FASTag New Rules : 15 નવેમ્બરથી Toll Plaza ના નિયમોમાં ફેરફાર, જો જો બમણો ટોલ ન ભરવો પડે
15 નવેમ્બર, 2025 થી FASTag ના નવા નિયમો અમલમાં આવશે. જો વાહનમાં માન્ય FASTag ન હોય કે કામ ન કરતું હોય, તો રોકડથી બમણો ટોલ ભરવો પડશે. જોકે રોકડ ની જગ્યાએ હવેથી ડિજિટલ સુવિધા મળી રહેવાની છે.
ઉદાહરણ તરીકે જો તમારા વાહનનો ટોલ ₹100 છે, તો FASTag સારી રીતે કામ કરી રહ્યું હોય તો તમે ₹100 ચૂકવશો. જો FASTag નિષ્ફળ જાય છે અને તમે રોકડથી ચુકવણી કરો છો, તો તમારે ₹200 ચૂકવવા પડશે. પરંતુ જો FASTag નિષ્ફળ જાય છે અને તમે UPI વડે ચુકવણી કરો છો, તો તમારે ફક્ત ₹125 ચૂકવવા પડશે. એટલે કે, ડિજિટલ ચુકવણી કરવાથી સીધી રાહત મળશે, જ્યારે રોકડ વ્યવહારો પર વધુ ફી લાગશે.
કેન્દ્રીય માર્ગ પરિવહન અને ધોરીમાર્ગ મંત્રાલય (MoRTH) અનુસાર, આ સુધારાનો મુખ્ય હેતુ ટોલ વસૂલાત પ્રણાલીને પારદર્શક બનાવવાનો છે. સરકાર રોકડ વ્યવહારો ઘટાડીને ડિજિટલ ચુકવણીને પ્રોત્સાહિત કરવા માંગે છે. આ પગલાથી ટોલ પ્લાઝા પર લાંબી કતારો ઘટશે અને મુસાફરોને વધુ ઝડપી અને સરળ મુસાફરીનો અનુભવ મળશે.
આ નવો નિયમ ખાસ કરીને એવા વાહનચાલકો માટે ફાયદાકારક સાબિત થશે જેમના FASTag કોઈ કારણસર સ્કેન થઈ શકતા નથી અથવા જેમના ટેગની સમયસીમા સમાપ્ત થઈ ગઈ છે. અગાઉ તેમને બમણો ટોલ ચૂકવવો પડતો હતો, પરંતુ હવે તેઓ UPI અથવા અન્ય ડિજિટલ માધ્યમ દ્વારા ચુકવણી કરીને રાહત મેળવી શકશે.
