13 હજારથી વધુ રન અને વર્લ્ડ કપમાં ડબલ સેન્ચુરી ફટકારનાર ખેલાડીએ અચાનક કરી સંન્યાસની જાહેરાત
ન્યુઝીલેન્ડના અનુભવી બેટ્સમેને અચાનક જ આંતરરાષ્ટ્રીય ક્રિકેટમાંથી નિવૃત્તિ લેવાની જાહેરાત કરી દીધી છે. આ ખેલાડીએ તેની છેલ્લી આંતરરાષ્ટ્રીય ક્રિકેટ મેચ 2 વર્ષ પહેલા રમી હતી. આ ખેલાડી T20 ફોર્મેટમાં પોતાના દેશ માટે સૌથી વધુ રન બનાવનાર ખેલાડી પણ છે.
ન્યુઝીલેન્ડના અનુભવી બેટ્સમેન માર્ટિન ગપ્ટિલે આંતરરાષ્ટ્રીય ક્રિકેટમાંથી નિવૃત્તિ લેવાની સત્તાવાર જાહેરાત કરી છે. 2009માં પોતાની આંતરરાષ્ટ્રીય કારકિર્દી શરૂ કરનાર માર્ટિન ગપ્ટિલ છેલ્લા બે વર્ષથી ન્યુઝીલેન્ડની ટીમનો ભાગ નહોતો.
માર્ટિન ગપ્ટિલ ન્યુઝીલેન્ડ માટે ત્રણેય ફોર્મેટમાં રમ્યો છે. આ સાથે તેની 14 વર્ષની લાંબી આંતરરાષ્ટ્રીય કારકિર્દીનો અંત આવી ગયો છે. આ દરમિયાન તેણે ન્યુઝીલેન્ડ ટીમ માટે ઘણા મોટા રેકોર્ડ બનાવ્યા. જો કે, તે હજુ પણ T20 લીગ ક્રિકેટમાં રમવાનું ચાલુ રાખશે.
માર્ટિન ગપ્ટિલ T20I ફોર્મેટમાં ન્યુઝીલેન્ડ માટે સૌથી વધુ રન બનાવનાર બેટ્સમેન છે. આ સિવાય તેણે વનડે વર્લ્ડ કપમાં બેવડી સદી ફટકારવાની સિદ્ધિ પણ હાંસલ કરી છે. તેણે 2015 ODI વર્લ્ડ કપ દરમિયાન આ બેવડી સદી ફટકારી હતી. આ સિવાય તે ન્યુઝીલેન્ડ માટે વનડેમાં ત્રીજો સૌથી વધુ રન બનાવનાર બેટ્સમેન પણ છે.
પોતાની નિવૃત્તિની જાહેરાત કરતા માર્ટિન ગપ્ટિલે કહ્યું, 'નાના બાળક તરીકે ન્યુઝીલેન્ડ માટે રમવું હંમેશા મારું સપનું હતું અને હું મારા દેશ માટે 367 મેચ રમી શકવા બદલ અવિશ્વસનીય રીતે ભાગ્યશાળી અને ગર્વ અનુભવું છું.'
માર્ટિન ગપ્ટિલે તેની આંતરરાષ્ટ્રીય કારકિર્દી દરમિયાન ન્યુઝીલેન્ડ માટે કુલ 198 ODI, 122 T20 અને 47 ટેસ્ટ મેચ રમી છે. તેણે ટેસ્ટમાં 17 અડધી સદી અને 3 સદીની મદદથી 2586 રન બનાવ્યા છે. વનડેમાં ગપ્ટિલે 41.73ની એવરેજથી 7346 રન બનાવ્યા, જેમાં તેણે 39 અડધી સદી અને 18 સદી ફટકારી. T20Iમાં તેના નામે 31.81 ની સરેરાશથી 3531 રન છે. આ સિવાય તેણે 20 અડધી સદી ઉપરાંત T20Iમાં 2 સદી પણ ફટકારી છે. (All Photo Credit : PTI / ESPN/ ICC)
Published On - 6:24 pm, Wed, 8 January 25