Breaking News: રેલવેનો ‘મોટો નિર્ણય’! હવે કેમેરામાં કેદ થશે ‘ટિકિટ ચેકિંગ’, ‘TTE’ નવા અવતારમાં જોવા મળશે
ભારતીય રેલવે હંમેશા મુસાફરોની સુવિધા અને સુરક્ષા માટે નવા પ્રયત્નો કરતી રહે છે. આ દિશામાં આગળ વધતા રેલવેએ હવે ટિકિટ ચેકિંગની પદ્ધતિમાં એક ખાસ ફેરફાર કર્યો છે.
ભારતીય રેલવે હવે ટિકિટ ચેકિંગ સિસ્ટમને સંપૂર્ણપણે હાઈ-ટેક બનાવવાની તૈયારીમાં છે. ટૂંક સમયમાં ટ્રેનમાં ટિકિટ ચેક કરતા TTE (ટ્રાવેલિંગ ટિકિટ એક્ઝામિનર) બોડી કેમેરા પહેરીને ફરજ બજાવતા જોવા મળશે. રેલવેનું માનવું છે કે, આ નવી સિસ્ટમથી મુસાફરો અને TTE બંનેની સુરક્ષા વધશે. આ સાથે જ વિવાદો અને ખોટી ફરિયાદો પર પણ રોક લાગશે.
રેલવેની આ નવી પહેલ હેઠળ ટિકિટ ચેકિંગ દરમિયાન થતી દરેક પ્રવૃત્તિ કેમેરામાં રેકોર્ડ થશે. ટૂંકમાં, હવે ટ્રેનમાં થતી દલીલો, વિવાદ કે ગેરવર્તણૂકનો સંપૂર્ણ વીડિયો પુરાવા તરીકે ઉપલબ્ધ રહેશે. રેલવે દ્વારા TTEને આપવામાં આવનારા 'બોડી કેમેરા' નાના અને આધુનિક ફીચર્સથી સજ્જ હશે. આ કેમેરામાં HD વીડિયો રેકોર્ડિંગ, નાઈટ વિઝન અને ઓડિયો રેકોર્ડિંગ જેવી સુવિધાઓ હશે. સૌથી ખાસ વાત એ છે કે, કેમેરામાં લગભગ 20 કલાક સુધીનું બેટરી બેકઅપ મળશે, જેથી લાંબા અંતરની ટ્રેનોમાં પણ રેકોર્ડિંગ ચાલુ રાખી શકાશે. આ ઉપરાંત કેમેરાને 'ટેમ્પર-પ્રૂફ' બનાવવામાં આવ્યા છે, એટલે કે રેકોર્ડિંગ સાથે છેડછાડ કરવી સરળ રહેશે નહીં.
રેલવેએ હાલમાં આ નવી વ્યવસ્થાને પાયલોટ પ્રોજેક્ટ તરીકે કેટલાક ડિવિઝનમાં શરૂ કરી છે. આમાં મુંબઈ, વોલ્ટેયર (વિશાખાપટ્ટનમ વિભાગ) અને રાયપુર ડિવિઝનનો સમાવેશ થાય છે. આ વિસ્તારોમાં TTEને બોડી કેમેરા વાપરવાની ખાસ તાલીમ પણ આપવામાં આવી છે. રેલવે અધિકારીઓનું કહેવું છે કે, જો શરૂઆતના પરિણામો સારા આવશે તો તેને દેશભરમાં લાગુ કરવામાં આવી શકે છે.
રેલવેના જણાવ્યા અનુસાર, ઘણીવાર ટિકિટ ચેકિંગ દરમિયાન મુસાફરો અને TTE વચ્ચે વિવાદ થઈ જતો હોય છે. કેટલાક કિસ્સાઓમાં ખોટી ફરિયાદો પણ સામે આવે છે. હવે કેમેરાનું રેકોર્ડિંગ આવા કિસ્સાઓમાં પુરાવા તરીકે કામ કરશે. આનાથી TTE પર ખોટા આરોપો લાગવાની શક્યતા ઘટશે અને મુસાફરોની ફરિયાદોની પણ સાચી તપાસ થઈ શકશે. રેલવેનું કહેવું છે કે, આનાથી ટ્રેનમાં શિસ્ત અને પારદર્શિતા વધશે.
છેલ્લા કેટલાક વર્ષોમાં ભારતીય રેલવે સતત નવી ટેકનોલોજીનો ઉપયોગ વધારી રહી છે. ઓનલાઈન ટિકિટિંગ, AI આધારિત દેખરેખ અને સ્માર્ટ સ્ટેશન પછી હવે બોડી કેમેરા સિસ્ટમને પણ આ દિશામાં એક મોટું પગલું માનવામાં આવી રહ્યું છે.
