SA20, 2025 : કાવ્યા મારનની ટીમ ખરાબ હાલતમાં, હારની હેટ્રિક ફટકારી, ’40 બોલમાં’ મેચ હારી
બે વખતની SA20 ચેમ્પિયન સનરાઈઝર્સ ઈસ્ટર્ન કેપની હાલત ખરાબ છે. આ સિઝનમાં આ ટીમ સતત ત્રણ મેચ હારી છે. પરાજયની હેટ્રિક સેન્ચુરિયન મેદાન પર પ્રિટોરિયા કેપિટલ્સ સામે આવી, જેણે આ સનરાઈઝર્સને 6 વિકેટથી હરાવ્યું. સનરાઈઝર્સ ઈસ્ટર્ન કેપ IPL ફ્રેન્ચાઈઝી સનરાઈઝર્સ હૈદરાબાદની માલિક કાવ્યા મારનની ટીમ છે.
સેન્ચુરિયનમાં રમાયેલી મેચમાં સનરાઈઝર્સે પ્રથમ બેટિંગ કરી હતી અને પ્રથમ 40 બોલમાં તેમની હાર નિશ્ચિત થઈ ગઈ હતી. હકીકતમાં, પ્રથમ 40 બોલમાં જ અડધી ટીમ પોવેલિયન પરત ફરી ગઈ હતી. તેની 5 વિકેટ માત્ર 26 રનમાં પડી ગઈ હતી. જેક ક્રાઉલી 1 રન બનાવીને આઉટ થયો હતો. બેડિંગહામ 2, એબેલ 9 રન બનાવી શક્યો હતો.
કેપ્ટન માર્કરામ પહેલા જ બોલ પર આઉટ થયો હતો. વિકેટકીપર ટ્રિસ્ટન સ્ટબ્સ 11 રન બનાવીને આઉટ થયો હતો. માર્કો જેન્સને સાતમા નંબર પર શાનદાર અડધી સદી ફટકારી અને ત્યારે આ ટીમ સ્કોર 100ને પાર કરી શકી હતી. જેન્સને 35 બોલમાં 51 રનની ઈનિંગ રમી હતી. આ ખેલાડીએ 3 છગ્ગા અને 4 ચોગ્ગા ફટકાર્યા હતા.
પ્રથમ બેટિંગ કરતા સનરાઈઝર્સની ટીમ માત્ર 113 રનમાં ઓલઆઉટ થઈ ગઈ હતી અને તેના જવાબમાં પ્રિટોરિયા કેપિટલ્સે 16 ઓવરમાં 4 વિકેટ ગુમાવીને લક્ષ્યાંક હાંસલ કરી લીધો હતો. પ્રિટોરિયાની જીતનો હીરો ફાસ્ટ બોલર એથન બોશ હતો જેણે 4 ઓવરમાં માત્ર 18 રન આપીને 2 વિકેટ ઝડપી હતી.
પ્રિટોરિયા કેપિટલ્સને વિજય હાંસલ કરવામાં વધુ મુશ્કેલીનો સામનો કરવો પડ્યો ન હતો. રૂસો અને વોરેન પણ વહેલા આઉટ થઈ ગયા હતા પરંતુ વિલ જેક્સના 27 રન અને માર્કસ એકરમેનના અણનમ 39 રનની મદદથી ટીમને આસાનીથી જીત અપાવી હતી. સવાલ એ છે કે સનરાઈઝર્સ ટીમને આ સિઝનમાં પહેલી જીત ક્યારે મળશે?
સનરાઈઝર્સ ઈસ્ટર્ન કેપ આ સિઝનમાં એકતરફી મુકાબલામાં ત્રણેય મેચ હારી છે. આ ટીમ MI કેપટાઉન સામે 97 રનથી હારી ગઈ હતી. પાર્લ રોયલ્સ સામે 9 વિકેટે હાર્યું હતું અને હવે પ્રિટોરિયાએ તેને 6 વિકેટથી હરાવ્યું છે. મોટી સમસ્યા એ છે કે સનરાઈઝર્સનો નેટ રન રેટ પણ -2.423 છે. (All Photo Credit : X / INSTAGRAM)
