Breaking News : ગુજરાતના ગિફ્ટ સિટી બાદ હવે પોરબંદરમાં મળશે દારૂ! સરકારે આટલા પરમિટ ધારકોને આપી મંજૂરી, જાણો
ગુજરાત સરકારે મહાત્મા ગાંધીના જન્મસ્થળ પોરબંદરમાં દારૂના વેચાણને મંજૂરી આપી છે, જેનાથી રાજ્યભરમાં ચર્ચા જગાવી છે. પ્રવાસનને પ્રોત્સાહન આપવાના હેતુથી આ નિર્ણય લેવાયો છે, જેમાં પસંદગીની હોટેલોમાં નિયંત્રિત રીતે દારૂ પીરસવામાં આવશે.
મહાત્મા ગાંધીના જન્મસ્થળ Porbandarમાં હવે દારૂના વેચાણને મંજૂરી આપવામાં આવતા રાજ્યભરમાં ચર્ચા શરૂ થઈ ગઈ છે. ગુજરાત સરકારના ગૃહ વિભાગે તાજેતરમાં આ નિર્ણય લીધો છે, જેના પગલે શહેરની કેટલીક હોટેલોમાં નિયંત્રિત રીતે દારૂ પીરસવાની પરવાનગી આપવામાં આવી છે. અત્યાર સુધી પોરબંદરમાં દારૂ પર સંપૂર્ણ પ્રતિબંધ લાગુ હતો.
ગુજરાત લાંબા સમયથી દારૂબંધી માટે જાણીતું રાજ્ય રહ્યું છે. તેમ છતાં, ગિફ્ટ સિટી બાદ હવે પોરબંદરમાં આ પ્રકારની છૂટછાટ આપવાનો નિર્ણય લેવામાં આવ્યો છે. સરકારનું માનવું છે કે આજના પ્રવાસીઓને એક જ સ્થળે તમામ સુવિધાઓ ઉપલબ્ધ હોય તેવું માહોલ જોઈએ છે, અને આ નિર્ણયથી પોરબંદરમાં પ્રવાસનને પ્રોત્સાહન મળશે.
સરકારના આ નિર્ણય બાદ, શહેરની એક થ્રી-સ્ટાર હોટલને દારૂ વેચાણ માટે લાઇસન્સ પણ આપવામાં આવ્યું છે. આ હોટેલ પોતાના પરિસરમાં વાઇન શોપ ચલાવી શકશે. જો કે, દારૂ ફક્ત માન્ય પરમિટ ધરાવતા લોકો અને પ્રવાસીઓને જ પીરસવામાં આવશે. આ સાથે, દારૂબંધી કાયદાના તમામ નિયમોનું કડક પાલન ફરજિયાત રહેશે.
આ પ્રક્રિયામાં અનેક સ્તરે તપાસ અને દેખરેખ રાખવામાં આવશે. જિલ્લા પ્રતિબંધ સમિતિ અને કલેક્ટર દ્વારા મંજૂરીની સમીક્ષા કરવામાં આવશે. હોટલની આસપાસ કોઈ શૈક્ષણિક કે ધાર્મિક સંસ્થાઓ ન હોય તે પણ ચકાસવામાં આવશે. ઉપરાંત, પોલીસ ચકાસણી બાદ જ અંતિમ મંજૂરી આપવામાં આવશે. દારૂના વેચાણ અને ઉપયોગ પર નજર રાખવા માટે નશાબંધી અને આબકારી વિભાગ સાથે પોલીસ તંત્ર પણ સક્રિય રહેશે.
આ નિર્ણયને લઈને રાજકીય પ્રતિક્રિયાઓ પણ સામે આવી છે. વિરોધ પક્ષ કોંગ્રેસ અને કેટલાક ગાંધીવાદી વિચારો ધરાવતા લોકો દ્વારા આ પગલાની ટીકા કરવામાં આવી છે. તેમનું કહેવું છે કે Mahatma Gandhiના જન્મસ્થળ પર આવી મંજૂરી આપવી તેમના સિદ્ધાંતોના વિરુદ્ધ છે.
ઉલ્લેખનીય છે કે મહાત્મા ગાંધીનો જન્મ 2 ઓક્ટોબર, 1869ના રોજ પોરબંદરમાં થયો હતો, અને તેમનું પૌરાણિક નિવાસસ્થાન આજે પણ શહેરમાં અસ્તિત્વમાં છે, જે દેશ-વિદેશના પ્રવાસીઓ માટે આકર્ષણનું કેન્દ્ર છે.
