IND vs SA શ્રેણીમાં વ્યસ્ત ઈન્ડિયાને નહીં મળે આરામ, આગામી સપ્તાહે ઓસ્ટ્રેલિયા રવાના થશે, જાણો શેડ્યૂલ
ભારતીય ટીમ (Indian Cricket Team) 4 ઓક્ટોબરે દક્ષિણ આફ્રિકા સામે છેલ્લી T20 મેચ રમશે અને તે પછી ઓસ્ટ્રેલિયા જવા રવાના થશે.
જસપ્રીત બુમરાહની ઈજાએ ટી20 વર્લ્ડ કપ પહેલા ભારતીય ટીમને ચોક્કસ ફટકો આપ્યો છે. બુમરાહના વર્લ્ડકપમાંથી બહાર થવાની સંભાવના છે. આ આંચકો છતાં ટીમ ઈન્ડિયા વર્લ્ડ કપની તૈયારીઓમાં વ્યસ્ત છે અને આ માટે તે સમય પહેલા ઓસ્ટ્રેલિયા જવા રવાના થશે, જ્યાં તે કેટલીક પ્રેક્ટિસ મેચ પણ રમશે.
ભારતીય ટીમ હાલમાં દક્ષિણ આફ્રિકા સામે T20 શ્રેણી રમી રહી છે, જેની છેલ્લી મેચ 4 ઓક્ટોબરે છે. એક મીડિયા અહેવાલ અનુસાર, આ મેચ પછી ટીમ ઈન્ડિયા તરત જ 6 ઓક્ટોબરે ઓસ્ટ્રેલિયા જવા રવાના થશે.
રિપોર્ટમાં કહેવામાં આવ્યું છે કે ભારતીય ટીમ સીધા મેલબોર્ન જવાને બદલે પર્થમાં પોતાનો કેમ્પ લગાવશે અને 13 ઓક્ટોબર સુધી અહીં પ્રેક્ટિસ કરશે. BCCI એ ટીમ ઈન્ડિયા માટે વેસ્ટર્ન ઓસ્ટ્રેલિયા સામે ટી20 મેચનું પણ આયોજન કર્યું છે, જે પર્થમાં જ રમાશે.
આ પછી, ભારતીય ટીમે વર્લ્ડ કપની બે સત્તાવાર વોર્મ-અપ મેચ રમવાની છે. ટીમ ઈન્ડિયા પહેલા 17 ઓક્ટોબરે યજમાન ઓસ્ટ્રેલિયા અને ત્યારબાદ 19 ઓક્ટોબરે ન્યૂઝીલેન્ડ સામે ટકરાશે. આ બંને મેચ બ્રિસબેનમાં રમાશે.
મુખ્ય ટૂર્નામેન્ટમાં ભારતનું અભિયાન 23 ઓક્ટોબરે પાકિસ્તાન સામે શરૂ થશે. સુપર-12માં પાકિસ્તાન ઉપરાંત દક્ષિણ આફ્રિકા અને બાંગ્લાદેશ ભારતના ગ્રુપમાં છે. તે જ સમયે, બે ટીમો પ્રથમ રાઉન્ડની મેચો પછી પોતાનું સ્થાન બનાવશે.