IPL 2022: ‘બેબી ડિવિલિયર્સ’ થી લઇને વિશ્વ ચેમ્પિયન કેપ્ટન સહિતના ચહેરા પ્રથમ વાર ટૂર્નામેન્ટમાં ધમાલ મચાવતા નજર આવશે
IPL 2022 ની ટૂર્નામેન્ટમાં મેદાને ઉતરીને કેટલાક ચહેરા પોતાનુ આઇપીએલ કરીયર શરુ કરી રહ્યા છે, જેમાં ભારતીય યુવા ટીમના કેપ્ટન યશ ઢૂલનો પણ સમાવેશ છે. આ ઉપરાંત ઓલરાઉન્ડ અને હિટીંગ માટે જાણીતા બનેલા યુવાનો પણ જોવા મળશે.
IPL 2022 ની હરાજીમાં, ટીમો દ્વારા પ્રથમ વખત આ લીગમાં ભાગ લેવા માટે ઘણા ખેલાડીઓની પસંદગી કરવામાં આવી હતી. તેમાંથી કેટલાક આંતરરાષ્ટ્રીય સ્તરે પોતાની ઓળખ બનાવી ચૂક્યા છે તો કેટલાક આ વર્ષે યોજાયેલા અંડર-19 વર્લ્ડ કપમાં ચમક્યા હતા. જાણો એવા ખેલાડીઓ વિશે જેઓ પોતાની ડેબ્યૂ સિઝનમાં તોફાન મચાવી શકે છે.
ટીમ ઈન્ડિયાના અંડર 19 વર્લ્ડ ચેમ્પિયન કેપ્ટન યશ ઢૂલ પર પણ આ આઈપીએલ પર તમામની નજર રહેશે. આ જમણા હાથના બેટ્સમેનને દિલ્હી કેપિટલ્સે ખરીદ્યો છે. ઢૂલ રણજી ટ્રોફીમાં પદાર્પણ કરતી વખતે બે સદી ફટકારીને પોતાને સાબિત કર્યું. તેણે અંડર 19 વર્લ્ડ કપની સેમીફાઈનલમાં પણ સદી ફટકારી હતી.
કર્ણાટકના અભિનવ મનોહર માટે પણ આ IPL ખૂબ જ મહત્વપૂર્ણ છે. આ 27 વર્ષીય બેટ્સમેન હિટીંગ માટે જાણીતો છે. ગુજરાત ટાઇટન્સે તેને 2.60 કરોડ રૂપિયામાં પોતાની સાથે જોડી દીધો છે. તેણે સૈયદ મુશ્તાક અલી ટ્રોફીમાં પણ મહત્વની ઇનિંગ્સ રમી હતી.
રાજવર્ધન હંગરગેકરે આ વર્ષે અંડર 19 વર્લ્ડ કપમાં ભારત માટે શાનદાર રમત બતાવી હતી. તે આ વર્ષે ચેન્નાઈ સુપર કિંગ્સ તરફથી રમવા જઈ રહ્યો છે. દીપક ચહરની ઈજાના કારણે તેને તક આપવામાં આવી શકે છે. તેને ડોમેસ્ટિક ક્રિકેટમાં ફિનિશર તરીકે પણ ઓળખવામાં આવે છે.
વેસ્ટ ઈન્ડિઝનો રોવમેન પોવેલ તેની તોફાની બેટિંગ માટે જાણીતો છે. તેણે આ વર્ષે જાન્યુઆરીમાં ઈંગ્લેન્ડ સામે ટી20 સીરીઝમાં સદી ફટકારી હતી. દિલ્હી કેપિટલ્સે તેને 2.80 કરોડમાં ખરીદ્યો હતો. પોવેલ દિલ્હી માટે ફિનિશરની ભૂમિકા ભજવી શકે છે. તેમજ મધ્યમ બોલિંગ તેને ટૂંકા ફોર્મેટની રમતમાં મહત્વની સંપત્તિ બનાવે છે.
મુંબઈએ અંડર 19 વર્લ્ડ કપમાં ડેવાલ્ડ બ્રેવિસનો સમાવેશ પોતાની ટીમમાં કર્યો છે, જે બેબી ડી વિલિયર્સ તરીકે જાણીતો છે. તેણે ICC અંડર 19 વર્લ્ડ કપમાં સૌથી વધુ 506 રન બનાવ્યા હતા અને ભારતના શિખર ધવનના 505 રન (2004) ના રેકોર્ડને પણ તોડ્યો હતો. તે સ્પિન બોલિંગ પણ કરે છે.