે?
બિયર પીતી વખતે લોકો વિવિધ પ્રકારની વાનગીઓનું સેવન કરતા હોય છે. આ પ્રક્રિયામાં ઘણા લોકો મગફળીને ખૂબ પસંદ કરે છે. બિયરની સાથે મગફળીનું કોમ્બિનેશન ઘણા લોકોને ગમતું હોય છે. આવા સમયે લોકો અનેક પ્રકારની મગફળી (રોસ્ટેડ કે સોલ્ટેડ) ખાતા હોય છે.
સૌ પ્રથમ તો તમને જણાવી દઈએ કે, બિયર સાથે નમકીન મગફળી સ્વાદ વધારવા અને હેંગઓવરને ઓછો કરવાના હેતુથી ખાવામાં આવે છે. નમકીન મગફળી બિયરની કડવાશને ઓછી કરીને તેને પીવાલાયક બનાવે છે. એવો દાવો કરવામાં આવે છે કે, તેમાં રહેલા પ્રોટીન અને ફેટ આલ્કોહોલના શોષણને (Absorption) ધીમું કરે છે, જેના કારણે નશો ધીમેથી ચઢે છે અને ડિહાઇડ્રેશન (Dehydration) રોકવામાં મદદ મળે છે. આ જ કારણ છે કે, મોટાભાગના લોકો બિયરની સાથે મગફળી ખાવાનું પસંદ કરે છે.
સામાન્ય રીતે ભારતમાં પણ કેટલાક લોકો બિયરમાં મગફળી નાખીને પીવાનું પસંદ કરે છે પરંતુ શું તમે જાણો છો કે, આર્જેન્ટિનામાં બિયરમાં મગફળી નાખવાનો એક ટ્રેન્ડ છે. આર્જેન્ટિનામાં બિયરમાં મગફળી નાખવાની પરંપરા મુખ્યત્વે મનોરંજન અને એક વૈજ્ઞાનિક ઘટનાને કારણે લોકપ્રિય છે, જેને 'ડાન્સિંગ પીનટ્સ' (નાચતી મગફળી) કહેવામાં આવે છે.
બિયરમાં નાખવામાં આવેલી મગફળી પહેલા નીચે બેસી જાય છે, ત્યારબાદ બિયરના કાર્બન ડાયોક્સાઇડના પરપોટા તેની સપાટી પર જમા થઈને તેને ઉપર ઉઠાવે છે, જેનાથી તે નાચતી હોય તેવું લાગે છે. આ જોવામાં લોકોને ખૂબ આનંદ આવે છે અને તેઓ તેની મજા માણતા બિયર પી શકે છે.
રિસર્ચ ગેટ (Research Gate) નામની વેબસાઇટ પર બ્રાઝિલિયન સંશોધક લુઇઝ પરેરાના હવાલાથી બિયરમાં મગફળીના તરવા અથવા નાચવા વિશે જણાવવામાં આવ્યું છે. સંશોધકો જણાવે છે કે, મગફળી બિયરની તુલનામાં વધુ ઘટ્ટ (Dense) હોવાથી તે પહેલા ગ્લાસના તળિયે બેસી જાય છે, ત્યારબાદ દરેક મગફળી એક 'ન્યુક્લિએશન સાઇટ' (Nucleation site) બની જાય છે.
તેની સપાટી પર કાર્બન ડાયોક્સાઇડના સેંકડો નાના-નાના પરપોટા બને છે, જે તેને ઉપરની તરફ ખેંચવામાં મદદરૂપ થાય છે. પરપોટા કાચની દીવાલ કરતા મગફળી પર બનવાનું વધુ પસંદ કરે છે. વધુમાં, જ્યારે પરપોટા સપાટી પર પહોંચે છે, ત્યારે તે ફૂટી જાય છે. મગફળી ફરી નીચે ડૂબકી લગાવે છે અને નવા બનેલા પરપોટા દ્વારા ફરીથી ઉપરની તરફ ધકેલવામાં આવે છે. આ પ્રક્રિયા દરમિયાન મગફળી નાચતી હોય તેમ દેખાય છે અને આ ત્યાં સુધી ચાલુ રહે છે, જ્યાં સુધી કાર્બન ડાયોક્સાઇડ ખતમ ન થઈ જાય અથવા કોઈ બિયર પીને આ પ્રક્રિયામાં ખલેલ ન પહોંચાડે.
