ICC ટૂર્નામેન્ટનું કિંગ બન્યું ઓસ્ટ્રેલિયા, અંડર-19 વર્લ્ડ કપ જીતીને બનાવ્યો વર્લ્ડ રેકોર્ડ
અંડર-19 વર્લ્ડ કપનો ખિતાબ જીતીને ઓસ્ટ્રેલિયાએ ફરી એકવાર ICC ટુર્નામેન્ટમાં પોતાનો દબદબો જાળવી રાખ્યો છે. ICC ટૂર્નામેન્ટમાં ઓસ્ટ્રેલિયન ક્રિકેટ ટીમનો આ સતત ચોથો વિજય છે.
ઓસ્ટ્રેલિયાના ક્રિકેટ ઈતિહાસમાં ટીમ માટે છેલ્લા 12 મહિના શાનદાર રહ્યા છે. પછી તે ઓસ્ટ્રેલિયન મહિલા ટીમ હોય, સિનિયર મેન્સ ટીમ હોય કે અંડર-19 ટીમ. છેલ્લા એક વર્ષમાં દરેકે અદ્ભુત પ્રદર્શન કર્યું છે. ખાસ કરીને આઈસીસી ટુર્નામેન્ટમાં ઓસ્ટ્રેલિયાએ પોતાનો દબદબો જમાવ્યો છે. ઓસ્ટ્રેલિયાની ટીમે 11 ફેબ્રુઆરીએ અંડર-19 વર્લ્ડ કપનો ખિતાબ જીતીને ઈતિહાસ રચ્યો છે. ઓસ્ટ્રેલિયા સતત ચાર ICC ટૂર્નામેન્ટ જીતનાર પ્રથમ દેશ બની ગયો છે.
ICC ટૂર્નામેન્ટ્સ જીતવાનો ઓસ્ટ્રેલિયાનો વિજયી સિલસિલો ODI વર્લ્ડ કપમાં પણ ચાલુ રહ્યો. આ ટુર્નામેન્ટની ફાઇનલમાં ઓસ્ટ્રેલિયાની પુરૂષ ટીમે ફરી એકવાર ભારતીય ટીમને હરાવ્યું હતું. આ રોમાંચક ટાઈટલ મેચમાં ઓસ્ટ્રેલિયાએ 6 વિકેટે જીત મેળવી હતી અને આઈસીસી ટુર્નામેન્ટની જીતની હેટ્રિક લગાવી હતી.
વિમેન્સ અને સિનિયર મેન્સ ઓસ્ટ્રેલિયન ટીમની જેમ અંડર-19 કાંગારૂ ટીમે પણ તાકાત બતાવી હતી. અંડર-19 વર્લ્ડ કપની ફાઇનલમાં ઓસ્ટ્રેલિયાએ ભારતને હરાવ્યું હતું. આ ટાઇટલ મેચમાં ઓસ્ટ્રેલિયાએ 79 રને જીત મેળવી અને સતત ચોથી ICC ટૂર્નામેન્ટ જીતી લીધી. આ ટાઈટલ સાથે ઓસ્ટ્રેલિયાની ટીમ ક્રિકેટ ઈતિહાસમાં સતત ચાર આઈસીસી ટૂર્નામેન્ટ જીતનારી પ્રથમ ટીમ બની ગઈ છે.
મહિલા ટીમે ટી-20 વર્લ્ડ કપ 2023માં છેલ્લી ચાર ICC ટૂર્નામેન્ટમાં ઓસ્ટ્રેલિયાનું પ્રથમ ટાઇટલ જીત્યું હતું. 26 ફેબ્રુઆરી 2023ના રોજ ઓસ્ટ્રેલિયન મહિલા ટીમે ફાઈનલ મેચમાં દક્ષિણ આફ્રિકાની મહિલા ટીમને 19 રનથી હરાવીને ખિતાબ જીત્યો હતો.
T20 વર્લ્ડ કપ પછી, ઓસ્ટ્રેલિયન મેન્સ ટીમે આગામી ICC ટાઇટલ, વર્લ્ડ ટેસ્ટ ચેમ્પિયનશિપ જીતી. આ ચેમ્પિયનશિપની ફાઈનલ મેચમાં કાંગારૂ ટીમે ભારતને 209 રનના વિશાળ અંતરથી હરાવ્યું હતું. આઈસીસી ટૂર્નામેન્ટમાં ઓસ્ટ્રેલિયાનો આ સતત બીજો વિજય હતો.