Top 5 Russian Series : આ 5 રશિયન વેબ સિરીઝ જોવાનું શરૂ કરો, દરેક એપિસોડમાં મળશે ‘નવા ટ્વિસ્ટ’
જો તમે કંઈક નવું અને રોમાંચક જોવાનું વિચારી રહ્યા હોવ, તો આ 5 રશિયન વેબ સિરીઝ એક ઉત્તમ વિકલ્પ છે. આ સિરીઝમાં તમને દિલ ધડકાવનારા એવા 'ટ્વિસ્ટ અને ટર્ન્સ' જોવા મળશે, જે તમને અંત સુધી જકડી રાખશે.
ધ સ્વામ્પ (The Swamp / Topi): આ વર્ષ 2021 માં રિલીઝ થયેલી એક રહસ્યમય ડ્રામા સિરીઝ છે. આ સિરીઝમાં કુલ 7 એપિસોડ છે અને તેને IMDb પર 6.6 સ્ટાર્સ મળેલા છે. આની વાર્તા પાંચ યુવાનની આસપાસ ફરે છે, જેઓ મોસ્કો છોડીને રશિયાના અંતરિયાળ વિસ્તારમાં આવેલા 'ટોપી' નામના એક રહસ્યમય ગામમાં પહોંચી જાય છે. ત્યાં તેઓ એક ત્યજી દેવાયેલા મઠમાં ફસાઈ જાય છે, જ્યાં તેમને માત્ર બહારના જોખમો જ નહીં પણ પોતાના મનના ડર અને કલ્પનાઓનો પણ સામનો કરવો પડે છે. આ સિરીઝમાં ઇવાન યાન્કોવ્સ્કી અને ટિખોન ઝિઝનેવ્સ્કી મુખ્ય કલાકારો છે.
કોલ-સેન્ટર (Call-center): આ વર્ષ 2020 માં આવેલી એક થ્રિલર સિરીઝ છે. તેમાં કુલ 8 એપિસોડ છે અને તેને 6.8 સ્ટાર્સનું રેટિંગ મળ્યું છે. આની વાર્તા ખૂબ જ રોમાંચક છે, જેમાં મોસ્કોની એક બિલ્ડિંગના 12મા માળે આવેલી ઓફિસમાં કામ કરતા 12 કર્મચારીઓ ફસાઈ જાય છે. અહીં તેમને ખબર પડે છે કે, તેમની ઓફિસમાં બોમ્બ છે. 'મમ્મી' અને 'પપ્પા' તરીકે ઓળખાવતા અજાણ્યા અવાજો તેમને ધમકી આપે છે કે, જો તેમની માંગણીઓ પૂરી નહીં થાય તો તેઓ બોમ્બ બ્લાસ્ટ કરી દેશે. આમાં પાવેલ તાબાકોવ અને યુલિયા ખ્લીનિના મુખ્ય ભૂમિકામાં છે.
લાસ્તોચકીનો ગ્નેઝડો (Lastochkino gnezdo): આ વર્ષ 2012 માં શરૂ થયેલી એક ઇમોશનલ ડ્રામા સિરીઝ છે. આ લિસ્ટમાં આ સૌથી લાંબી સિરીઝ છે, જેમાં કુલ 12 એપિસોડ છે અને તેને 6.5 સ્ટાર્સ મળ્યા છે. વાર્તા 16 વર્ષની ઇડા વિશે છે, જેની દુનિયા તેની માતા સ્વેતલાનાના અચાનક મૃત્યુ પછી વિખેરાઈ જાય છે. માતાના ગયા પછી તે એકલી પડી જાય છે અને તેની કઠોર માસીને ત્યાં રહેવું પડે છે. આ દુઃખદ પરિસ્થિતિમાંથી બહાર આવવા અને લોકોની મદદ કરવા માટે તે ડોક્ટર બનવાનું નક્કી કરે છે. આ સિરીઝમાં ઇવાન ઝિદકોવ અને તાત્યાના આર્ન્ટગોલ્ટ્સ જોવા મળે છે.
હેપી એન્ડ (Happy End): આ વર્ષ 2021 માં રિલીઝ થયેલી એક આધુનિક ડ્રામા સિરીઝ છે, જેમાં કુલ 8 એપિસોડ છે અને તેને IMDb પર 7.1 સ્ટાર્સનું સારું રેટિંગ મળ્યું છે. આ સિરીઝ એક યુવાન કપલની વાર્તા દર્શાવે છે કે, જેઓ પૈસા કમાવવા અને ખ્યાતિ મેળવવા માટે વેબકેમની દુનિયામાં પ્રવેશ કરે છે અને આખી દુનિયા સામે પોતાની અંગત પળોને પ્રસારિત કરવાનો નિર્ણય લે છે. આ સિરીઝમાં લેના ટ્રોનિના, એલેક્ઝાન્ડર ગોર્ચિલિન અને ડેનિલ વોરોબ્યોવ મુખ્ય ભૂમિકામાં જોવા મળે છે.
ડેડ માઉન્ટેન (Dead Mountain): આ વર્ષ 2020 માં આવેલી એક રહસ્યમય અને રોમાંચક મિસ્ટ્રી સિરીઝ છે, જે 8 એપિસોડમાં વહેંચાયેલી છે અને તેને 7.6 સ્ટાર્સ સાથે ઉચ્ચ રેટિંગ મળેલું છે. આની વાર્તા યુરલ પર્વતોમાં સ્કી હાઇકિંગ માટે ગયેલા નવ વિદ્યાર્થીઓના જૂથ પર આધારિત છે, જેઓ ત્યાં ગયા પછી રહસ્યમય રીતે ગુમ થઈ જાય છે અને ક્યારેય પાછા ફરતા નથી. એક મહિના પછી જ્યારે તેમના મૃતદેહો મળી આવે છે, ત્યારે સ્થાનિક તપાસકર્તાઓ પુરાવાઓ ભેગા કરીને એ શોધવાનો પ્રયત્ન કરે છે કે, પહાડોની વચ્ચે તેમની સાથે એવી કઈ દુર્ઘટના ઘટી હતી. આ સિરીઝમાં ઇવાન મુલિન અને એન્ડ્રે ડોબ્રોવોલ્સ્કીએ શાનદાર અભિનય કર્યો છે.
