Tata પછી Marutiએ Swift, Baleno અને Dzire ના CNG મોડેલમાં ઓટોમેટિક ગિયરબોક્સ ઉતાર્યા; જાણો કિંમત અને માઇલેજ
મારુતિ સુઝુકીએ શહેરી ડ્રાઇવિંગને વધુ સરળ બનાવવા માટે સ્વિફ્ટ, બલેનો અને ડિઝાયરના CNG મોડેલ્સમાં AMT (ઓટોમેટિક) ગિયરબોક્સ વિકલ્પ રજૂ કર્યો છે. ₹7.92 લાખથી શરૂ થતી આ કારોમાં કેટલું માઇલેજ મળશે અને કયા વેરિઅન્ટ ઉપલબ્ધ રહેશે? જાણો સંપૂર્ણ વિગતો.
મારુતિ સુઝુકીએ પોતાની સીએનજી કાર રેન્જને વધુ મજબૂત બનાવતા બલેનો, સ્વિફ્ટ અને ડિઝાયરમાં નવા ઓટોમેટિક (AMT) વેરિઅન્ટ રજૂ કર્યા છે. હવે આ ત્રણેય કારોમાં CNG કીટ સાથે ઓટોમેટિક ગિયરબોક્સનો વિકલ્પ મળશે, જેનાથી શહેરી ટ્રાફિકમાં દરરોજ વાહન ચલાવતા ચાલકોને વારંવાર ગિયર બદલવાની મુશ્કેલીમાંથી મુક્તિ મળશે. આ નવા AMT મોડેલ્સ મેન્યુઅલ વર્ઝન કરતાં આશરે ₹35,000 મોંઘા છે.
કિંમત, વેરિઅન્ટ અને પાવર: Maruti Swift CNG AMT: આ કાર VXi, VXi (O) અને ZXi વેરિઅન્ટમાં ઉપલબ્ધ રહેશે, જેની શરૂઆતી એક્સ-શોરૂમ કિંમત ₹7.92 લાખ રાખવામાં આવી છે.
Maruti Baleno CNG AMT: ડેલ્ટા (Delta) અને ઝેટા (Zeta) ટ્રિમમાં રજૂ થયેલી બલેનોની શરૂઆતી કિંમત ₹8.32 લાખ છે. તેમાં 1.2-લિટર પેટ્રોલ એન્જિન સાથે બૂટ સ્પેસમાં ફેક્ટરી-ફિટેડ ટેન્ક અને સ્પેર વ્હીલ બંને જળવાઈ રહે છે.
Maruti Dzire CNG AMT: આ સેડાન VXi અને ZXi ટ્રિમમાં ₹8.53 લાખની શરૂઆતી કિંમતે મળશે.
સ્વિફ્ટ અને ડિઝાયરમાં નવું 1.2-લિટર ત્રણ-સિલિન્ડર Z12E પેટ્રોલ એન્જિન આપવામાં આવ્યું છે, જે ફેક્ટરી-ફિટેડ CNG કિટ સાથે 70bhp પાવર અને 102Nm ટોર્ક જનરેટ કરે છે. સાથે જ નવા વજન અને સેટઅપને અનુરૂપ સસ્પેન્શનને રીટ્યુન કરવામાં આવ્યું છે.
માઇલેજ: કંપનીના દાવા મુજબ, બલેનો CNG AMT માં 34.47 કિમી/કિગ્રા, સ્વિફ્ટ CNG AMT માં 35.34 કિમી/કિગ્રા અને ડિઝાયર CNG AMT માં સૌથી વધુ 36.47 કિમી/કિગ્રા સુધીની ફ્યુઅલ એફિશિયન્સી મળશે.
CNG સેગમેન્ટ પર કંપનીનો મોટો લક્ષ્યાંક: મારુતિ સુઝુકીના પોર્ટફોલિયોમાં હાલ 15 ફેક્ટરી-ફિટેડ સીએનજી કાર ઉપલબ્ધ છે. કંપની ચાલુ નાણાકીય વર્ષમાં 30 ટકાના વાર્ષિક વધારા સાથે 9 લાખ સીએનજી વાહનો વેચવાનો લક્ષ્યાંક ધરાવે છે. વર્ષ 2026ના પ્રથમ ત્રિમાસિક ગાળામાં જ કંપનીએ 58 ટકાના ઉછાળા સાથે 2.2 લાખ CNG કાર્સનું વેચાણ નોંધાવ્યું હતું. (All Image From: Maruti Suzuki)
