IND vs WI Head to Head : છેલ્લા 21 વર્ષથી વેસ્ટ ઈન્ડિઝ સામે અજેય છે ભારતીય ટીમ, સતત 9મી ટેસ્ટ સિરીઝ જીતવાની તક
India vs West Indies : ક્રિકેટના ઈતિહાસમાં એક દમદાર ટીમ રહેલી વેસ્ટ ઈન્ડિઝની ટીમ છેલ્લા 21 વર્ષથી ટેસ્ટ ફોર્મેટમાં ભારતીય ટીમ સામે એક પણ ટેસ્ટ શ્રેણી જીતી શકી નથી. આ ટીમ બે વખત વર્લ્ડ કપનો ખિતાબ જીતી ચૂકી છે. પણ આ વખતે વનડે વર્લ્ડ કપ માટે ક્વોલિફાય થઈ શકી નથી.
ભારતીય ક્રિકેટ ટીમે છેલ્લા કેટલાક વર્ષોમાં ટેસ્ટ ક્રિકેટમાં ઘણા મોટા કારનામા કર્યા છે. ભારતીય ટીમને તેના જ ઘરઆંગણે ટેસ્ટ સિરીઝમાં હરાવવી મોટી ટીમો માટે પણ લગભગ અશક્ય લાગે છે. બે વખત વર્લ્ડ ટેસ્ટ ચેમ્પિયનશિપની ફાઇનલમાં પહોંચનારી ભારત એકમાત્ર ટીમ છે. છેલ્લા 21 વર્ષથી ટેસ્ટ ફોર્મેટમાં ટીમ ઈન્ડિયા સામે વેસ્ટ ઈન્ડિઝ એક પણ ટેસ્ટ સિરીઝ જીતવામાં સફળ રહી નથી.
ભારતીય ક્રિકેટ ટીમ 1 મહિનાના વિરામ બાદ 12 જુલાઈથી વેસ્ટ ઈન્ડિઝ પ્રવાસ પર તેના અભિયાનની શરૂઆત કરવા જઈ રહી છે. ટીમ ઈન્ડિયાએ વેસ્ટ ઈન્ડિઝ સામે બે ટેસ્ટ મેચ, ત્રણ વનડે અને પાંચ ટી-20 મેચોની શ્રેણી રમવાની છે. છેલ્લા બે દાયકાથી ટીમ ઈન્ડિયા વેસ્ટ ઈન્ડિઝ વિરુદ્ધ ટેસ્ટ ક્રિકેટમાં દબદબો જમાવી રહી છે. તે 21 વર્ષથી ટીમ ઈન્ડિયાને એક પણ ટેસ્ટ શ્રેણીમાં હરાવી શકી નથી.
ટીમ ઈન્ડિયા છેલ્લે 2002માં વેસ્ટ ઈન્ડિઝ સામે ટેસ્ટ સિરીઝ હારી હતી. વર્ષ 2002 પછી ભારત અને વેસ્ટ ઈન્ડિઝ વચ્ચે કુલ 8 ટેસ્ટ શ્રેણી રમાઈ હતી, જેમાંથી ચાર શ્રેણી ભારતમાં અને 4 વેસ્ટ ઈન્ડિઝમાં રમાઈ હતી. આ તમામ ટેસ્ટ સિરીઝમાં ટીમ ઈન્ડિયાએ જીત મેળવી છે.
ટીમ ઈન્ડિયાએ વેસ્ટ ઈન્ડિઝની ધરતી પર કુલ 51 ટેસ્ટ મેચ રમી છે, જેમાંથી તેણે માત્ર 9 મેચ જીતી છે અને 16 મેચમાં હારનો સામનો કરવો પડ્યો છે જ્યારે 26 મેચ ડ્રો રહી છે.
ભારતીય ક્રિકેટ ટીમે 1952માં પ્રથમ વખત વેસ્ટ ઈન્ડિઝનો પ્રવાસ કર્યો હતો અને 1970માં પ્રથમ વખત વેસ્ટ ઈન્ડિઝ સામે ટેસ્ટ શ્રેણી જીતી હતી. બંને ટીમો વચ્ચે અત્યાર સુધીમાં કુલ 12 ટેસ્ટ સિરીઝ રમાઈ છે. તેમાંથી ટીમ ઈન્ડિયાએ 5 અને વેસ્ટ ઈન્ડિઝે 7 સીરીઝ જીતી છે.