મહિલા અનામત સારી વાત પણ દસ વર્ષ પછી થશે લાગૂ, કેમ રાહુલ ગાંધીએ આવું કહ્યું ?
રાહુલ ગાંધીએ કહ્યું કે, જો સરકાર ઈચ્છે તો મહિલા આરક્ષણ આજે જ લાગુ થઈ શકે છે. મહિલાઓને 33 ટકા અનામત આપવી એ અઘરું કામ નથી. સરકારે દેશની સામે અનામત મૂકી છે પરંતુ સત્ય એ છે કે તેનો અમલ દસ વર્ષ પછી જ થઈ શકશે.
મહિલા અનામત બિલ સંસદના બંને ગૃહો દ્વારા પસાર કરવામાં આવ્યું છે. હવે રાષ્ટ્રપતિ દ્રૌપદી મુર્મુની મંજૂરી બાદ આ કાયદો બની જશે. આ દરમિયાન કોંગ્રેસ નેતા રાહુલ ગાંધીએ કહ્યું કે મહિલા આરક્ષણ ખૂબ જ સારી બાબત છે પરંતુ તે ક્યારે લાગુ થશે તે સ્પષ્ટ નથી. તેમણે કહ્યું કે આરક્ષણ લાગુ કરવા માટે સૌ પ્રથમ વસ્તી ગણતરી હાથ ધરવામાં આવશે અને નવું સીમાંકન કરવું પડશે. આવું કરવામાં વર્ષો લાગશે.
રાહુલ ગાંધીએ કહ્યું કે, એ પણ ખબર નથી કે આવું થશે કે નહીં. આ એક ડાયવર્ઝન યુક્તિ છે. ઓબીસી વસ્તી ગણતરીમાંથી ડાયવર્ઝન થઈ રહ્યું છે. તેમણે કેન્દ્ર સરકારમાં સચિવો અને કેબિનેટ સચિવોની જાતિની શ્રેણી વિશે વાત કરી. વડાપ્રધાન નરેન્દ્ર મોદી પર પ્રહાર કરતા તેમણે કહ્યું કે, જો તેઓ ઓબીસી માટે આટલું કામ કરી રહ્યા છે તો 90માંથી માત્ર ત્રણ જ લોકો ઓબીસી કેટેગરીના કેમ છે? કોંગ્રેસના નેતાએ કહ્યું કે ઓબીસી અધિકારીઓ દેશના બજેટનો પાંચ ટકા હિસ્સો નિયંત્રિત કરી રહ્યા છે.
કોંગ્રેસ નેતાએ કહ્યું કે, વડાપ્રધાન દરરોજ ઓબીસી ગૌરવની વાત કરે છે, તો પીએમએ તેમના માટે શું કર્યું? વડાપ્રધાને સંસદમાં OBC પ્રતિનિધિત્વની વાત કરી, રાહુલે કહ્યું આનાથી શું થશે? શા માટે માત્ર પાંચ ટકા નિર્ણય લેનારાઓને જ સ્થાન આપવામાં આવ્યું? શું દેશમાં ઓબીસીની વસ્તી માત્ર પાંચ ટકા છે? રાહુલે કહ્યું કે હવે મારે શોધવાનું છે કે ભારતમાં કેટલા ઓબીસી છે? અને તેમને તેમની સંખ્યા અનુસાર ભાગીદારી મળવી જોઈએ.
લોકસભાને લોકશાહીનું મંદિર કહેવામાં આવે છે. કોંગ્રેસ નેતાએ કહ્યું કે તમે ભાજપના કોઈપણ નેતાને પૂછો કે શું તે કોઈ નિર્ણય લે છે? શું કોઈ કાયદો બનાવે છે? તેમણે કહ્યું કે નિર્ણય લેવામાં કોઈ ભાગ લેતું નથી. ભાજપે સાંસદોને મૂર્તિ જેવા બનાવી રાખ્યા છે. સંસદ ઓબીસી સાંસદોથી ભરેલી છે પણ તેમની પાસે કોઈ સત્તા નથી. દરેક OBC યુવાનોએ આ વાત સમજવી પડશે. કોંગ્રેસ નેતાએ ફરી એકવાર કહ્યું કે નવી વસ્તી ગણતરી માત્ર જાતિના આધારે થવી જોઈએ.
