Maharashtra: ઓમિક્રોનના વધતા કેસ વચ્ચે મુંબઈમાં બ્લેક ફંગસનો પગ પેસારો, 70 વર્ષની મહિલામાં જોવા મળ્યા લક્ષણ
2021માં કોરોનાની બીજી લહેર પછી બ્લેક ફંગસના વધતા કેસોએ લોકોના મનમાં ગભરાટ પેદા કર્યો હતો. કોરોનામાંથી સાજા થયા પછી ઘણા લોકો મ્યુકોરમાઇક્રોસિસ અથવા બ્લેક ફંગસનો શિકાર બન્યા હતા.
મહારાષ્ટ્રમાં (Maharashtra) છેલ્લા કેટલાક દિવસોથી કોરોનાના કેસમાં (corona cases) થોડો ઘટાડો જોવા મળી રહ્યો છે. પરંતુ તેનો ખતરો ટળી ગયો છે એમ કહેવું યોગ્ય નહીં હોય. છેલ્લા 24 કલાકમાં કોરોનાના 25,425 નવા કેસ નોંધાયા છે. જો કે રાહતની વાત એ છે કે આ સમયગાળા દરમિયાન 36,708 લોકો સ્વસ્થ પણ થયા છે. જ્યારે 42 દર્દીઓના મોત થયા છે. રાજ્યમાં કોરોનાના એક્ટિવ કેસ હવે 2,87,397 છે. તે જ સમયે, મુંબઈમાં છેલ્લા 24 કલાકમાં કોરોના વાઈરસના 1,384 નવા કેસ સામે આવ્યા છે અને 5,686 દર્દી સ્વસ્થ થયા છે. જ્યારે 12 લોકોના કોરોનાથી મોત થયા છે.
મુંબઈમાં કોરોનાના 18,040 એક્ટિવ કેસ છે. કોરોના કેસ ઘટવા સાથે મુંબઈના લોકોની મુશ્કેલીઓનો અંત આવ્યો નથી. ખરેખર, મુંબઈમાં બ્લેક ફંગસનો પહેલો કેસ નોંધાયો છે. અહીં 5 જાન્યુઆરીએ 70 વર્ષીય વૃદ્ધનો કોરોના રિપોર્ટ પોઝિટીવ આવ્યો હતો. આ દર્દીમાં બ્લેક ફંગસના લક્ષણો દેખાવા લાગ્યા. દર્દીને સારવાર માટે મુંબઈની વોકહાર્ટ હોસ્પિટલમાં દાખલ કરવામાં આવ્યો છે.
બીજી લહેર દરમિયાન બ્લેક ફંગસના કારણે ગભરાટ ફેલાયો હતો
2021માં કોરોનાની બીજી લહેર પછી બ્લેક ફંગસના વધતા કેસોએ લોકોના મનમાં ગભરાટ પેદા કર્યો હતો. કોરોના મહામારીમાંથી સાજા થયા પછી ઘણા લોકો મ્યુકોરમાઈક્રોસિસ અથવા બ્લેક ફંગસનો શિકાર બન્યા હતા. આ રોગને કારણે ઘણા લોકોની આંખો અને અન્ય અંગોને નુકસાન થયું હતું અને તેના કારણે ઘણા લોકોના મોત પણ થયા હતા. હવે ઓમિક્રોન વેરિઅન્ટને કારણે કોરોનાની ત્રીજી લહેરમાં બ્લેક ફંગસ ફરી એકવાર લોકોને થવા લાગી છે.
આ દર્દીઓમાં બ્લેક ફંગસનું જોખમ સૌથી વધુ હોય છે
બ્લેક ફંગસથી પીડાતા દર્દીઓ સમયસર સારવારના અભાવે અંધત્વ, અંગ નિષ્ફળતા અને મૃત્યુની સંભાવના ધરાવે છે. હાઈ બ્લડ શુગર લેવલ ધરાવતા કોરોનાના દર્દીઓ અને જેઓ લાંબા સમય સુધી સ્ટેરોઈડ લેતા હોય તેમને બ્લેક ફંગસનું સૌથી વધુ જોખમ હોય છે. આ સિવાય નબળી રોગપ્રતિકારક શક્તિ ધરાવતા દર્દીઓ અથવા અંગ ટ્રાન્સપ્લાન્ટ કરાવેલ વ્યક્તિ પણ આ રોગનો શિકાર બની શકે છે.
બ્લેક ફંગસના લક્ષણો શું છે
બ્લેક ફંગસએ એક રોગ છે જે કોઈ બેક્ટેરિયા અને વાઈરસને કારણે નહીં, પરંતુ ચોક્કસ પ્રકારની ફૂગને કારણે થાય છે. આ એક પ્રકારનો ખતરનાક ચેપ છે. તેના લક્ષણોમાં આંખોમાં બળતરા, ચહેરા પરની ચામડી કાળી પડી જવી, માથામાં તીવ્ર દુખાવો અને ચહેરાની બંને બાજુ અથવા એક બાજુ પર સોજો વગેરે છે.
આ પણ વાંચો : On This Day: આજના દિવસે જ અમેરિકાનું અવકાશયાન ‘ચેલેન્જર’ થયું હતું ક્રેશ, તમામ 7 અવકાશયાત્રીના થયા હતા મોત
આ પણ વાંચો : Pakistan Terrorist Attack: પાકિસ્તાનના બલૂચિસ્તાન પ્રાંતમાં આતંકવાદી હુમલામાં 10 સૈનિક થયા શહિદ, એક આતંકવાદી ઠાર