Breaking News: સોનિયા ગાંધીનું X પર ડેબ્યૂ, રાજીવ ગાંધી સાથેની પહેલી મુલાકાતની યાદો કરી તાજી

કોંગ્રેસ સંસદીય પક્ષનાં અધ્યક્ષ સોનિયા ગાંધીએ સોશિયલ મીડિયા પ્લેટફોર્મ ઇન્સ્ટાગ્રામ પર ડેબ્યૂ કર્યા બાદ હવે X પર પણ પ્રવેશ કર્યો છે. X પરની પોતાની પહેલી પોસ્ટમાં તેમણે આગામી આત્મકથા ‘Belonging: A Journey of Love’ વિશે વાત કરી અને સ્વર્ગસ્થ પતિ તથા પૂર્વ વડાપ્રધાન રાજીવ ગાંધી સાથેની પહેલી મુલાકાતની યાદો તાજી કરી. આ પુસ્તક 10 નવેમ્બર, 2026ના રોજ પ્રકાશિત થવાનું છે. સોનિયા ગાંધીએ પોસ્ટ સાથે શેર કરેલા વીડિયોમાં તેમના અને રાજીવ ગાંધીના જૂના ફોટોગ્રાફ્સ પણ જોવા મળે છે.

કેમ્બ્રિજની ગ્રીક રેસ્ટોરન્ટમાં થઈ હતી પહેલી મુલાકાત

રાજીવ ગાંધી સાથેની પહેલી મુલાકાત વિશે વાત કરતાં સોનિયા ગાંધીએ જણાવ્યું કે તે સમયે ઇંગ્લેન્ડમાં મનપસંદ ઇટાલિયન ભોજન મળે એવી જગ્યા શોધવી મુશ્કેલ હતી. ત્યારબાદ તેમને કેમ્બ્રિજમાં એક ગ્રીક રેસ્ટોરન્ટ મળી, જ્યાં યુરોપિયન અને ભારતીય વિદ્યાર્થીઓ જમવા આવતા હતા. આ જ રેસ્ટોરન્ટમાં એક પરસ્પર મિત્રએ તેમનો અને રાજીવ ગાંધીનો પરિચય કરાવ્યો હતો. સોનિયા ગાંધીએ યાદ કર્યું કે પહેલી મુલાકાતમાં જ તેમને રાજીવ ગાંધી સાથે રહેવાની ઇચ્છા થઈ હતી અને બાદમાં તેમને જાણવા મળ્યું કે રાજીવ ગાંધી પણ તેમના વિશે આવું જ અનુભવતા હતા.

પોતાની પહેલી મુલાકાતને યાદ કરતાં સોનિયા ગાંધીએ રાજીવ ગાંધીના દેખાવની સાથે તેમના સૌમ્ય સ્વભાવનો પણ ઉલ્લેખ કર્યો હતો. તેમણે જણાવ્યું કે રાજીવ ગાંધી ખૂબ જ દેખાવડા હતા, પરંતુ તેમનામાં રહેલી નમ્રતા પણ સ્પષ્ટપણે અનુભવાતી હતી. આ બાબતે તેમને ખાસ પ્રભાવિત કર્યાં હતાં. બંને શરૂઆતમાં મિત્રો બન્યાં હતાં અને ત્યારબાદ મિત્રો સાથે પાર્ટીઓમાં જવા તથા ફરવા લાગ્યાં હતાં. સોનિયા ગાંધીએ એક વેલેન્ટાઇન પાર્ટીની યાદ પણ તાજી કરી હતી અને કહ્યું હતું કે રાજીવ ગાંધી સાથેની પહેલી મુલાકાત તેઓ ક્યારેય ભૂલી શકશે નહીં.

સોનિયા ગાંધીની આત્મકથા *‘Belonging: A Journey of Love’*માં ઇટાલીમાં વિતાવેલું બાળપણ, કેમ્બ્રિજમાં રાજીવ ગાંધી સાથેની મુલાકાત, બંનેના સંબંધો અને લગ્નજીવન સહિતના અંગત પ્રસંગોનો સમાવેશ થાય છે. આ ઉપરાંત, પૂર્વ વડાપ્રધાન ઇન્દિરા ગાંધી અને રાજીવ ગાંધીની હત્યા જેવી જીવનને ઊંડો પ્રભાવિત કરનારી ઘટનાઓ તથા ત્યારબાદના તેમના જાહેર જીવનની સફરનો પણ ઉલ્લેખ છે. 79 વર્ષીય સોનિયા ગાંધીએ અગાઉ 22 ઓક્ટોબરે ઇન્સ્ટાગ્રામ પર પોતાની આત્મકથાની પ્રથમ ઝલક શેર કરી હતી. હવે X પરની પ્રથમ પોસ્ટ દ્વારા તેમણે વાચકોને પોતાના જીવનની વધુ અંગત યાદોની ઝલક આપી છે.

આ પણ વાંચો- સાબુ, બિસ્કિટ, તેલથી લઈને મોબાઈલ રિચાર્જની કિંમતોમાં થશે વધારો ! જાણો કેમ?