Breaking News: તિસ્તા સેતલવાડને સુપ્રીમ કોર્ટે આપ્યા જામીન, પુરાવા સાથે છેડછાડની કોઈ શક્યતા નથી- SC

supreme court hearing: સામાજિક કાર્યકર્તા તિસ્તા સેતલવાડને સુપ્રીમ કોર્ટમાંથી મોટી રાહત મળી છે. બુધવારે જામીન અરજી પર સુનાવણી કરતી વખતે સુપ્રીમ કોર્ટે ગુજરાત હાઈકોર્ટના આદેશને રદ કરીને તિસ્તા સેતલવાડને જામીન આપ્યા છે.

જસ્ટિસ બીઆર ગવઈ, જસ્ટિસ દીપાંકર દત્તા અને જસ્ટિસ એએસ બોપન્નાની બેન્ચે આ ચુકાદો આપ્યો છે. તિસ્તાને જામીન આપતાં સુપ્રીમ કોર્ટે કહ્યું કે હવે તમામ દસ્તાવેજો તપાસ એજન્સી પાસે ઉપલબ્ધ છે અને કેસમાં ચાર્જશીટ પણ દાખલ કરવામાં આવી છે. આવી સ્થિતિમાં સાક્ષીઓને કોઈપણ રીતે પ્રભાવિત કરી શકાય નહીં. આ સાથે સુપ્રીમ કોર્ટે હાઈકોર્ટના આદેશને પણ રદ્દ કર્યો છે.

ગુજરાત હાઈકોર્ટની સિંગલ બેન્ચે આ મહિનાની શરૂઆતમાં તિસ્તા સેતલવાડની જામીન અરજી ફગાવી દીધી હતી. આ સાથે તિસ્તાને કસ્ટડીમાં લેવાનો આદેશ પણ આપવામાં આવ્યો હતો. આ આદેશ સામે તે સુપ્રીમ કોર્ટમાં ગઈ હતી જ્યાં દેશની સર્વોચ્ચ અદાલતે નિર્ણય પર સ્ટે આપ્યો હતો. ગત વર્ષે ઝાકિયા જાફરી કેસમાં સુપ્રીમ કોર્ટે પોતાનો ચુકાદો આપ્યો હતો, ત્યાર બાદ તેમની વિરુદ્ધ એફઆઈઆર નોંધવામાં આવી હતી.

ષડયંત્રની થિયરી ખોટી છેઃ સિબ્બલ

આ પહેલા તિસ્તા સેતલવાડની અરજી પર સુનાવણી દરમિયાન વરિષ્ઠ વકીલ કપિલ સિબ્બલે દલીલો શરૂ કરી હતી. તેમણે કહ્યું કે ગુજરાત સરકાર કહે છે કે ગુજરાત રમખાણોને લઈને ષડયંત્ર રચવામાં આવ્યું હતું, નકલી દસ્તાવેજો તૈયાર કરવામાં આવ્યા હતા. આ બધું જૂઠાણું છે. ગુજરાત સરકાર વતી સોલિસિટર જનરલે દલીલ કરી હતી તેવી FIRમાં પણ આ જ વાત કહેવામાં આવી હતી.

સિબ્બલે કહ્યું કે મારા અસીલે કોઈ શરતનું ઉલ્લંઘન કર્યું નથી અને તે વચગાળાના જામીન પર છે. પરંતુ હાઇકોર્ટે અચાનક જ જામીન રદ કરી દીધા હતા. આ મામલામાં કપિલ સિબ્બલે કોર્ટને સમગ્ર મામલો સમજાવ્યો અને કહ્યું કે એફઆઈઆર બનાવટી પુરાવાઓ બનાવીને નોંધવામાં આવી છે. એફઆઈઆર દાખલ થયા બાદ માત્ર તિસ્તાની ધરપકડ કરવામાં આવી હતી. પરંતુ કેસની તપાસ આગળ વધી ન હતી. છ દિવસના પોલીસ રિમાન્ડ પર લેવા છતાં તેની માત્ર એક દિવસ જ પૂછપરછ કરવામાં આવી હતી.

NHRC ના આદેશ પર કેસ ટ્રાન્સફર

સિબ્બલે કહ્યું કે મારા અસીલના દેશમાંથી ભાગી જવાની કે સાક્ષીઓને પ્રભાવિત કરવાની કોઈ આશંકા નથી. ગુજરાત સરકાર દ્વારા દાખલ કરવામાં આવેલ એફિડેવિટ વાસ્તવિકતાથી દૂર છે. ગુજરાત હાઈકોર્ટે જામીન અરજી ફગાવી દીધી કારણ કે તે સમયે ચાર્જશીટ દાખલ કરવામાં આવી ન હતી, હવે સુપ્રીમ કોર્ટમાંથી વચગાળાના જામીન મળી ગયા છે.

સિબ્બલે એમ પણ કહ્યું કે બેસ્ટ બેકરી કેસમાં ટ્રાયલ ચાલી રહી છે. તમામને નિર્દોષ જાહેર કર્યા હતા. ઝહિરા શેખે તિસ્તા સેતલવાડ પાસે આવીને કહ્યું કે તેમને કેટલાક નિવેદનો આપવા માટે દબાણ કરવામાં આવ્યું છે. NHRCએ તમામ 8 કેસોને ગુજરાતની બહાર ટ્રાન્સફર કરવા માટે પિટિશન દાખલ કરી હતી અને ત્યારબાદ કેસ પણ મુંબઈ ટ્રાન્સફર કરવામાં આવ્યો હતો.

તિસ્તા વતી દલીલ કરતાં સિબ્બલે કહ્યું કે તીસ્તાની ગયા વર્ષે 26 જૂને ધરપકડ કરવામાં આવી હતી અને સપ્ટેમ્બરમાં સુપ્રીમ કોર્ટે તેને વચગાળાના જામીન આપ્યા હતા. હાઈકોર્ટ એ નિષ્કર્ષ પર કેવી રીતે આવી કે જામીન રદ કરવા જોઈએ? આ માટે કોઈ આધાર નથી.