IPL 2022: લસિથ મલિંગાની બરાબરી પર પહોંચ્યો Dwayne Bravo, સેમ બીલિંગ્સની વિકેટ ઝડપતા જ આ ઉપલબ્ધી હાંસલ કરી
બ્રાવોએ કોલકાતા સામેની મેચમાં ત્રણ વિકેટ લીધી અને આ સાથે તેની આઈપીએલ વિકેટની સંખ્યા 170 પર પહોંચી ગઈ છે. આ સાથે બ્રાવોએ IPLમાં સૌથી વધુ વિકેટ લેવાના રેકોર્ડમાં મલિંગાની બરાબરી કરી લીધી છે.
વર્તમાન વિજેતા ચેન્નાઈ સુપર કિંગ્સ IPL-2022ની શરૂઆત જીત સાથે કરી શકી નથી. કોલકાતા નાઈટ રાઈડર્સે શનિવારે પ્રથમ મેચમાં તેને છ વિકેટે હરાવ્યુ હતો. પ્રથમ બેટિંગ કરતા ચેન્નાઈએ 131 રન બનાવ્યા અને કોલકાતાએ 19.3 ઓવરમાં આ લક્ષ્યાંક હાંસલ કર્યો. જોકે, ચેન્નાઈ ભલે જીત્યું ન હોય, પરંતુ તેના એક જૂના ખેલાડીએ મોટી સિદ્ધિ હાંસલ કરી છે. આ ખેલાડીનું નામ છે ડ્વેન બ્રાવો.
બ્રાવોએ આ મેચમાં ત્રણ વિકેટ લીધી અને આ સાથે તેની આઈપીએલ વિકેટની સંખ્યા 170 પર પહોંચી ગઈ છે. આ સાથે બ્રાવોએ IPLમાં સૌથી વધુ વિકેટ લેવાના મામલે લસિથ મલિંગાની બરાબરી કરી લીધી છે. આ બંનેના નામે 170-170 વિકેટ છે. મલિંગાના નામે 122 મેચમાં આટલી વિકેટ છે જ્યારે બ્રાવોએ અહીં સુધી પહોંચવામાં 151 મેચ લીધી છે.
સૌથી વધુ વિકેટ લેવાના મામલામાં બ્રાવો અને મલિંગા પછી જો કોઈનું નામ આવે છે તો તે લેગ સ્પિનર અમિત મિશ્રાનું છે. અમિત મિશ્રાએ આઈપીએલમાં અત્યાર સુધી 154 મેચમાં 166 વિકેટ ઝડપી છે. જોકે આ વખતે અમિતને મેગા ઓક્શનમાં ખરીદનાર મળ્યો ન હતો.
અમિત બાદ વધુ એક લેગ સ્પિનર પીયૂષ ચાવલાનું નામ આવે છે.ચાવલાએ 165 IPL મેચમાં 157 વિકેટ લીધી છે. ચાવલા પણ આ સિઝનમાં નથી રમી રહ્યો. તેને પણ કોઈ ખરીદનાર મળ્યો ન હતો.
ચાવલા પછી ભારતના દિગ્ગજ ઓફ સ્પિનર હરભજન સિંહ છે. હરભજન સિંહે નિવૃત્તિ લીધી છે અને તે આ સિઝનમાં IPL નથી રમી રહ્યો. તે કોમેન્ટ્રી કરી રહ્યો છે. હરભજને 160 IPL મેચમાં 150 વિકેટ લીધી છે.
Published On - 7:21 am, Sun, 27 March 22