Parliament Monsoon Session: હંગામો મચાવનારા વધુ 3 વિપક્ષી સાંસદો સસ્પેન્ડ, બે AAP અને એક અપક્ષ સાંસદ સસ્પેન્ડ

સંસદના ચોમાસુ સત્રમાં (Parliament Monsoon Session) સાંસદોના હંગામાને કારણે વિપક્ષના સાંસદોનું સસ્પેન્શન ચાલુ છે. સંસદના ઉપલા ગૃહ રાજ્યસભામાંથી (Rajya Sabha) વધુ ત્રણ સાંસદોને સસ્પેન્ડ કરવામાં આવ્યા છે. આમ આદમી પાર્ટીના (AAP) સાંસદો સુશીલ ગુપ્તા અને સંદીપ પાઠકને રાજ્યસભામાંથી સસ્પેન્ડ કરવામાં આવ્યા છે. આ પહેલા ગઈકાલે પાર્ટીના અન્ય સાંસદ સંજય સિંહને પણ સસ્પેન્ડ કરવામાં આવ્યા હતા. સસ્પેન્ડ કરાયેલા સાંસદોમાં અપક્ષ અજીત કુમાર ભુયાન પણ સામેલ છે. વિપક્ષના કેટલાક સસ્પેન્ડેડ સભ્યો બુધવારે રાત્રે સંસદ પરિસરમાં મહાત્મા ગાંધીની પ્રતિમાની સામે હાજર રહ્યા હતા અને તેમની સામે કરવામાં આવેલી કાર્યવાહીનો વિરોધ કર્યો હતો.

આમ આદમી પાર્ટીના સંજય સિંહ, તૃણમૂલ કોંગ્રેસના ડોલા સેન અને કેટલાક અન્ય સભ્યોએ રાત્રે ધરણા કર્યા હતા. સસ્પેન્ડ કરાયેલા વિપક્ષી સભ્યો તેમના સસ્પેન્શન સામે બુધવારથી 50 કલાકના ધરણા કરી રહ્યા છે. આમ આદમી પાર્ટીના સાંસદ સંજય સિંહને પણ ગઈકાલે ગુજરાતમાં રાજ્યસભામાં નકલી દારૂની ઘટનાનો મુદ્દો ઉઠાવવાનો પ્રયાસ કરવા બદલ સસ્પેન્ડ કરવામાં આવ્યા હતા. બુધવારે, જ્યારે રાજ્યસભાની બેઠક એક વખત સ્થગિત કર્યા પછી બપોરે 12 વાગ્યે શરૂ થઈ, ત્યારે ઉપસભાપતિ હરિવંશે જાહેરાત કરી કે AAP સાંસદ સંજય સિંહે મંગળવારે લંચ બ્રેક પછી કાર્યવાહી દરમિયાન અભદ્ર વર્તન કર્યું હતું.

સંજય સિંહે ગૃહના નિયમોનું ઉલ્લંઘન કર્યું: હરિવંશ

હરિવંશે કહ્યું કે સંજય સિંહે ન માત્ર ગૃહના નિયમોનું ઉલ્લંઘન કર્યું પરંતુ સૂચનાનું પણ ઉલ્લંઘન કર્યું અને કાગળ ફાડીને સીટ તરફ ટુકડા ફેંક્યા. સંજય સિંહનું વર્તન ગૃહની ગરિમા વિરુદ્ધ હતું. હરિવંશે સંજય સિંહ સામે નિયમ 256 લાદવાની જાહેરાત કરી હતી. આ નિયમ અભદ્ર વર્તન માટે સદસ્યને ગૃહમાંથી સસ્પેન્ડ કરવા સાથે સંબંધિત છે. રાજ્યસભામાંથી સસ્પેન્ડ કર્યા પછી, સંજય સિંહે બુધવારે કહ્યું હતું કે તેમની પાર્ટી ગુજરાતમાં નકલી દારૂના વેચાણ સહિત શેરીઓમાં અને સંસદમાં લોકોના મૂળભૂત મુદ્દાઓ ઉઠાવવાનું ચાલુ રાખશે.

અભદ્ર વર્તન બદલ 24 સાંસદો સસ્પેન્ડ

રાજ્યસભાના 20 સભ્યો અને લોકસભાના 4 સભ્યોને અભદ્ર વર્તન અને સંસદમાં બેઠકની અવમાનના બદલ સસ્પેન્ડ કરવામાં આવ્યા છે. સંસદીય બાબતોના પ્રધાન પ્રહલાદ જોશીએ બુધવારે જણાવ્યું હતું કે જો સસ્પેન્ડ કરાયેલા વિપક્ષી સાંસદો માફી માંગે છે અને ખાતરી આપે છે કે તેઓ ગૃહમાં પ્લેકાર્ડ બતાવશે નહીં, તો તેમનું સસ્પેન્શન પાછું ખેંચી શકાય છે.

લોકસભામાં કેટલાક વિરોધ પક્ષોના નેતાઓએ કોંગ્રેસના 4 સભ્યોનું સસ્પેન્શન પાછું ખેંચવાની માગ કરી હતી. તેના પર કેન્દ્રીય મંત્રી જોશીએ કહ્યું કે જો વિપક્ષી નેતાઓ જવાબદારી લે કે વધુ વિપક્ષના સાંસદો નજીક નહીં આવે અને પ્લેકાર્ડ નહી બતાવશે તો સસ્પેન્શન પાછું ખેંચી શકાય છે.