ભારત સહિત વિશ્વના તમામ દેશો હાલમાં આકરી ગરમીનો સામનો કરી રહ્યા છે. પશ્ચિમ આફ્રિકાના દેશ માલીમાં રાત્રિનું તાપમાન 48 ડિગ્રી સેલ્સિયસ પર પહોંચી ગયું છે. પરંતુ શું તમે જાણો છો કે દુનિયાનું કયું સ્થળ સૌથી ગરમ છે ?
અમેરિકાના કેલિફોર્નિયામાં આવેલી 'ડેથ વેલી' પૃથ્વીની સૌથી ગરમ જગ્યા કહેવાય છે. મીડિયા રિપોર્ટ અનુસાર, અહીં સામાન્ય રીતે તાપમાન 50 ડિગ્રી સુધી રહે છે. વર્ષ 1913માં અહીંનું તાપમાન 56.7 ડિગ્રીએ પહોંચી ગયું હતું. વર્ષ 2013માં 54 ડિગ્રી તાપમાન નોંધાયું હતું. રસપ્રદ વાત એ છે કે શિયાળામાં અહીંનું તાપમાન શૂન્યથી પણ નીચે હોય છે.
ડેથ વેલીમાં સવારે 10 વાગ્યા પછી બહાર નીકળવું મુશ્કેલ બની જાય છે. તેમ છતાં અહીં 1000 વર્ષથી લોકો વસવાટ કરે છે. ડેથ વેલી અમેરિકાની ટિમ્બિશા જનજાતિનું ઘર છે, જે એક સમયે પનામિન્ટ શોશોન તરીકે જાણીતી હતી. મીડિયા અહેવાલો અનુસાર ટિમ્બિશા જનજાતિના લોકો અહીં છેલ્લા 1000 વર્ષથી રહે છે.
ટિમ્બિશા જનજાતિના લોકો સદીઓથી જાણે છે કે ડેથ વેલીમાં પાણીના સ્ત્રોત અન ખોરાક ક્યાંથી મળી શકે છે. તે અહીં જોવા મળતા જંગલી ઘેટા, સસલા અને અન્ય પ્રાણીઓની આદતોથી પરિચિત હતા. જેના કારણે તેઓ અહીં ટકી શક્યા છે.
અમેરિકાની જાહેર આરોગ્ય સંસ્થા CDC અનુસાર, ડેથ વેલીની હવા સ્વચ્છ અને સૂકી રહે છે, તેથી અહીંની માટી, ખડકો અને રેતી જેવી ઘેરા રંગની સપાટી સૂર્યની ગરમીને કારણે ખૂબ જ ગરમ થાય છે. ડેથ વેલી પણ રણને અડીને છે, જે તેને વધુ ગરમ બનાવે છે.