આ ભારતીય દિગ્ગજને ડી વિલિયર્સ-એલિસ્ટર કૂક સાથે ICC હોલ ઓફ ફેમમાં સામેલ કરવામાં આવ્યા
ICCએ 3 નવા દિગ્ગજ ક્રિકેટરોને હોલ ઓફ ફેમમાં સામેલ કર્યા છે. આ વખતે આ સન્માન સાઉથ આફ્રિકાના દિગ્ગજ એબી ડી વિલિયર્સ, ઈંગ્લેન્ડના એલિસ્ટર કૂકની સાથે ભારતીય અનુભવી નીતુ ડેવિડને મળ્યું છે. નીતુ ડેવિડ ICC હોલ ઓફ ફેમની યાદીમાં સામેલ થનારી બીજી ભારતીય મહિલા ખેલાડી છે.
ICCએ એક મોટી જાહેરાત કરી છે. બુધવારે 16 ઓક્ટોબરના રોજ, ICCએ 3 નવા દિગ્ગજ ક્રિકેટરોને હોલ ઓફ ફેમમાં સામેલ કર્યા. આ વખતે આ સન્માન સાઉથ આફ્રિકાના દિગ્ગજ એબી ડી વિલિયર્સ, ઈંગ્લેન્ડના એલિસ્ટર કૂકની સાથે ભારતીય અનુભવી નીતુ ડેવિડને મળ્યું છે. ICC હોલ ઓફ ફેમ લિસ્ટમાં કૂક 113માં, નીતુ ડેવિડ 114માં અને ડી વિલિયર્સ 115માં ક્રમે છે.
મહિલા T20 વર્લ્ડ કપ 2024 ટુર્નામેન્ટના અંતિમ તબક્કા દરમિયાન આ સન્માન સમારોહ દુબઈમાં ઉજવવામાં આવશે. તમને જણાવી દઈએ કે ICC હોલ ફેમની શરૂઆત 2009માં થઈ હતી. આ દ્વારા ICC ક્રિકેટના મહાન ખેલાડીઓનું સન્માન કરે છે.
ભારતીય મહિલા ક્રિકેટ દિગ્ગજ નીતુ ડેવિડ ICC હોલ ઓફ ફેમની યાદીમાં સામેલ થનારી બીજી ભારતીય મહિલા ખેલાડી છે. તે ટીમ ઈન્ડિયાની શ્રેષ્ઠ સ્પિનરોમાંથી એક હતી. તેણે ભારતીય ટીમ માટે 97 વનડે અને 10 ટેસ્ટ મેચ રમી છે. તેની કારકિર્દી દરમિયાન, નીતુએ વનડેમાં 16.34ની એવરેજથી 141 વિકેટ અને ટેસ્ટમાં 18.90ની એવરેજથી 41 વિકેટ લીધી હતી. એટલું જ નહીં, તે 100 ODI વિકેટ લેનારી પ્રથમ ભારતીય મહિલા ક્રિકેટર પણ છે. નીતુની કારકિર્દી 13 વર્ષ સુધી ચાલી. તેણે 1995માં આંતરરાષ્ટ્રીય ક્રિકેટમાં પ્રવેશ કર્યો હતો, જ્યારે તેની છેલ્લી મેચ 2008માં રમી હતી.
મેન્સ ક્રિકેટમાં દક્ષિણ આફ્રિકાનો એબી ડી વિલિયર્સ તેની અનોખી બેટિંગ શૈલી માટે જાણીતો છે. તેની પાસે ક્રિકેટના મેદાન પર તમામ દિશામાં શોટ રમવાની ક્ષમતા હતી. એટલા માટે તેને 'મિસ્ટર 360' તરીકે પણ ઓળખવામાં આવે છે. ક્રિકેટમાં તેમના યોગદાનને ધ્યાનમાં રાખીને ICCએ તેમને હોલ ઓફ ફેમની યાદીમાં પણ સામેલ કર્યો છે. ડી વિલિયર્સની કારકિર્દી લગભગ 14 વર્ષ સુધી ચાલી. આ સમયગાળા દરમિયાન તેણે ત્રણેય ફોર્મેટમાં 20 હજારથી વધુ રન બનાવ્યા. ડી વિલિયર્સે 114 ટેસ્ટમાં 50ની એવરેજથી 8765 રન, 228 વનડેમાં 53ની એવરેજથી 9577 રન અને 78 T20માં 26ની એવરેજથી 1672 રન બનાવ્યા છે.
ICCએ આ વર્ષની હોલ ઓફ ફેમ યાદીમાં ઈંગ્લેન્ડના દિગ્ગજ ક્રિકેટર એલિસ્ટર કૂકનો પણ સમાવેશ કર્યો છે. તેની ગણતરી ક્રિકેટના શ્રેષ્ઠ ઓપનરોમાં થાય છે. તે ઈંગ્લેન્ડ માટે ટેસ્ટમાં બીજો સૌથી વધુ રન બનાવનાર બેટ્સમેન પણ છે. 12 વર્ષની કારકિર્દીમાં કુકે 161 ટેસ્ટ રમી, જેમાં તેણે 45ની એવરેજથી 12472 રન બનાવ્યા, જ્યારે તેણે 92 ODI મેચોમાં 3204 રન બનાવ્યા. કૂકે માત્ર 4 T20 મેચ રમી છે, જેમાં તેણે 15ની એવરેજથી 61 રન બનાવ્યા છે. (All Photo Credit : PTI/AFP/ICC)