Supreme court (File Image)
મહારાષ્ટ્રની નગરપાલિકા સહિત સ્થાનિક સંસ્થાઓની ચૂંટણીને (Maharashtra Local Body Elections) લઈને સુપ્રીમ કોર્ટનો (Supreme Court) મહત્વપૂર્ણ આદેશ આવ્યો છે. વરસાદને ધ્યાનમાં રાખીને સુપ્રીમ કોર્ટે ચોમાસા પછી ચૂંટણી કરાવવાની અપીલ પર સવાલ ઉઠાવતા પૂછ્યું કે જ્યાં વરસાદની વધુ અસર ન હોય ત્યાં ચૂંટણી કરાવવામાં શું વાંધો છે? તેથી, સુપ્રીમ કોર્ટે વિદર્ભ અને મરાઠવાડાની સ્થાનિક સંસ્થાઓને તાત્કાલિક ચૂંટણી કરાવવા માટે કહ્યું છે. મુંબઈ અને કોંકણ જેવા વિસ્તારોમાં જે ભારે વરસાદથી પ્રભાવિત છે, ત્યાં મ્યુનિસિપલ અને અન્ય સ્થાનિક સંસ્થાઓની ચૂંટણીઓ ચોમાસા પછી યોજવી જોઈએ.
કોર્ટના આ આદેશને ઠાકરે સરકાર માટે મોટો ઝટકો માનવામાં આવી રહ્યો છે. સુપ્રીમ કોર્ટે OBC આરક્ષણને રદ કર્યું હતું અને નિર્દેશ આપ્યો હતો કે અનામતની સીમા કોઈપણ સંજોગોમાં 50 ટકાની મર્યાદાને વટાવી ન શકે. આ પછી રાજ્ય સરકારે ઓબીસી રાજકીય અનામતની પુનઃસ્થાપના માટે પ્રયાસો શરૂ કર્યા અને નીતિ અપનાવી કે જ્યાં સુધી આ નહીં થાય ત્યાં સુધી ચૂંટણીની તારીખો લંબાવવામાં આવે. પરંતુ સુપ્રીમ કોર્ટે આ બાબતે રાજ્ય સરકારને ફટકાર લગાવી હતી અને કાર્યકાળ પૂરો થયા બાદ તરત જ ચૂંટણી ન કરાવવાની નીતિને ગેરબંધારણીય ગણાવી હતી.
સુપ્રીમ કોર્ટે પૂછ્યું છે કે જ્યાં વરસાદ ન હોય ત્યાં ચૂંટણી કરાવવામાં શું વાંધો છે?
સુપ્રીમ કોર્ટે પોતાના આદેશમાં કહ્યું છે કે જ્યાં વરસાદની અસર વધુ હોય ત્યાં ચોમાસા પછી ચૂંટણી કરાવવી સમજી શકાય તેમ છે. પરંતુ જ્યાં વરસાદની અસર ઓછી હોય ત્યાં ચૂંટણી મોકૂફ રાખવાનો કોઈ અર્થ નથી. સુપ્રીમ કોર્ટે રાજ્ય ચૂંટણી પંચને જિલ્લાવાર પરિસ્થિતિની સમીક્ષા કરવા અને વરસાદની સ્થિતિને ધ્યાનમાં રાખીને ચૂંટણીની તારીખો નક્કી કરવાનો નિર્દેશ આપ્યો છે.
4 મેના રોજ સુપ્રીમ કોર્ટે રાજ્ય ચૂંટણી પંચને ચૂંટણી પ્રક્રિયા શરૂ કરવાનો આદેશ આપ્યો હતો. મુંબઈ સહિત 14 નગરપાલિકાઓની વોર્ડ રચના 18 મેના રોજ જાહેર થશે. ચૂંટણી પંચની મુશ્કેલી એ હતી કે જો અમે કોર્ટના આદેશનું પાલન કરીએ તો પણ 31 જુલાઈ પછી જ સીધો ચૂંટણી કાર્યક્રમ જાહેર કરી શકાય. આ પછી ઓગસ્ટ-સપ્ટેમ્બરમાં વરસાદને કારણે ચૂંટણી યોજવી મુશ્કેલ છે. આવી સ્થિતિમાં ઓક્ટોબરમાં જ ચૂંટણી યોજાશે. જેના પર કોર્ટે આજે આદેશ આપ્યો હતો કે જ્યાં વરસાદની અસર નથી, ત્યાં અત્યારે જ ચૂંટણી કરાવવી જોઈએ, જ્યાં વરસાદની અસર વધુ છે ત્યાં પછી ચૂંટણી થઈ શકે છે.
