અદાણી ગ્રુપ ખરીદશે વધુ એક સિમેન્ટ કંપની, સમાચાર આવતા વધ્યા શેરના ભાવ
અદાણી ગ્રુપ સ્ટાર સિમેન્ટ કંપનીનું સંપાદન કરવાની તૈયારી કરી રહ્યું છે. આ સંપાદન અંબુજા સિમેન્ટ દ્વારા કરવામાં આવશે અને તે ઉત્તર-પૂર્વ ભારતમાં કંપનીના વિસ્તરણનો ભાગ છે. સ્ટાર સિમેન્ટ ઉત્તર-પૂર્વમાં બજારમાં અગ્રણી છે. અદાણી ગ્રુપે આ ડીલનું મૂલ્યાંકન કરવા માટે EY ને નિયુક્ત કરી છે. બુધવારે સ્ટાર સિમેન્ટના શેરમાં 7% થી વધુનો વધારો જોવા મળ્યો હતો. જોકે, સ્ટાર સિમેન્ટે કોઈપણ વાતચીતનો ઈન્કાર કર્યો છે.
અદાણી ગ્રુપ બીજી સિમેન્ટ કંપની ખરીદવાની તૈયારી કરી રહ્યું છે. અદાણી ગ્રુપની કંપની અંબુજા સિમેન્ટ સ્ટાર સિમેન્ટ ખરીદવા માટે વાતચીત કરી રહી છે. કંપની તેની વિસ્તરણ વ્યૂહરચનાના ભાગરૂપે આ ડીલ કરવાની તૈયારી કરી રહી છે. આ બાબતની જાણકારી ધરાવતા લોકોએ આ વાત જણાવી છે. સ્ટાર સિમેન્ટ નોર્થ ઈસ્ટમાં માર્કેટ લીડર છે. અહેવાલ છે કે અદાણી ગ્રૂપે આ ડીલનું મૂલ્યાંકન કરવા માટે કન્સલ્ટન્સી ફર્મ અર્ન્સ્ટ એન્ડ યંગ (EY)ની નિમણૂક કરી છે. મનીકંટ્રોલના એક રિપોર્ટમાં આ વાત કહેવામાં આવી છે. બુધવારે BSE પર સ્ટાર સિમેન્ટનો શેર 7 ટકાથી વધુના વધારા સાથે રૂ. 222.95 પર ટ્રેડ થઈ રહ્યો છે. જ્યારે અંબુજા સિમેન્ટનો શેર રૂ. 563.40 પર ટ્રેડ થઈ રહ્યો છે.
અંબુજા સિમેન્ટ અને સ્ટાર સિમેન્ટે આ બાબતે તાત્કાલિક કોઈ પ્રતિક્રિયા આપી ન હતી. અદાણી ગ્રૂપના એક અધિકારીએ જણાવ્યું હતું કે, 'કંપની હંમેશા વૃદ્ધિની તકો માટે વિકલ્પોનું મૂલ્યાંકન કરતી રહે છે.' આ પગલું એવા સમયે આવ્યું છે જ્યારે મોટાભાગની મોટી સિમેન્ટ કંપનીઓ વિસ્તરણ માટે સંભવિત બજાર તરીકે ઉત્તર પૂર્વ તરફ નજર રાખી રહી છે. અલ્ટ્રાટેક આસામમાં 1.2 MTPA ગ્રીનફિલ્ડ ગ્રાઇન્ડીંગ યુનિટ બનાવી રહી છે. જેકે લક્ષ્મી સિમેન્ટ આસામમાં 1.5 એમટીપીએનું સિમેન્ટ ગ્રાઇન્ડીંગ યુનિટ અને 1 એમટીપીએ ક્ષમતાનું ક્લિંકરાઇઝેશન યુનિટ પણ સ્થાપી રહી છે.
સ્ટાર સિમેન્ટ નોર્થ ઈસ્ટ રિજનમાં સૌથી વધુ બજાર હિસ્સો ધરાવે છે. કંપનીની કુલ સ્થાપિત ક્ષમતા 7.7 MTPA (મિલિયન ટન પ્રતિ એનમ) છે. કંપની મેઘાલયમાં 1.67 MTPA સંકલિત સિમેન્ટ પ્લાન્ટ અને 4 ગ્રાઇન્ડીંગ યુનિટ ધરાવે છે. સ્ટાર સિમેન્ટ 2030 સુધીમાં તેની ક્ષમતા વિસ્તારવા માંગે છે. કંપનીમાં પ્રમોટર્સનો હિસ્સો 66.47 ટકા છે. સ્ટાર સિમેન્ટના પ્રમોટર્સ સજ્જન ભજંકા અને પ્રેમ કુમાર ભજંકા છે, જેઓ કંપનીમાં અનુક્રમે 11.85% અને 10.20% હિસ્સો ધરાવે છે. અદાણી ગ્રુપે છેલ્લા કેટલાક વર્ષોમાં ઘણી સિમેન્ટ કંપનીઓ ખરીદી છે. અદાણી ગ્રૂપે 8100 કરોડમાં ઓરિએન્ટ સિમેન્ટ ખરીદ્યું છે. અગાઉ, જૂથે પેન્ના સિમેન્ટની ખરીદી કરી હતી.
દરમિયાન, સ્ટાર સિમેન્ટ લિમિટેડે બુધવારે એક્સચેન્જોને સ્પષ્ટતા કરી હતી કે કંપની સંભવિત એક્વિઝિશન માટે અદાણી ગ્રૂપ અથવા અન્ય કોઈ કંપની સાથે કોઈ વાતચીત કરી રહી નથી.
