Canada Visa : એપ્લાય કરવાના કેટલા દિવસ પછી મળે છે કેનેડાના વિઝા ? સરકારે અપડેટ કર્યો પ્રોસેસિંગ ટાઈમ
IRCC એ કેનેડા વિઝાના પ્રોસેસિંગ ટાઈમ અપડેટ કર્યા છે. વર્ક, સ્ટડી, વિઝિટર અને સુપર વિઝા માટે નવા સમય જાહેર થયા છે. ભારતીયો માટે સુપર વિઝા ઝડપી બન્યા છે, જ્યારે પાકિસ્તાન માટે વર્ક-સ્ટડી વિઝામાં રાહત મળી છે.
કેનેડામાં અભ્યાસ, નોકરી અથવા પ્રવાસનું આયોજન કરી રહેલા લોકો માટે મહત્વના સમાચાર સામે આવ્યા છે. કેનેડાના ઇમિગ્રેશન, રેફ્યુજીસ એન્ડ સિટિઝનશિપ કેનેડા (IRCC) વિભાગે વિવિધ પ્રકારની કામચલાઉ નિવાસ અરજીઓ માટે નવા પ્રોસેસિંગ સમય જાહેર કર્યા છે. નવા અપડેટ મુજબ ભારત અને પાકિસ્તાનના અરજદારોને કેટલીક કેટેગરીમાં રાહત મળી છે, જ્યારે નાઇજીરીયા અને અમેરિકાના કેટલાક અરજદારો માટે રાહ જોવાનો સમય વધ્યો છે.
પાકિસ્તાનના અરજદારો માટે વર્ક પરમિટની પ્રક્રિયા હવે વધુ ઝડપી બની છે. અગાઉ 8 અઠવાડિયા લાગતા હતા, જ્યારે હવે માત્ર 6 અઠવાડિયામાં પ્રક્રિયા પૂર્ણ થવાની શક્યતા છે. ભારત માટે વર્ક પરમિટનો પ્રોસેસિંગ સમય 9 અઠવાડિયા પર યથાવત્ રાખવામાં આવ્યો છે. કેનેડાની અંદરથી સબમિટ થતી વર્ક પરમિટ અરજીઓ માટેનો સમય પણ 212 દિવસથી ઘટીને 206 દિવસ થયો છે. બીજી તરફ, નાઇજીરીયાના અરજદારો માટે આ સમય 6 અઠવાડિયાથી વધીને 12 અઠવાડિયા થયો છે. જ્યારે અમેરિકા અને ફિલિપાઇન્સ માટે અનુક્રમે 5 અને 8 અઠવાડિયાનો સમય યથાવત્ છે.
સ્ટડી પરમિટ માટે પાકિસ્તાનના અરજદારોને સૌથી વધુ રાહત મળી છે. અગાઉ 11 અઠવાડિયા લાગતા હતા, જ્યારે હવે માત્ર 7 અઠવાડિયામાં પ્રક્રિયા પૂર્ણ થઈ શકે છે. ભારત માટે સ્ટડી પરમિટનો સમય 4 અઠવાડિયા પર સ્થિર છે. કેનેડાની અંદરથી સબમિટ થતી સ્ટડી પરમિટ અરજીઓ માટે 6 અઠવાડિયાનો સમય નક્કી કરવામાં આવ્યો છે. નાઇજીરીયામાં આ સમય 5 અઠવાડિયાથી વધીને 6 અઠવાડિયા થયો છે. જ્યારે અમેરિકા અને ફિલિપાઇન્સ માટે 5 અઠવાડિયાનો સમય યથાવત્ રાખવામાં આવ્યો છે.
મુલાકાતી વિઝા (Visitor Visa) માટે મોટાભાગના દેશોમાં પ્રોસેસિંગ સમય થોડો વધ્યો છે. ભારત માટે અગાઉ 27 દિવસ લાગતા હતા, જે હવે વધીને 28 દિવસ થયા છે. અમેરિકાના અરજદારો માટે આ સમય 22 દિવસથી વધીને 25 દિવસ થયો છે, જ્યારે ફિલિપાઇન્સ માટે 18 દિવસથી વધીને 20 દિવસ થયો છે. કેનેડાની અંદરથી કરવામાં આવતી વિઝિટર વિઝા અરજીઓ માટેનો સમય 11 દિવસથી વધીને 16 દિવસ થયો છે. પાકિસ્તાન માટે સમય 50 દિવસ પર સ્થિર રહ્યો છે, જ્યારે નાઇજીરીયામાં 47 દિવસથી વધીને 48 દિવસ થયો છે.
સુપર વિઝા માટે ભારત અને પાકિસ્તાનના અરજદારોને સૌથી વધુ ફાયદો થયો છે. ભારત માટે પ્રોસેસિંગ સમય 160 દિવસથી ઘટીને 117 દિવસ થયો છે, એટલે કે 43 દિવસનો ઘટાડો નોંધાયો છે. પાકિસ્તાનમાં આ સમય 107 દિવસથી ઘટીને 75 દિવસ થયો છે. જોકે, અમેરિકાના અરજદારો માટે સુપર વિઝાનો સમય 103 દિવસથી વધીને 115 દિવસ થયો છે. નાઇજીરીયામાં 35 દિવસથી વધીને 37 દિવસ થયો છે, જ્યારે ફિલિપાઇન્સમાં 32 દિવસનો સમય યથાવત્ રહ્યો છે.
IRCC દ્વારા જાહેર કરાયેલા નવા આંકડાઓ દર્શાવે છે કે કેટલાક દેશોના અરજદારો માટે પ્રક્રિયા વધુ ઝડપી બની રહી છે, જ્યારે કેટલાક માટે રાહ જોવાનો સમય વધ્યો છે. કેનેડા જવાની યોજના બનાવી રહેલા અરજદારોએ અરજી કરતા પહેલાં તાજેતરના પ્રોસેસિંગ સમયની માહિતી તપાસવી જરૂરી છે, જેથી તેઓ પોતાની મુસાફરી, અભ્યાસ અથવા નોકરી સંબંધિત આયોજન વધુ સારી રીતે કરી શકે.
