ચારે બાજુ સ્મશાન જેવો માહોલ, જ્યાં જુઓ ત્યાં કણસતા જખ્મી લોકો, હરદા ફટાકડા ફેક્ટરીમાં થયેલા વિસ્ફોટની સામે આવી ભયાનક તસવીરો
મધ્યપ્રદેશના હરદામાં ફટાકડાની ફેક્ટરીમાં થયેલા વિસ્ફોટના ભયાનક દૃશ્યો સામે આવ્યા છે. આ બ્લાસ્ટ એટલો ભીષણ હતો કે આજુબાજુના રસ્તા પરથી પસાર થઈ રહેલા લોકો પણ તેની ઝપેટમાં આવી ગયા હતા. બ્લાસ્ટની ઘટનાને રેકોર્ડ કરનારા ખુદ પણ સ્ટને કારણે ઉડેલા કાટમાળમાં ઈજાગ્રસ્ત થયા હતા. જુઓ આ ભયાનક બ્લાસ્ટ તસવીરો
હરદામાં નર્મદાપુરમ સહિત આસપાસના વિસ્તારમાં 14 ડૉક્ટર તાત્કાલિક રવાના થઈ ગયા હતા. હરદામાં 20 એમ્બ્યુલન્સ હાજર હતી અને વધુ 50 પહોંચી ચુકી છે. ભોપાલ, ઈંદોર, બૈતુલ, નર્મદાપુરમ, ભેરુંદા, રેહટી સહિત અન્ય નગર નિગમ અને સંસ્થાઓથી ફાયર બ્રિગેડના જવાનોને હરદા મોકલવામાં આવ્યા છે.
વિસ્ફોટના કારણે આસપાસના ઘરો પણ ધ્રુજી ગયા હતા જ્યારે જે ફેક્ટરીમાં બ્લાસ્ટ થયો તે તો સંપૂર્ણપણે ધરાશાયી થઈ ગઈ છે.
આ ઘટનાને કારણે રહેણાંક વિસ્તારમાં ફટાકડા ફેક્ટરી સ્થાપવાને લઈને ફરી એકવાર સવાલ ઉઠ્યા છે. આ વિસ્ફોટના કારણે હરદાના બૈરાગઢ વિસ્તારમાં આજુબાજુના ઘરોને પણ નુકસાન પહોંચ્યુ છે.
આ વિસ્તારમાં ધાબા પર ગેરકાયદે રીતે ફટાકડા બનાવવામાં આવે છે. એવુ પણ જાણવા મળી રહ્યુ છે કે દુર્ઘટના સમયે 50 થી 60 લોકો હાજર હતા, હજુ પણ એવી આશંકા છે કે લોકો અહીં ફસાયેલા છે.
ફટાકડા ફેક્ટરીમાં આ લખાય છે ત્યા સુધીમાં 11 લોકોના મોત થઈ ચુક્યા છે, હજુ મોતનો આંક વધે તેવી આશંકા પણ સેવાઈ રહી છે. જ્યારે 74 લોકો આગની ચપેટમાં આવતા ગંભીર રીતે દાઝ્યા છે.
ઘટનાસ્થળે પહોંચેલા ફાયર બ્રિગેડના જવાનો સતત એ જહેમતમાં લાગેલા છે કે કોઈપણ રીતે આગ પર કાબુ કરી લેવામાં આવે. આગ પર કાબુ કરવામાં વિલંબ થવાનું એક કારણ એ પણ છે કે ત્યાં ફટાકડા રાખેલા છે અને તેના કારણે આગ સતત ભડકી રહી છે.
