G20 Summit: ‘આવનારી પેઢી આ નિર્ણયને યાદ રાખશે’, G20 સમિટમાં ઇકોનોમિક કોરિડોરની જાહેરાત પર જો બાઇડન બોલ્યા

ઇકોનોમિક કોરિડોરનો ઉલ્લેખ કરતા બાઇડને વધુમાં કહ્યું કે, આ નિર્ણયને આવનારી પેઢીઓ યાદ રાખશે. હું આ ઐતિહાસિક કરારથી ખુશ છું અને સારા ભવિષ્ય માટે આપણે સાથે મળીને કામ કરવું પડશે. જેમ જેમ આપણે ઓછી અને મધ્યમ આવક ધરાવતા દેશોમાં ઈન્ફ્રાસ્ટ્રક્ચર ગેપને દૂર કરવા માટે કામ કરીએ છીએ, આપણે આપણા રોકાણોની અસરને વધુ વધારવી પડશે.

તેમણે કહ્યું કે, થોડા મહિના પહેલા જાહેરાત કરવામાં આવી હતી કે અમેરિકા આર્થિક કોરિડોરમાં રોકાણ કરવા માટે તેના સહયોગી દેશો સાથે કામ કરશે. ઈન્ડિયા-મિડલ ઈસ્ટ યુરોપ ઈકોનોમિક કોરિડોર ઐતિહાસિક છે. તેના દ્વારા દેશો વચ્ચે સીધો સંપર્ક થશે અને વેપાર પણ વધશે. તે જ સમયે, યુરોપિયન કમિશનના પ્રમુખ ઉર્સુલા વોન ડેર લેયેને ભારત-મધ્ય પૂર્વ યુરોપ ઇકોનોમિક કોરિડોરને ઐતિહાસિક ગણાવ્યો છે. તેમણે કહ્યું કે આના દ્વારા બિઝનેસ વધશે.

Economic Corridor ની જાહેરાત

હકીકતમાં, પ્રગતિ મેદાનના ભારત મંડપમમાં ચાલી રહેલી G20 સમિટના પહેલા દિવસે ઘણા મોટા નિર્ણયો લેવામાં આવ્યા હતા. પહેલા જ દિવસે ઈકોનોમિક કોરિડોરની જાહેરાત પણ થઈ હતી. જેમાં ભારત, ફ્રાન્સ, અમેરિકા, સાઉદી અરેબિયા, UAE, ઇટાલી, જર્મની અને યુરોપિયન યુનિયન સામેલ છે.

આ પણ વાંચો : G20: દહીં, મશરૂમ્સ અને બાકરખાની સાથે ગોલ્ડન કલશ ડેઝર્ટ મિઠાઈ… જુઓ G20 મહેમાનોનું સંપૂર્ણ ડિનર મેનૂ

ભારત-પશ્ચિમ એશિયા-યુરોપ ઇકોનોમિક કોરિડોરની જાહેરાત પર પીએમ મોદીએ કહ્યું કે આજે આપણે બધા એક મહત્વપૂર્ણ અને ઐતિહાસિક ભાગીદારીમાં પહોંચ્યા છીએ. આવનારા સમયમાં તે ભારત, પશ્ચિમ એશિયા અને યુરોપના આર્થિક એકીકરણ માટે અસરકારક માધ્યમ બનશે અને સમગ્ર વિશ્વની કનેક્ટિવિટી અને વિકાસને નવી દિશા આપશે.