PM મોદીએ બાલીમાં ભારતીય સમુદાયને સંબોધિત કરતા કહ્યુ- 2014 પછી ભારત બદલી ગયું, હવે સ્પીડ અને સ્કેલ પર થઈ રહ્યું છે કામ

વડાપ્રધાન નરેન્દ્ર મોદી ઇન્ડોનેશિયાના બાલીમાં ભારતીય સમુદાયને સંબોધિત કરતા કહ્યું કે ભારતની પ્રતિભા, ટેક્નોલોજી, ઈનોવેશન, ઈન્ડસ્ટ્રીએ આજે ​​દુનિયામાં પોતાની ઓળખ બનાવી છે. હવે ભારત નાનું વિચારતું જ નથી. સૌથી મોટી પ્રતિમા બનાવી, સૌથી મોટું સ્ટેડિયમ બનાવ્યું. 10 માંથી એક યુનિકોર્ન ભારતનો હોય છે. 2014 થી, અમેરિકાની કુલ વસ્તીની બરાબર બેંક ખાતા ખોલવામાં આવ્યા છે. 2014 પહેલા અને હવેના ભારત વચ્ચે તફાવત છે. આજે ભારત ઝડપ અને સ્કેલ પર કામ કરી રહ્યું છે. આજે ભારત ઝડપથી વિકસતું અર્થતંત્ર છે. 2014 પહેલા અને 2014 પછી ભારતમાં ઝડપ અને સ્કેલમાં ઘણો ફરક છે. આજે ભારત અભૂતપૂર્વ ઝડપે કામ કરી રહ્યું છે. અભૂતપૂર્વ સ્કેલ પર કામ કરી રહ્યું છે.

પ્રધાનમંત્રીએ કહ્યું કે 21મી સદીમાં આજે વિશ્વને ભારત પાસેથી અપેક્ષાઓ છે, જે આશાઓ છે, ભારત પણ તેને પોતાની જવાબદારી તરીકે જુએ છે. આજે જ્યારે ભારત તેના વિકાસ માટે રોડમેપ તૈયાર કરે છે ત્યારે તેમાં વિશ્વની આર્થિક અને રાજકીય આકાંક્ષાઓનો પણ સમાવેશ થાય છે. આજે જ્યારે ભારત આત્મનિર્ભર ભારતના વિઝનને આગળ ધપાવે છે ત્યારે તેમાં ગ્લોબલ ગુડની ભાવના પણ સમાયેલી છે.

બાલીનું વાતાવરણ ઉર્જા આપે છે: મોદી

પીએમ મોદીએ કહ્યું કે ઇન્ડોનેશિયા, બાલી આવ્યા બાદ દરેક હિન્દુસ્તાનીની એક અલગ લાગણી છે, અલગ જ અનુભૂતિ છે. હું પણ એ જ વાઈબ્રેશન અનુભવી રહ્યો છું. બાલીનું વાતાવરણ ઉર્જા આપે છે. ઈન્ડોનેશિયાએ પરંપરાને જીવંત રાખી છે. ઈન્ડોનેશિયા સાથે ભારતનો હજારો વર્ષોનો સંબંધ છે. ઓડિશામાં બાલી ફેસ્ટિવલની ઉજવણી કરવામાં આવી રહી છે. તમે લોકો ઈન્ડોનેશિયાના વિકાસમાં યોગદાન આપી રહ્યા છો. સિંધી પરિવારે અહીં ઘણું સારું કામ કર્યું છે.

કટકમાં ઉજવાઈ રહ્યો છે બાલી યાત્રા ઉત્સવ

તેમણે આગળ કહ્યું કે હું અહીં બાલીમાં તમારી સાથે વાત કરી રહ્યો છું અને અહીંથી 1500 કિમી દૂર ભારતના કટકમાં ઈન્ડોનેશિયન પરંપરાઓના ગીતો ગાવામાં આવી રહ્યા છે, મહાનદીના કિનારે બાલી યાત્રા ફેસ્ટિવલ ચાલી રહ્યો છે – બાલી યાત્રા. આ તહેવાર હજારો વર્ષ જૂના ભારત-ઇન્ડોનેશિયા વેપાર સંબંધોની ઉજવણી કરે છે. ઈન્ડોનેશિયાના લોકો ઈન્ટરનેટ પર આ વર્ષની બાલી યાત્રાની તસવીરો જોઈને ગર્વ અને ખુશ થશે.

મેં ઈન્ડોનેશિયાના લોકોના સ્નેહને ખૂબ નજીકથી જોયો છે: પીએમ મોદી

હું જ્યારે છેલ્લી વાર અહીં જકાર્તામાં હતો ત્યારે મેં ઈન્ડોનેશિયાના લોકોના પ્રેમને ખૂબ નજીકથી જોયો હતો અને અનુભવ્યો હતો. રાષ્ટ્રપતિ જોકો વિડોડો સાથે પતંગ ઉડાવવામાં મને જે મજા આવી તે અદ્ભુત હતું. 2018માં જ્યારે ઈન્ડોનેશિયામાં આટલો મોટો ભૂકંપ આવ્યો ત્યારે ભારતે તરત જ ઓપરેશન સમુદ્ર મૈત્રી શરૂ કરી દીધું હતું.

તેમણે કહ્યું કે બાલીની આ ભૂમિ મહર્ષિ માર્કંડેય અને મહર્ષિ અગસ્ત્યની તપસ્યાથી પવિત્ર છે. જો ભારતમાં હિમાલય છે તો બાલીમાં અગુંગ પર્વત છે. જો ભારતમાં ગંગા છે તો બાલીમાં તીર્થા ગંગા છે. આપણે પણ ભારતમાં દરેક શુભ કાર્યમાં શ્રીગણેશ કરીએ છીએ. અહીં પણ શ્રી ગણેશ ઘરે-ઘરે બિરાજમાન છે, જાહેર સ્થળોએ શુભતા ફેલાવી રહ્યા છે. પૂર્ણિમા ઉપવાસ, એકાદશીનો મહિમા, ત્રિકાળ સંધ્યા દ્વારા સૂર્ય ઉપાસનાની પરંપરા, માતા સરસ્વતીના સ્વરૂપમાં જ્ઞાનની ઉપાસના, આપણને કેટલું જોડે છે.