મુંબઈમાં દુઃખદ અકસ્માત, સ્કૂલ બસ પર ઝાડ પડતાં 10 વર્ષના વિદ્યાર્થીનું મોત, 4 બાળકો ઘાયલ

મુંબઈના ચેમ્બુર વિસ્તારમાં મંગળવારે બપોરે એક દુઃખદ અકસ્માત સર્જાયો હતો. રોડ નંબર-11 પર યુનિવર્સલ સ્કૂલ અને તિલક નગર સ્કૂલના વિદ્યાર્થીઓને લઈ જતી સ્કૂલ બસ પર અચાનક એક વિશાળ ઝાડ તૂટી પડ્યું. આ હૃદયદ્રાવક ઘટનામાં 10 વર્ષના એક વિદ્યાર્થીનું મોત થયું છે, જ્યારે ચાર અન્ય વિદ્યાર્થીઓ ઘાયલ થયા છે. અકસ્માત બાદ સમગ્ર વિસ્તારમાં અફરાતફરીનો માહોલ સર્જાયો હતો.

પ્રાથમિક માહિતી મુજબ, આ અકસ્માત બપોરે લગભગ 2:50 વાગ્યે થયો હતો. રસ્તાની બાજુમાં ઉભેલું મોટું ઝાડ અચાનક બસ પર ધરાશાયી થતાં બસના એક ભાગને ભારે નુકસાન પહોંચ્યું હતું. ઘટના સમયે બસમાં કુલ 18 વિદ્યાર્થીઓ સવાર હતા.

રાહત-બચાવ ટીમો તાત્કાલિક ઘટનાસ્થળે પહોંચી

અકસ્માતની જાણ થતાં જ પોલીસ, ફાયર બ્રિગેડ, બૃહન્મુંબઈ મહાનગરપાલિકા (BMC) અને અન્ય રાહત-બચાવ ટીમો તાત્કાલિક ઘટનાસ્થળે પહોંચી ગઈ હતી. બચાવકર્મીઓએ ઝડપી કામગીરી હાથ ધરી બસમાં ફસાયેલા વિદ્યાર્થીઓને સુરક્ષિત બહાર કાઢ્યા. જોકે, એક વિદ્યાર્થી બસની અંદર ફસાઈ ગયો હતો, જેને ભારે જહેમત બાદ બહાર કાઢવામાં આવ્યો હતો.

BMCના અધિકારીઓના જણાવ્યા અનુસાર, અકસ્માતમાં 10 વર્ષના એક વિદ્યાર્થીનું દુર્ભાગ્યે મોત થયું છે. બસમાં સવાર 18 વિદ્યાર્થીઓમાંથી મોટાભાગના બાળકોને સુરક્ષિત રીતે બહાર કાઢવામાં આવ્યા હતા. ઈજાગ્રસ્ત ચાર વિદ્યાર્થીઓને સારવાર માટે ચેમ્બુરની ઝેન હોસ્પિટલમાં ખસેડવામાં આવ્યા છે, જ્યાં તેમની સારવાર ચાલી રહી છે. ડૉક્ટરો તેમની તબિયત પર સતત નજર રાખી રહ્યા છે.

#BREAKING Tragic accident in Chembur, Mumbai: A tree collapsed on a school bus, killing one student and injuring four. Others safely evacuated. @mybmc @MumbaiPolice#Mumbai #Chembur #Accident #SafetyFirst pic.twitter.com/brBeKMitnf

— jarvis ☠️ (@Vishii14) June 30, 2026

ટ્રાફિકને અન્ય માર્ગે ડાયવર્ટ કરવામાં આવ્યો

ઘટના બાદ પોલીસે સમગ્ર વિસ્તારને કોર્ડન કરી તપાસ શરૂ કરી છે. અકસ્માતને કારણે થોડા સમય માટે ટ્રાફિકને અન્ય માર્ગે ડાયવર્ટ કરવામાં આવ્યો હતો. પ્રાથમિક તપાસમાં એ જાણવા પ્રયાસ થઈ રહ્યો છે કે ઝાડ જૂનું અને નબળું હોવાથી પડ્યું કે પછી તાજેતરના વરસાદ અને પવનના કારણે આ ઘટના બની.

આ અકસ્માતે ફરી એકવાર ચોમાસા દરમિયાન શહેરમાં જૂના અને જોખમી વૃક્ષોની સમયસર તપાસ અને કાપણીના મુદ્દે સવાલો ઉભા કર્યા છે. વહીવટીતંત્રે સમગ્ર ઘટનાની વિગતવાર તપાસના આદેશ આપ્યા છે અને તપાસ અહેવાલની રાહ જોવાઈ રહી છે.