પાકિસ્તાનનો પર્દાફાશ ! દાઉદ ઈબ્રાહિમ કરાચીમાં છુપાયો, ડોનના ભાણીયાએ ED સમક્ષ કરી કબૂલાત
દાઉદના ભાણીયા અલીશાહ પારકરે (Alishah Parkar) એન્ફોર્સમેન્ટ ડિરેક્ટોરેટને જણાવ્યું કે જ્યારે દાઉદ (Dawood) કરાચી ગયો હતો. ત્યારે મારો જન્મ પણ નહોતો થયો. હવે હું કે મારો પરિવાર તેના સંપર્કમાં નથી.
ભારતનો મોસ્ટ વોન્ટેડ ગેંગસ્ટર દાઉદ ઈબ્રાહીમ (Dawood Ibrahim) હાલ કરાચીમાં છે. આ વાતનો ખુલાસો તેમના ભાણીયા અલીશાહ પારકરે (Alishah Parkar) એન્ફોર્સમેન્ટ ડિરેક્ટોરેટ (Enforcement Directorate) સામે કર્યો છે. અલીશાહ પારકરે EDને એમ પણ જણાવ્યું કે તેનો પરિવાર કોઈપણ તહેવારોના પ્રસંગો દરમિયાન દાઉદની પત્નીના સંપર્કમાં રહે છે. પારકરે કહ્યું કે દાઉદ ઈબ્રાહિમ 1986 પછી ભારત છોડી ગયો હતો અને નજીકના સૂત્રો પાસેથી માહિતી મળી છે કે તે હાલમાં પાકિસ્તાનના કરાચીમાં છે. દાઉદ ઈબ્રાહીમ સંયુક્ત રાષ્ટ્ર (United Nations) દ્વારા જાહેર કરાયેલ વૈશ્વિક આતંકવાદી (terrorist) છે.
પારકરે એન્ફોર્સમેન્ટ ડિરેક્ટોરેટને કહ્યું કે દાઉદ ઈબ્રાહિમ મારા મામા છે. તેઓ 1986 સુધી દક્ષિણ મુંબઈમાં ડમ્બરવાલા બિલ્ડિંગના ચોથા માળે રહેતા હતા. જોકે મેં કેટલાક સ્ત્રોતો અને સંબંધીઓ પાસેથી સાંભળ્યું છે કે તે હવે કરાચીમાં છે. પારકરે કહ્યું, ‘જ્યારે દાઉદ કરાચી ગયો હતો. ત્યારે મારો જન્મ પણ નહોતો થયો. હવે હું કે મારો પરિવાર તેના સંપર્કમાં નથી. હા, પણ ક્યારેક ઈદ, દિવાળી કે અન્ય કોઈ તહેવારના પ્રસંગે તે તેની પત્ની મેહજબીન દાઉદ ઈબ્રાહિમ સાથે સંપર્કમાં રહે છે. તે મારી પત્ની આયેશા અને મારી બહેનો સાથે સંપર્કમાં રહે છે.
ડોન અનેક આતંકી કેસોમાં વોન્ટેડ છે
તમને જણાવી દઈએ કે દાઉદ ઈબ્રાહિમ ભારતમાં ઘણા આતંકવાદી મામલામાં વોન્ટેડ છે, જેની લાંબા સમયથી શોધ ચાલી રહી છે. અગાઉ, નેશનલ ઇન્વેસ્ટિગેશન એજન્સી (NIA) એ 13 મેના રોજ શહેરના પશ્ચિમી ઉપનગરમાંથી ગેંગસ્ટર છોટા શકીલના બે સહયોગીઓની ગેરકાયદેસર પ્રવૃત્તિઓ અને ભાગેડુ અંડરવર્લ્ડ ડોન દાઉદ ઇબ્રાહિમ દ્વારા ચલાવવામાં આવતી ક્રાઇમ સિન્ડિકેટની નાણાકીય લેવડ-દેવડના આરોપસર ધરપકડ કરી હતી, જેની ઓળખ આરીફ અબુબકર શેખ (59) અને શબ્બીર અબુબકર શેખ (51) તરીકે કરવામાં આવી હતી.
NIAએ ઘણી જગ્યાએ દરોડા પાડ્યા હતા
બંને આરોપીઓના છોટા શકીલ સાથે નજીકના સંબંધો છે. તાજેતરમાં મુંબઈ અને થાણેમાં વિવિધ સ્થળોએ પાડવામાં આવેલા દરોડાઓમાં, NIAએ તપાસ માટે ઘણા શકમંદોને શોધી કાઢ્યા હતા. આરીફ અને શબ્બીર પણ ડી કંપની (Dawood Ibrahim’s Crime Syndicate) સાથેના કથિત સંબંધો માટે ધરપકડ કરાયેલા શકમંદોમાં સામેલ હતા. એજન્સીએ થોડા સમય પહેલા મોસ્ટ વોન્ટેડ દાઉદ ઈબ્રાહિમના સાથીદારો વિરુદ્ધ મુંબઈ અને થાણે જિલ્લામાં 20 થી વધુ સ્થળોએ દરોડા પાડ્યા હતા. આરિફ અને શબ્બીરની પૂછપરછ દરમિયાન એનઆઈએ ટીમને જાણવા મળ્યું કે બંનેની છોટા શકીલ સાથે કોઈ લેવડ-દેવડ કરી હતી, જેના પછી તેમની ધરપકડ કરવામાં આવી હતી. છોટા શકીલ પાકિસ્તાનમાંથી આંતરરાષ્ટ્રીય ગુનાહિત સિન્ડિકેટ ચલાવે છે. શકીલ ખંડણી, ડ્રગ્સની હેરાફેરી અને આતંકવાદી કૃત્યોમાં સામેલ છે.
